Cua Bible Literal Text
Lu-ka 19
Tuôôy heq muut pi'lăp, Kadraq hooy dalơh hlê theng Jê-ri-kô. Ji dayh 'yo muuyq adro, jah taayh anơng laa Xa-chê, kơy laa khơl draq xok xơu, ji kơy nưq karoh e. Kơy axek kach 'yo Lôôk Jê-xu laa kơyq, đơu kơy leh hnoq dơơp ik xing đom bing karôp, vii kơy e phook manih lêq de. Yôôch tuôôy heq charơơk truh pi adroyq, kơy tok tol muuyq ưk thung xôq kơy hnoq ik tamaak hloq Kadraq vii Kadraq jeq hooy dalơh hlê ka trôôk nưq. Tuôôy Kadraq hooy truh aduq nưq, 'ngơơk 'yo tok, Lôôk Jê-xu đnooy dii kơy: “Xa-chê, dayh pôôt dayh, vii hngơy neng gô duh pheq măn aduq hnhư ku ay.” Nưq laa kơy pơl wol pahro pôôt ji hlah hlaak đoonq tiip Kadraq. Tuôôy hloq đanưq, manih karôp raay ramôôy, đnooy đaneq: “Kơy nưq muut măn hnhư achung dii muuyq adro e kadrôôp.” Bơh tuôôy Xa-chê dưk vlôh, kơy tơơl dii Lôôk: “Kuh Lôôk, xiin 'yo neq, gô ahlook muuyq panoot garuh anôôp ku gô ka manih adrah, ji atoh gô heq adô lưưt kơyq thưq kajoq, gô bla hlê galơh poot yưk.” Tuôôy nưq, Lôôk Jê-xu đnooy dii kơy đaneq: “Hngơy neng varơuq wơơt xok heq truh dii hnhư neq, vii ay neq kung laa koot xau Ap-ra-ham. Vii Koot Manih heq truh xôq axek ji wơơt manih kaxêêt hlơơp.”
Đong tuôôy oot domq tameng kaluh apok nưq, Kadraq xarôp varơuq taboon muuyq kadook atoh, vii Kadraq đong măn jeq theng Jê-ru-sa-lem, đơu oot biit đaneq daak dêh ku Kơy Plêêk jeq rama vlôh truh aduq yôôch. Bơyh anưq, Kadraq taboon: “Muuyq hnhư karoh hơq hooy truh dêh xangưưy xôq kadih xăk nhonq xok qwuyen vuua yôôch wiit xuq. Atêq tuôôy taayh kưl adro xapok ku kơy truh, kơy pahnăp ka oot kưl mi-na ji đnooy dii oot: ‘Dayh tabôôt xa đom tuôôy gô hooy xangưưy.’ Bơh tamooy ku kơy 'yarơ kơy ji atăq muuyq bing thêq oot tyauq atêq kơy đnooy: ‘'Wot leh xung adro neq dưk xakaq tol 'wot.’ Varơuq xalih vlôh tuôôy kơy wiit xuq atêq tuôôy nhonq xok qwuyen vuua, kơy vlôh tanưưl taayh truh tavơh kơy khơl adro xapok đơu kơy heq pahnăp jêêt, xôq kơy hnoq ik xet oot heq dơơp lơơy jah kajoq xing varơuq tabôôt xa. Nưq yôôch, adro thưq nhưk truh, đnooy: ‘Kôôch lơơy, mi-na ku kơy heq dơơp lơơy athêêp kưl mi-na.’ Kôôch đnooy dii ay nưq: ‘Xapok kaxay tamaq, ik dik. Vii ay heq muuyq xuum đom varơuq thier de, lunưq ay dayh adrơk qwuyen tol kưl theng.’ Ji adro thưq vaarq truh, đnooy: ‘Kôôch lơơy, mi-na ku kơy heq dơơp vlôh dăp mi-na.’ Yôôch kôôch kung đnooy dii ay neq: ‘Ay dayh dưk xakaq dăp theng.’ Muuyq adro kadrơy truh, đnooy: ‘Kôôch lơơy, xiin dayh 'yo mi-na ku kơy đơu gô 'miêh jư, jah anung đom khanh, Bơyh gô yôq kơy, vii kơy laa manih ngiim khăk. Kơy xok đom aduq kơy leh xôq, ji goch đom aduq kơy leh paraay.’ Kôôch dăt ay nưq: ‘gamưh tol apok đnooy ku ay, gô hnoq xưh xadrah ay, adro xapok xơk tauq. Ay xet đaneq gô laa manih ngiim khăk, xok đom aduq gô leh xôq, ji goch đom aduq gô leh paraay. Nưq yôôych vii aleq ay leh atăq jêêt ku gô muut hnhư baak, xôq atoh tuôôy wiit xuq, gô kung xok hlê jêêt nưq kung dii lơơy?’ Yôôch kơy đnooy dii khơl manih đong dưk đnư: ‘Dayh xok mi-na xing adro neq đơu ăm ka adro e kưl mi-na.’ Oot đnooy dii kơy: ‘Kôôch lơơy, ay nưq đong e kưl mi-na yôôch.’ ‘Gô đnooy ka khơl ay xet, adro leq e hnoq jah ăm athêêp, bơh xing adro leh e, hnoq biq xok hloay dêq varơuq ni đong e. Măn khơl adro tachơơl ku gô hơq, laa khơl adro leh xung gô dưk xakaq tol oot, dayh jarooy oot truh đnen ji păk kaxêêt oot kangưưr gô.’”
Atêq tuôôy đnooy kaluh apok nưq, Kadraq dưk hooy đnoyq pi adroyq, kahluh tok truh Jê-ru-sa-lem.
Varơuq xalih vlôh tuôôy Kadraq hooy jeq truh Bêt-pha-jê ji Bê-tha-ni, truh aduq ngok đoot jah taayh laa Ô-liu, Kadraq patăk dăt vaarq dro xatyauq, dăt đaneq: “Dayh kahluh muut palơy pla kangưưr, tuôôy muut đom nưq, oh ay hnoq hloq muuyq ôô lưưa koot biq vek, đơu tol ôô lưưa nưq koq adro leq hmưq acho. Atêq tuôôy luh talơy vek ni, dayh jarooy xuq đnen. Atoh kơyq nưq vôôch oh ay: ‘Vii aleq khơl ay luh talơy vek ni?’ yôôych oh ay hnoq đnooy đaneq: ‘Lôôk e varơuq duh acho ni.’” Nưq laa, tuôôy vaarq adro heq jah patăk dăt vlôh hooy, oot hloq kaluh varơuq dang đaji Kadraq heq đnooy dii oot. Tuôôy oot đong luh talơy vek lưưa koot, khơl kôôch lưưa đnooy dii oot: “Aleq khơl ay luh talơy vek lưưa koot vlôh?” Oot tơơl đaneq: “Lôôk e varơuq duh acho ni.” Yôôch oot jarooy ni xuq ka Lôôk Jê-xu ji atêq tuôôy hlơơk aau kahliik oot tol lưưa koot, oot rôôk Lôôk Jê-xu 'ngôôy tol ni. Tuôôy Kadraq hooy dalơh, khơl drơy hlơơk aau kahliik ku oot tol trôôk. Tuôôy Kadraq kahluh jeq truh ahmaat gôk Ô-liu yôôch, dêq bing khơl xatyauq karôp lơyq xarôp ahrơh hlah, kung xarooy kalh apok ayuôôt laat Kơy Plêêk truh dêq hloay kaluh varơuq taay yaak đơu oot heq hloq, đaneq: “Vanong hloay laa viq vuua truh đom yal ku Lôôk! Hrok hrol tol plêêk, ji tađnah tađnaak tol aduq thier yơơt!” Muuyq sôôq manih Pha-ri-si xing đom bing tamooy karôp đnooy dii Kadraq: “Thơy lơơy, xiin toah trek khơl xatyauq ku thơy.” Tơơl hlê oot, Kadraq đnooy: “Gô dăt êêp kơy, đaneq atoh oot hnhep yôôych kaluh kuk phơu neq hnoq tarok kôt tok.”
Tuôôy Kadraq heq truh jeq, tuôôy 'yo hloq theng phôq, Kadraq nhim truh ni, đnooy đaneq: “Jơq kajoq may heq nhonq xet đom hngơy neng, dik kadih may pheq xet, kaluh kajoq taway truh hrok hrol! Lunư, kaluh nưq juneq heq biq đơ kađoq klơlh mot may. Vii hnoq e hngơy xalih truh tol may, khơl adro tachơơl ku may hnoq đăp bơk rawiit may, oot hnoq wi rawiit may, ji hmơt ranhuq may xing tôôy panưh. Oot hnoq hmơt pahrưp may kung koot xau may măn katul may. Yôôch oot hnoq be xôq hlê muuyq kuk phơu leq măn rahloot tol muuyq kuk phơu kadrơy măn aduq may, bơyh vii may heq leh nhonq xet kawat may jah hlơq hlôôp.”
Yôôch tuôôy muut đom hnhư hơu, Kadraq xarôp đuôôy dêq khơl adro tabôôt tek măn đnư, đnooy kung oot: “E apok valơk: ‘Hnhư Gô laa hnhư xadrook apôôy,’ bơh êêp heq dơơp ni jêêk ‘troop tapu ku khơl atôk varoh.’”
Tôôy hngơy Kadraq kưq pato dayq đom hnhư hơu. Măn khơl thơy tơơk tưp kôt, khơl thơy pato ganuun ji khơl dưk xanok manih karôp 'miêh đong axek kach păk kaxêêt Kadraq, ji oot măn koq axek jah kach leq đơu oot hnoq ik dưk dơơp, vii dêq hloay manih karôp raay karauq domq tameng Kadraq.
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.