Skip to content
BibleKenya

Cua Bible Literal Text

Lu-ka 17

Yôôch Kadraq đnooy dii khơl xatyauq kadraq: “Varơuq leh hnoq leh xalih vlôh laa kaluh kơq tagay dơơp lôp, bơh ra ơơh ka adro leq đơu dalơh ni, kaluh kơq dơơp lôp xalih vlôh! Dik tolh ka adro nưq atoh đaji muuyq apal phơu jah vek rawiit ranong ni, ji ni biq avih pôôt tahli măn iaq laa xôq ni tagay dơơp lôp ka muuyq đom kaluh adro de neq. Dayh 'yo rơơt jư xăk! Atoh muuyq adro oh ay xăk lôp kadrôôp, dayh toah trek adro nưq; ji atoh adro nưq wiit xuum, dayh tha ka'lăk ka ni. Long adro nưq lôp kadrôôp dii oh ay truh pơh yưk đom hngơy, ji pơh yưk wiit hlê đnooy dii oh ay: ‘Gô wiit xuum,’ yôôych oh ay hloay hnoq tha ka'lăk ka ni!”

Khơl jah rơơlh tơơl dii Lôôk: “Xiin athêêp xuum tuôq ka 'wot.” Nưq yôôch, Lôôk tơơl: “Atoh oh ay e xuum tuôq dang muuyq kalook avơy, yôôych đaji tuôôy oh ay đnooy dii ưk jơu neq đaneq: ‘May pheq biq vưyq ưk tok ji jah pêêt 'laarq tahli,’ yôôych ni hloay laa pheq tameng tyauq oh ay. Bơh kơyq đom oh ay e xapok hooy akay ruôngq long xakaq ôô trưưu xing pi gôk manay wiit xuq đơu laay dăt ni: ‘Truh 'ngôôy muut para xa hloay’? Tađôôy muut đnư, be aalq adro kôôch hnoq đnooy dii ni: ‘Dayh adoot waal ka gô xa, ji hnek katêêk ni hơu varơuq gô đom tuôôy gô xa hôôch, yôôch atêq kaluh varơuq nưq, ay đơơu jah xa hôôch’ ih? Adro kôôch nưq be kahnoq xuum xet vanong kajoq dii adro xapok vii ni heq dơơp kaluh varơuq jah patăk dăt, troq be? Oh ay kung anưq, tuôôy leq oh ay payôôch tôôy varơuq heq jah patăk ka oh ay, dayh đnooy đaneq: ‘'Wot laa khơl xapok lưp xưngq. 'Wot heq dơơp payôôch varơuq 'wot pheq dơơp.’”

Varơuq xalih vlôh đom tuôôy đong tol trôôk truh Jê-ru-sa-lem, yôôych Kadraq dalơh hlê dêh jaap akăk katul Sa-ma-ri ji Ga-li-lê. Tuôôy Kadraq muut đom muuyq theng nưq, kưl adro jiq bingq paruh kôô Kadraq, đơu oot dưk xing xangưưy ji oot tok apok tơơl: “Kuh thơy Jê-xu, xiin biit angơuq 'wot.” Tuôôy 'yo hloq oot, Kadraq dăt oot: “Dayh hooy kahnoq xăk dii khơl thơy tơơk tưp.” Ji varơuq xalih vlôh đom tuôôy oot hooy, yôôych oot jah xarêh. Yôôch muuyq adro đom sôôq oot, tuôôy hloq đaneq xăk heq jah xarêh, ay wiit xuq hlê, kôt apok ayuôôt laat Kơy Plêêk. Ay kuu mot pôôt aduq jôôk Kadraq, kuh kway Kadraq. Ay nưq laa muuyq adro Sa-ma-ri. Nưq laa, tuôôy tơơl hlê, Lôôk Jê-xu đnooy: “Leh aalq dêq kưl dro raay jah xarêh ih? Măn xiit dro hơq 'leq? Aleq leh hloq kơyq wiit hlê kơn tađnah tađnaak ka Kơy Plêêk đêh vlôh adro tamooy kadrơy neq?” Yôôch Kadraq đnooy dii ay nưq: “Dayh dưk tok, ji hooy. Xuum tuôq ku ay heq payơh ay.”

Tuôôy jah khơl manih Pha-ri-si vôôch tuôôy leq daak dêh ku Kơy Plêêk hnoq truh, Kadraq tơơl apok oot, ji đnooy: “Daak dêh Kơy Plêêk leh truh dii varơuq tamaak 'yo ik. Manih nưq kung hnoq leh đnooy: ‘'Yo nee, măn đnen!’ long ‘Hơq hơq!’ Vii, dayh 'yo yơu, daak dêh ku Kơy Plêêk măn pi'lăp khơl kơy.”

Yôôch Kadraq đnooy dii khơl xatyauq: “Hnoq e kaluh hngơy tuôôy đơu oh ay biit trôôch 'yo hloq muuyq đom kaluh hngơy ku Koot Manih, đơu oh ay hnoq leh hloq ik. Ji khơl drơy hnoq đnooy dii oh ay: ‘Hơq, măn hơq!’ long: ‘Nee, măn đnen!’ Te hooy truh, kung te charơơk tyauq oot, vii đaji bliek 'mek amô tađnah xing lawah 'laarq plêêk neq xaraar truh lawah 'laarq plêêk hơq, yôôych Koot Manih kung hnoq đanưq. Bơh varơuq duh adroyq dêq ka Kadraq laa chiuq 'ngưng pơơl dal ji biq chôôyq ka'lăk bơyh adrơơk neq. Đaji varơuq heq xalih vlôh đaleq đom đơơy Nô-ê, yôôych ni kung hnoq đanưq đom đơơy ku Koot Manih. Manih nưq măn xa, hôôch, pajêêk, vôôch — dong truh hngơy Nô-ê muut đom tau, yôôch daak ngôp galaay truh ji păk kaxêêt dêq hloay. Kung anưq, đaji varơuq heq xalih vlôh đom đơơy ku Lot — khơl drơy măn xa, hôôch, root, tek, paraay pêêt, xơy atok, bơh muut hngơy Lot vlôh klơlh Sô-đôm, yôôych jit ôôlh ji lưưu hwinh xing plêêk kahri pôôt, yôôch huur ka'lăk dêq hloay. Varơuq hnoq xalih truh tyauq kach nưq đom hngơy Koot Manih rama vlôh. Đom hngơy nưq, kơyq măn tol apo hnhư đơu garuh anôôp xăk măn đom hnhư, yôôych te pôôt xôq xok ni; ji dang anưq, kơyq măn pi gôk manay yôôych te wiit xuq dii kaluh thưq măn hlê. Dayh văch hlê kadrê ku Lot. Atoh kơyq axek kach jư varơuq riirh xăk yôôych hnoq hlơơp ni, bơh atoh kơyq ka'lăk yôôych hnoq jư 'yo jah ni. Thơy đnooy dii oh ay, đom klôôy nưq, hnoq e vaarq adro achung muuyq chanưng, Muuyq adro hnoq biq xagook hooy, măn adro hơq hnoq jah xôq hlê. Hnoq e vaarq adro apeh va đom kung muuyq aduq. Muuyq adro hnoq biq xagook hooy, măn adro hơq hnoq jah xôq hlê.” [Vaarq adro pi gôk manay, muuyq adro hnoq biq xagook hooy, ji adro hơq hnoq jah xôq hlê] Ji tuôôy tơơl apok, oot đnooy dii Kadraq: “Lôôk lơơy, măn 'leq nưq?” Yôôch Kadraq dăt oot: “Xaak kaxêêt măn 'leq, xêêp aak kung hnoq tưưuq hlê ka đnư.”

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.