Lu-ka 20

1Varơuq xalih vlôh muut muuyq hngơy hơq, tuôôy Kadraq đong pato dayq manih karôp đom hnhư hơu ji padoh taboon Hêêl Kaxay, khơl thơy tơơk tưp kôt ji khơl thơy pato ganuun kung dii khơl draq lơơk garuk truh. 2Oot đnooy dii Kadraq đaneq: “Xiin ăm 'wot xet bơyh taay yaak leq đơu thơy dơơp kaluh varơuq neq, long kơyq laa manih heq pahnăp ka thơy taay yaak neq.” 3Bơh xôq tơơl apok, Kadraq đnooy dii oot: “Gô kung hnoq vôôch khơl kơy muuyq apok, dayh đnooy ka gô: 4Pheep bap-tem ku Jăng laa xing plêêk long xing koot manih?” 5Nưq laa oot tajauq dii mamuuyq, đnooy đaneq: “Atoh haay đnooy: ‘Xing plêêk,’ kơy nưq hnoq vôôch: ‘Nưq aleq khơl kơy leh tuôq kơy?’ 6Măn atoh haay đnooy: ‘Xing koot manih,’ yôôych hloay manih karôp hnoq tiip phơu haay, vii manih karôp raay tuôq Jăng laa hnhư kơy hlit.” 7Ji yôôch oot tơơl apok đaneq oot leh xet xing leq. 8Lôôk Jê-xu đnooy dii oot: “Gô kung leh ăm khơl kơy xet bơyh taay yaak leq gô dưk dơơp kaluh varơuq nưq.”

9Yôôch Kadraq xarôp taboon kadook atoh neq ka manih karôp: “Muuyq adro hơq pêêt muuyq hluôôt nho, ji ăm khơl adro pêêt nho xapo ni, yôôch hooy truh dêh kadrơy đom muuyq kawat xiik. 10Truh muua varoot, kơy patăk muuyq dro xapok truh kung khơl pêêt nho xôq oot hnoq atăq ka kơy xok xing play gay ku hluôôt nho. Bơh atêq tuôôy tu tiel, khơl pêêt nho heq đuôôy ay nưq xuq ti hloh. 11Kơy laay patăk đnoyq muuyq dro xapok kadrơy truh, bơh ay neq kung anưq, oot heq đuôôy ay xuq ti hloh atêq tuôôy tu tiel ji đnooy ra ơơh. 12Yôôch kơy laay patăk đnoyq dro xapok thưq pe truh, bơh bing oot kung tiel ay nưq biq xưr, avih vlôh pi gôk. 13Nưq laa, kôôch hluôôt nho đnooy: ‘Gô pheq dơơp kajoq neq? Gô hnoq patăk koot kanau xung xiaq ku gô truh. Leh kheoq, oot hnoq kuh yôq ni.’ 14Bơh tuôôy khơl pêêt nho hloq adro koot, oot tajauq dii mamuuyq, đaneq: ‘Neq laa adro katôôl. Haay dayh păk kaxêêt ni, xôq garuh anôôp neq hnoq ik jêêk vlôh ku haay.’ 15Ji atêq tuôôy vih adro koot nưq vlôh pi gôk hluôôt nho, khơl oot păk kaxêêt ay nưq. Nưq yôôych, kôôch hluôôt nho hnoq dơơp kajoq dii khơl nưq? 16Kơy nưq hnoq truh păk kaxêêt dêq khơl pêêt nho neq ji pahnăp hluôôt nho ka khơl drơy.” Tuôôy tameng anưq, oot dăt: “Apôôy ăm ka varơuq nưq leh xalih vlôh.” 17Bơh tuôôy 'yo oot, Kadraq đnooy: “Nưq, apok heq valơk neq e iq đaleq:

‘Kuk Phơu đơu thơq xơy dơyh ka'lăk,

kadih ni jah jêêk vlôh phơu muum hnhư’?

18Adro leq klêh tol phơu nưq hnoq biq naat xaak. Măn atoh kơyq đơu phơu nưq klêh troq, yôôych ni hnoq raniaq naat adro nưq.”

19Ji yôôch, khơl thơy pato ganuun kung khơl thơy tơơk tưp kôt axek kach tơơk ti dii Kadraq hloay kadih wat nưq, đơu oot yôq manih karôp, vii oot xet đaneq Kadraq taboon kadook atoh nưq đnooy truh oot. 20Tuôôy tyauq tavooy Kadraq thier kih, oot patăk dăt taleq dro 'yo xoak kadih dơơp vlôh đaji laa hyioh jăk, xôq oot hnoq ik rôp kadrôôp Kadraq đom apok đnooy, xôq pahnăp nôôp Kadraq ka khơl dưk xakaq ji padrok dêh ku kơy padrok xanok. 21Khơl adro nưq vôôch Kadraq đaneq: “Thơy lơơy, 'wot xet nưq laa thơy đnooy ji pato muuyq kach hyioh jăk, leh 'yo nêêh kơyq, đơu thơy pato trôôk daak ku Kơy Plêêk đom varơuq dik. 22Nôôp xơu ka Sê-sa laa varơuq jơq pheep đôôyq dii haay long be?” 23Bơh vii nhonq xet varơuq xuum va ih ku oot, Kadraq đnooy dii oot: 24“Ăm Gô 'yo muuyq đông đơ-ni-ê. Ni e long lơuq ji yal hlêêl ku kơyq?” Oot tơơl: “Ku Sê-sa.” 25Nưq laa Kadraq đnooy dii oot: “Nưq yôôych, dayh bla hlê ka Sê-sa kaluh kajoq ku Sê-sa, ji ăm Kơy Plêêk kaluh kajoq ku Kơy Plêêk.” 26Oot leh hnoq rôp gêh apok tơơl nưq kangưưr manih karôp ik, ji vii dơơp akêh adroyq apok tơơl ku Kadraq, oot raay niinq hnhep.

27Atêq nưq, tuôôy taleq adro thuôk bing Sa-đu-sê kahluh hlê jeq, nưq laa khơl adro đnooy đaneq leh e varơuq riirh hlê, oot vôôch tagêh Kadraq 28đaneq: “Thơy lơơy, Môi-se heq valơk pôôt ka haay, atoh ay ku adro leq nưq pajêêk kadrê, đơu tuôôy kaxêêt, adro nưq koq e koot, yôôych oh ku dro nưq duh xok adro kadrê valơu neq ji hnoq ik dưk tok muuyq rong nooy ka ay ni. 29Lunưq, hnhư hơq e pơh oh ay kanau, ji atêq tuôôy xok kadrê, adro ay kaa heq kaxêêt leh koot; 30ji adro thưq vaarq, 31yôôch adro thưq pe xok nau; bơh kưq đanưq đơu pơh adro raay leh e koot, ji kaxêêt dêq. 32Atêq lôôch, adro kadrê kung kaxêêt. 33Nưq yôôych, đom hngơy riirh hlê, mư nưq hnoq laa kadrê ku kơyq đom sôôq oot? Bơyh dêq pơh oh ay raay heq xok mư dơơp kadrê.” 34Lôôk Jê-xu đnooy dii oot: “Koot xau đơơy neq yôôych pajêêk, ga. 35Măn khơl kơyq jah 'yo laa xưngq đangq hươngh đơơy atêq ji varơuq riirh hlê xing khơl kaxêêt yôôych leh pajêêk kung leh ga. 36Bơyh oot kung leh hnoq kaxêêt ik đnoyq, vii oot hnoq đaji kơy yaak; ji oot laa khơl adro koot ku Kơy Plêêk, tuôôy laa koot xau ku varơuq riirh hlê. 37Măn truh varơuq manih kaxêêt riirh hlê yôôych hloay đaji Môi-se heq ăm hloq aduq pôôp jaliê, tuôôy kơy xưng Lôôk laa Kơy Plêêk ku Ap-ra-ham, Kơy Plêêk ku I-sak, ji Kơy Plêêk ku Ja-kôp. 38Kadraq leh aalq laa Kơy Plêêk ku manih kaxêêt, đơu laa ku manih riirh, vii dêq hloay raay riirh đôôyq dii Kadraq.” 39Yôôch tuôôy taleq thơy pato ganuun tơơl hlê, oot đnooy: “Thơy lơơy, thơy đnooy thier troq.” 40Oot be hôôk vôôch Kadraq apok leq đnoyq.

41Atêq nưq, Kadraq đnooy dii oot: “Aleq đơu khơl drơy đnooy Lôôk Wơơt Dêh laa koot Đa-vik? 42Vii đom rahlăp Thi Thiên, kadih Đa-vik e đnooy:

‘Lôôk xanoh dii Lôôk gô đaneq:

“Dayh 'ngôôy piik akoh Gô,

43dong truh tuôôy Gô dơơp ka khơl adro tachơơl ku Koot jêêk đool ka jôôk Koot.”’

44Lunưq, Đa-vik xưng Kadraq laa ‘Lôôk’, yôôych dơơp aleq Kadraq laa koot ku vuua nưq ik?”

45Đom tuôôy dêq hloay manih karôp đong domq tameng, Kadraq đnooy dii khơl xatyauq kadraq: 46“Dayh rơơt rol dii khơl thơy pato ganuun, laa khơl adro trôôch hlưp aau yơơt hooy adaauq, trôôch kaluh apok vôôch hrok măn aduq tabôôt xa, ji kaluh aduq 'ngôôy kôt dik đom hnhư tagumq kung dii aduq kôt đom đaamq waal, 47đơu bing oot xa luôôt hnhư ku khơl mo valơu, yôôch laay xadrook apôôy xiit rangek xôq kahnoq vlôh. Khơl adro nưq hnoq kang nhonq xưh xadrah parêq parơh iaq.”