Lu-ka 18

1Yôôch Kadraq taboon ka oot muuyq kadook atoh xôq ăm hloq varơuq duh dik đôôyq dii oot laa pheq hloay hloay xadrook apôôy, ji leh gưlh xuum, 2đaneq: “Aduq theng hơq e muuyq adro padrok xadrah nưq leh kuh yôq Kơy Plêêk, kung be 'yo ra kajoq khơl drơy. 3Đom theng nưq e muuyq mo valơu, ji mo kưq truh dii kơy nưq, tơơl: ‘Xiin xưh hyioh jăk ka gô adroyq adro tachơơl hlê gô.’ 4Tuôôt muuyq kawat kơy nưq leh hmưq 'miêh xuum, bơh atêq nưq, kơy nưq kadih đnooy dii xăk: ‘Long gô leh kuh yôq Kơy Plêêk long be 'yo ra kajoq adro leq, 5bơh vii mo valơu neq kưq dơơp ngơyq miet ka gô, lunưq gô hnoq xưh hyioh jăk ka mo nưq, xôq mo nưq klơlh dơơp gô galeh galal tuôôy kưq truh luuy dong truh tuôôy payôôch varơuq neq.’” 6Yôôch Lôôk đnooy: “Dayh tameng apok adro padrok xadrah lưp hyioh nưq đnooy. 7Nưq yôôych, dang aleq Kơy Plêêk leh dưk dơơp hyioh jăk ka khơl adro jah rơơlh ku Kadraq, laa khơl adro klôôy hngơy apôôy xiin Kadraq, đơu Kadraq manưưn manưl hlê dii oot? 8Thơy đnooy dii oh ay đaneq Kadraq hnoq dưk dơơp hyioh jăk ka oot kach talăng jăk. Ju anưq, tuôôy Koot Manih truh, Kadraq dong dik hnoq axek hloq xuum tuôq tol vari be?”

9Yôôch Kadraq kung taboon kadook atoh neq ka muuyq sôôq manih, laa khơl adro kadih tuôq aduq xăk xamơk đaneq oot laa hyioh jăk ji 'yo leh ra kajoq manih drơy: 10“Vaarq adro hooy tok truh hnhư hơu xadrook apôôy — muuyq adro laa manih Pha-ri-si, ji manih hơq laa manih xok xơu. 11Manih Pha-ri-si dưk xadrook apôôy kaluh apok neq truh kadih xăk: ‘Kuh Kơy Plêêk, koot kuh kway Kadraq vii koot leh aalq dang đaji sôôq manih măn hlê — khơl varoh, khơl lưp hyioh jăk, khơl tuut taat — long pheq đnooy đaji manih xok xơu neq. 12Koot deek xa muuyq twuân vaarq yưk. Koot tơơk tưp phon kưl tôôy thưq koot axek jah.’ 13Bơh manih xok xơu, tuôôy dưk kơn xangưưy, pheq đnooy leh hôôk 'ngơơk mot tok plêêk, wih hlê kơy tuk tada kơy, tơơl: ‘Kuh Kơy Plêêk, xiin biit angơuq koot, muuyq adro e kadrôôp.’ 14Thơy đnooy dii oh ay, adro neq hooy xuq hnhư ni jah xưng hyioh jăk nưq leh aalq adro hơq, vii adro leq kadih vanê xăk tok hnoq biq haaq apôôt, bơh kơyq kadih haaq xăk apôôt hnoq jah vanê tok.”

15Tuôôy nưq, khơl drơy xagook hloay dêq khơl on oh truh dii Kadraq xôq Kadraq avêq truh oot, bơh tuôôy hloq đanưq, khơl xatyauq toah khơl adro nưq. 16Bơh Lôôk Jê-xu taayh oot hlê, dăt: “Dayh xôq on oh truh dii thơy, ji te klơl kơmq oot. Vii daak dêh ku Kơy Plêêk thuôk truh khơl adro đanưq. 17Dong dik, thơy đnooy dii oh ay, atoh kơyq leh nhonq xok daak dêh ku Kơy Plêêk đaji muuyq dro oh de, yôôych adro nưq kajưk dik hnoq leh ik muut đom nưq.”

18Muuyq adro padrok nưq vôôch Kadraq, đaneq: “Kuh thơy kaxay xuum, gô hnoq nhonq jah varơuq riirh đơơy đơơy tuôôy dơơp kajoq?” 19Bơh Lôôk Jê-xu đnooy dii manih nưq: “Aleq ay taayh gô laa kaxay xuum? Be kơyq laa kaxay xuum, đêh vlôh muuyq adro Kơy Plêêk đơu heq. 20Ay heq xet kaluh varơuq ganeen — te lôp kadrôôp tuut taat, te păk kaxêêt manih, te atôk varoh, te dơơp xanưk pa ôôh, dayh kuh vado miq vaq ay.” 21Nưq bơh ay tơơl: “Gô heq dơơp tyauq dêq hloay kaluh varơuq ganeen nưq xing tuôôy măn de ku gô.” 22Lunư, tuôôy tameng đanưq, Lôôk Jê-xu đnooy dii adro nưq: “Măn e muuyq varơuq đong thiuq aduq ay. Dayh tek dêq kaluh kajoq ay e ji ahlook ăm ka manih adrah, yôôych ay hnoq e garuh anôôp tol plêêk — ji dayh truh đnen, hooy tyauq gô.” 23Bơh tuôôy tameng taleq apok nưq, ay nưq jêêk vlôh rơu ri dik, vii ay nưq thier karoh. 24Yôôch atêq tuôôy 'yo ay, Lôôk Jê-xu đnooy: “Khơl manih e 'ngưng garuh anôôp muut đom daak dêh ku Kơy Plêêk dik pơơl xet taleq! 25Vii dik laa klêq iaq ka ôô laak đa hooy hlê troop jarưp, taso dii muuyq adro karoh muut đom daak dêh ku Kơy Plêêk.” 26Nưq laa, khơl adro tameng anưq, vôôch: “Nưq yôôych kơyq hnoq ik jah wơơt?” 27Kadraq tơơl: “Kaluh varơuq lưp dơơp ik dii koot manih laa dơơp ik dii Kơy Plêêk.” 28Yôôch Phi-e-rơ tơơl: “Thơy 'yo, 'wot heq ka'lăk tôôy thưq ji tyauq thơy.” 29Nưq, Kadraq đnooy dii oot: “Dong dik, thơy đnooy dii oh ay đaneq be e muuyq dro leq đơu heq ka'lăk hnhư, kadrê, oh ay, miq vaq, long koot xau, vii kơq daak dêh ku Kơy Plêêk 30laay laa adro leh hmưq nhonq hlê 'ngưng phon iaq đom đơơy neq, ji đom đơơy jeq truh, 'ngưq laa varơuq riirh đơơy đơơy.”

31Atêq nưq, tuôôy heq jarooy đêh kưl vaarq dro jah rơơlh vlôh, Kadraq đnooy dii oot: “Neq, haay đong hooy tok theng Jê-ru-sa-lem ji tôôy varơuq heq valơk truh Koot Manih bơyh khơl kơy hlit hnoq jah payôôch. 32Vii Kadraq hnoq biq rôp muut ti khơl tamooy kadrơy, biq aklêêu tache, biq dơơp ra ơơh, ji biq kaxôh kaxoot. 33Atêq tuôôy tiel dook Kadraq, oot hnoq păk kaxêêt Kadraq dơyh, ji truh hngơy thưq pe Kadraq hnoq riirh hlê.” 34Khơl xatyauq be hlolh kajoq kaluh varơuq neq, ji apok nưq 'miêh biq đơ kađoq klơlh oot, lunưq oot leh hlolh kaluh varơuq heq jah đnooy.

35Varơuq xalih vlôh tuôôy Kadraq hooy jeq truh theng Jê-ri-kô, muuyq dro apul nưq đong 'ngôôy xa xiin gah trôôk. 36Tuôôy tameng apok bing karôp hooy dalơh hlê, ay vôôch hlơq varơuq kajoq đong xalih vlôh. 37Oot ăm ay xet đaneq: “Jê-xu manih Na-xa-ret jeq hooy hlê.” 38Ji yôôch ay taayh kôt, đaneq: “Ôôy Jê-xu, koot vuua Đa-vik, xiin biit angơuq gô.” 39Khơl adro hooy adroyq toah ay, xôq ay pheq hnhep apok. Bơh ay kưq alo kôt iaq đnoyq: “Ôôy, Koot vuua Đa-vik, xiin biit angơuq gô.” 40Tuôôy nưq, tuôôy heq dưk hlê, Lôôk Jê-xu vlôh tanưưl jarooy ay truh dii Kadraq. Yôôch atêq tuôôy ay truh jeq, Kadraq vôôch ay: 41“Ay xung gô dơơp kajoq ka ay?” Nưq laa ay tơơl: “Kuh Lôôk, nưq laa ăm gô hnoq ik 'yo hloq.” 42Lôôk Jê-xu đnooy dii ay: “Dayh 'yo hloq hlê! Xuum tuôq ku ay heq payơh ka ay.” 43Hloay jơnưq, ay 'yo hloq hlê ik ji ay hooy tyauq Kadraq, tơơk tưp tađnah tađnaak ka Kơy Plêêk. Tuôôy hloq anưq, tôôy adro raay tơơk tưp apok ayuôôt laat Kơy Plêêk.