Lu-ka 21

1Tuôôy 'ngơơk tok, Kadraq hloq khơl manih karoh tơơk tưp kuah lêh ku oot muut đnaak hnhư hơu. 2Yôôch Kadraq hloq muuyq mo valơu adrah nưq tơơk tưp muut đnư vaarq đông jêêt de. 3Ji Kadraq đnooy: “Dong dik, thơy đnooy dii oh ay đaneq mo valơu adrah neq heq tơơk tưp muut 'ngưng iaq dêq hloay, 4vii tôôy adro hơq xagook tơơk tưp muut kaluh kuah lêh xing varơuq raah jôh ku oot. Măn mo neq, xing aduq adrah thiuq ku mo, heq tơơk tưp dêq jêêt kuah đơu mo e.”

5Tuôôy taleq adro đong đnooy truh hnhư hơu, đaneq hnhư jah ta'meq 'moq bơơn kaluh kuk phơu kaxay tamaq ji kaluh kuah lêh tơơk tưp, yôôych Kadraq dăt: 6“Kaluh thưq đơu oh ay đong hloq, hnoq truh hngơy đơu muut tuôôy nưq, be e kalook phơu leq hnoq jah xôq rahloot tol kalook phơu kadrơy đơu leh biq hrưp pôôt.” 7Tuôôy nưq, oot vôôch Kadraq đaneq: “Nưq yôôych, thơy lơơy, tuôôy leq hnoq e kaluh varơuq nưq, ji dơuq hlêêl đaleq tuôôy kaluh varơuq nưq jeq xalih vlôh?” 8Yôôch Kadraq tơơl: “Dayh rơơt rol xôq oh ay klơlh biq aluut pa ôôh. Vii 'ngưng adro hnoq truh taayh yal thơy, đnooy: ‘Kadih laa Gô,’ ji ‘Hngơy hlơơp dêh heq jeq.’ Te hooy tyauq oot. 9Panưh kadrơy, tuôôy oh ay tameng truh hmơt jăk ji xalôônq xalaaoq, yôôych te varaal yôq, vii kaluh varơuq nưq pheq xalih vlôh adroyq, lunư, varơuq lôôch dik koq aalq laa hloay tuôôy nưq.”

10Atêq nưq, Kadraq đnooy dii oot: “Tamooy neq hnoq dưk tok tachơơl hlê tamooy kadrơy, ji daak neq tachơơl dii daak hơq. 11Hnoq e kaah kaluh đơơt ahrưng vari kôt ji 'ngưng đơơt pangoot hrah, kung dii 'ngưng jiq jool măn 'ngưng aduq. Hnoq e kaah kaluh dong varơuq akêh ramêq ji kaluh hlêêl kôt xing plêêk. 12Bơh adroyq tôôy varơuq nưq, khơl drơy hnoq palo ti ku oot tol oh ay ji hnoq rôp toop oh ay, tuôôy pahnăp atăq ka kaluh hnhư tagumq ji hnhư tu, rôp jarooy oh ay truh kangưưr khơl vuua ji padrok xanok vii kơq yal thơy. 13Varơuq nưq hnoq jêêk vlôh kawah xôq oh ay đnooy vlôh apok xanưk. 14Lunưq, dayh đinq aduq xuum oh ay leh ralauq palauq xôq đnooy bing kadih, 15vii thơy hnoq kahniq ka oh ay apok xarooy ji varơuq khôôt xet đơu dêq hloay khơl tachơơl oh ay leh hnoq tachơơl hlê long aklơ ka'lăk ik. 16Bơh oh ay pheq đnooy hnoq biq pahnăp nôôp bơyh miq vaq, oh ay, oh ay katul takiel ji khơl 'wơyq, yôôch khơl drơy hnoq păk kaxêêt muuyq sôôq manih đom oh ay. 17Oh ay hnoq biq tôôy adro 'yarơ geet vii yal thơy. 18Đơu muuyq raq hlôôk tol akoq oh ay kung leh hlơơp 'leq. 19Đom varơuq atuq xuum chiuq uunq ku oh ay, oh ay hnoq jah phool hiel oh ay.

20Bơh atoh tuôôy leq oh ay hloq theng Jê-ru-sa-lem biq wi rawiit xing kaluh bing kuun, yôôych tuôôy nưq dayh xet đaneq varơuq pahyaak pahrưp theng neq heq jeq yôôch. 21Tuôôy nưq, kơyq đom dêh Ju-đê, dayh padu tok gôk, kơyq măn katul theng, dayh chuh hooy, ji kơyq măn pi gôk ruôngq, te muut đom theng. 22Vii neq laa kaluh hngơy bla hlê xôq tôôy apok heq valơk jah jêêk yuôôr. 23Bơh, jiq jiêh hloay ka khơl kadrê đong măn bonq ji khơl miq đong ăm koot uq đom kaluh hngơy nưq! Vii hnoq e pơơl dal đom dêh, ji đơơt tôq jaraq kahri tol tamooy neq. 24Oot hnoq gưlh kaxêêt 'laarq pla xieh ji oot biq rôp truh tôôy daak dêh, ji theng Jê-ru-sa-lem hnoq biq kaluh tamooy daak kadrơy joaq jalon dong truh tuôôy đơu tuôôy đơơy ku kaluh tamooy daak kadrơy jah xaleep.

25Hnoq e kaluh hlêêl tol mot hngơy, xiêk kung kaluh xalok, ji varơuq hlu rơu ku kaluh tamooy măn 'laarq vari đom tuôôy xôôl dôôl jo xarooy pariau ook ku daak tahli ji ralaaq tahli puh kaxuh. 26Khơl drơy phoch langoch vii yôq varaal ji takôô kaluh pơơl dal jeq kahri pôôt koot manih tol vari, vii kaluh qwuyen lưk tol plêêk hnoq hrưng anhưh. 27Atêq nưq, oot hnoq jah hloq Koot Manih kahri truh đom đum kluk kung dii taay yaak ji tađnah tađnaak kôt lơyq. 28Bơh tuôôy kaluh varơuq nưq xarôp xalih vlôh, dayh dưk tok ji 'ngơơk yơơt akoq oh ay, vii varơuq jah wơơt ku oh ay đong truh jeq.”

29Kadraq taboon ka oot muuyq kadook atoh: “Dayh 'yo ưk pok puut ji dêq hloay ưk ôôlh. 30Paq kê tuôôy leq ni vơơ muh vlok vlôh xamok, oh ay xet, tuôôy kadih tamaak 'yo hloq, đaneq muua tôq heq jeq yôôch. 31Kung anưq, tuôôy oh ay hloq kaluh varơuq neq xalih vlôh, oh ay pheq xet đaneq daak dêh ku Kơy Plêêk heq jeq. 32Dong dik, thơy đnooy dii oh ay đaneq adrơơk neq kajưk dik hnoq leh kaxêêt hlơơp dong truh tuôôy kaluh varơuq hơq xalih vlôh. 33Plêêk ji vari hnoq hooy hlơơp, bơh kaluh apok ku thơy kajưk dik hnoq leh dong leq hooy hlơơp.

34Bơh dayh rơơt rol dii kadih xăk, xôq xuum oh ay klơlh biq dơơp ka parêq parơh đom varơuq xa hôôch, vuul weel ji kaluh varơuq lo đơơy riirh, truh tuôôy hngơy nưq hnoq ik leh xanih ka ôp pôôt tol oh ay 35đaji rayaalh lolh, vii varơuq nưq hnoq xalih truh ka tôôy adro riirh tol loch raak vari. 36Bơh dayh kah parol đom tôôy tuôôy, xadrook apôôy xôq ka oh ay e đu paraat xôq dalơh hlê dêq hloay kaluh varơuq jeq xalih vlôh nưq, ji xôq dưk kangưưr Koot Manih.”

37Nưq laa muut ka hngơy, Kadraq pato dayq đom hnhư hơu, măn tuôôy rayôôp klôôy, atêq tuôôy hooy tok tol gôk taayh laa Ô-liu, Kadraq padơy ơơr ka klôôy. 38Ji tôôy adro truh dii Kadraq muut xaroq meel xôq tameng Kadraq đom hnhư hơu.