Kông-vuq 20

1Tuôôy nưq, tuôôy ka ajơ paloanq heq yôôch, Phao-lô ăm mơơy khơl xatyauq truh, yôôch atêq tuôôy ahmưk nhăk oot, đnooy apok xa ngaah, yôôch kơy vlôh hooy, hooy trôôk truh Ma-xê-đoan. 2Nưq yôôch, tuôôy heq hooy hlê kaluh dêh nưq ji ahmưk nhăk oot dii muuyq baai padoh yơơt, yôôch kơy hooy truh Hi Lap. 3Katuôôy, tuôôy măn đnư pe xiêk yôôch, vii xalih vlôh muuyq xôq vih ka kơy xing manih Jo Thaiq tuôôy xung hooy ge truh Si-ri, lunưq kơy heq ăm vlôh qwiet đinq wiit xuq tyauq ngưưr Ma-xê-đoan. 4Tuôôy nưq, hooy kung dii kơy e Sô-ba-tê, koot Bi-ru, manih Bê-rê; măn e A-ri-tak ji Sê-kun-đu manih Tê-sa-lô-ni-ka; Gai-ut, manih Đet-bơ; Ti-mô-thê; kung Ti-chi-kơ ji Trô-phim, manih A-si. 5Bơh vii heq hooy adroyq, oot đong kôô 'wot aduq Trô-ach. 6Măn 'wot, atêq kaluh hngơy Lêh Tôôp Leh Tape, heq vlôh hooy tahli xing theng Phi-lip, ji heq hooy truh đom dăp hngơy, 'wot heq truh kung oot aduq Trô-ach, laa aduq đơu 'wot măn hlê đnư đom pơh hngơy.

7Tuôôy nưq, muut hngơy thưq nhưk đom twuân, tuôôy 'wot tưưuq hlê dii mamuuyq xôq pleelh tôôp, Phao-lô đnooy athêêk dii khơl tuôq. Vii heq đinq dưk hooy hngơy atêq, lunưq kơy kưq măn đnooy đnoyq baai padoh dong truh katul mưng. 8Tuôôy nưq, e 'ngưng đeen đom kawah phong taalh ravaak, aduq đơu 'wot đong jah tưưuq hlê. 9Bơh, muuyq dro tadăp nưq, anơng Ơ-tich, tuôôy 'ngôôy aduq 'mok kaxôô, biq lahaay rakôôp vik tawol, đom tuôôy Phao-lô padoh xiik iaq đnoyq, vii biq lahaay rakôôp vik tawol, nhu nưq heq gưlh xing paak thưq pe pôôt ji kaxêêt tuôôy jah rôôk kah. 10Lunư, tuôôy heq hooy pôôt, Phao-lô kuu xăk tol nhu, yôôch kabiin xok nhu, kơy đnooy: “Te xôôl dôôl, vii varơuq riirh ku nhu đong măn đom nhu.” 11Atêq nưq, hooy wiit tok, pleelh tôôp ji xa waal, katuôôy athêêk đom muuyq kawah kawat dong truh rahưng xaroq, yôôch kưq đanưq, kơy dưk hooy. 12Măn khơl kadrơy xagook adro kanau măn riirh xuq ji jah hlơq hlôôp leh axit.

13Xatyauq nưq, tuôôy heq hooy adroyq truh aduq tau, 'wot jah jarooy truh A-sôt, laa aduq jưq đinq hnoq đoonq Phao-lô tok tau, vii kơy heq ralauq đanưq, tuôôy kadih kơy tyauq jưq đinq hooy bơơn trôôk vari. 14Yôôch tuôôy kơy heq tavơh 'wot aduq A-sôt, yôôych atêq tuôôy đoonq kơy tok tau, 'wot hooy truh Mi-ti-len. 15Ji tuôôy vlôh tahli xing aduq nưq, hngơy atêq 'wot hooy pôôt tahyioh Chi-ô, măn hngơy atêq nưq, 'wot truh duq Sa-môt, yôôch hngơy xatyauq nưq, 'wot heq hooy truh Mi-lê. 16Vii Phao-lô heq đinq hooy ge dalơh hlê Ê-phê-sô, xôq ka kơy klơlh pheq hlơơp kawat aduq A-si, vii kơy đong pơl wol xôq e mot aduq Jê-ru-sa-lem muut hngơy Lêh Nguh Twuân, atoh varơuq nưq laa ik đôôyq dii kơy.

17Nưq laa, xing Mi-lê, atêq tuôôy patăk manih truh Ê-phê-sô, kơy dăt taayh khơl kadraq lơơk ku tayuup vah truh. 18Ji yôôch, tuôôy oot heq truh kung kơy, yôôych kơy đnooy dii oot: “Kadih oh ay xet hlolh, xing hngơy kapa tep, laa xing tuôôy gô joaq jôôk truh A-si, gô heq măn kung dii oh ay dang đaleq tuôôt kawat nưq, 19tuôôy hơu varơuq Lôôk bơơn dêq hloay xuum apôôt xăk ji daak mot kung kaluh pơơl dal xalih vlôh ka gô xing kaluh xôq vih ku manih Jo Thaiq, 20đaleq gô heq be jư hlê varơuq kajoq, nưq laa kaluh varơuq e ich, đơu leh padoh taboon ka oh ay, gô kung heq pato dayq oh ay măn aduq karôp manih, ji aduq kaluh hnhư đêh, 21tuôôy dơơp xanưk ka dêq manih Jo Thaiq hloay Hi Lap truh varơuq wiit xuum wih truh Kơy Plêêk ji truh xuum tuôq aduq Lôôk haay, laa Lôôk Jê-xu. 22Juneq, xiin 'yo nee, gô đong tol trôôk hooy truh Jê-ru-sa-lem, vii heq chiuq Kơy Phool Hiel ahluk ahnen, 'miêh be xet kaluh kajoq hnoq xalih vlôh ka gô aduq nưq, 23đêh vlôh varơuq Lôôk Phool Hiel dơơp xanưk dii gô đom tôôy theng, dăt đaneq looy tooy ji pơơl dal đong takôô gô. 24Lunư, gô leh taboon apok leq ka xăk riirh gô laa quiq jaq đôôyq dii xăk, dơơp aleq dong payôôch varơuq charơơk ku gô ji varơuq dơơp đơu gô heq nhonq xok xing Lôôk Jê-xu, xôq dơơp xanưk ka Hêêl Kaxay jo vanong plêêk ku Kơy Plêêk. 25Juneq, xiin 'yo nee, gô xet đaneq dêq hloay oh ay, laa katul khơl manih đơu gô heq truh hlơq tuôôy padoh taboon truh Daak Plêêk, hnoq leh măn hloq mot gô đnoyq. 26Vii nưq, muut hngơy neng, gô dơơp xanưk kangưưr oh ay đaneq gô leh e kadrôôp truh vahaap ku dêq hloay oh ay. 27Vii gô be jư hlê muuyq varơuq kajoq khienq ka dêq hloay iq trôôch ku Kơy Plêêk leh đnooy vlôh ik aduq oh ay. 28Dayh jư 'yo kadih xăk ji hloay bing de đơu Lôôk Phool Hiel heq xôq oh ay dơơp manih jư 'yo xôq xakaq jarooy tayuup vah ku Kơy Plêêk, laa tayuup đơu Kadraq heq root bơơn vahaap ku kadih Kadraq. 29Gô xet đaneq atêq varơuq vlôh hooy ku gô, kaluh xo vari xơk tauq hnoq aluq alaq muut katul đom oh ay, leh biit angơuq bơy de. 30Pheq đnooy xing katul đom kadih oh ay hnoq dưk tok muuyq sôôq adro đnooy vlôh kaluh varơuq lưp troq xôq aluut jarooy 'ngưng khơl xatyauq tyauq oot. 31Lunưq, pheq rơơt rol, văch đaneq hngơy ji klôôy, đom tuôôt pe xanưm, gô leh padơy nhăk pato tôôy muuyq adro kung dii daak mot. 32Juneq, gô pahnăp oh ay ka Kơy Plêêk ji ka apok ku vanong plêêk Kadraq, laa varơuq e taay yaak xôq rôôk đơ oh ay ji kahniq ăm oh ay kơ ngiip katul đom dêq hloay khơl leq dong jah yuôôr vah. 33Gô be ham baak long vajang long qwuân aau ku kơyq. 34Kadih oh ay xet đaneq vaarq pla ti neq heq hơu varơuq ka tuôông duh ku gô ji ku khơl manih măn kung dii gô. 35Gô heq kahnoq ka oh ay đom dêq hloay tôôy varơuq đaneq duh pheq chiuq pơơl dơơp varơuq đanưq xôq waak rơy khơl leq ravoch paraat, katuôôy xôq văch kaluh apok ku Lôôk Jê-xu, vii kadih Kadraq heq pato: ‘Dik e vanong tuôôy kahniq ăm iaq laa tuôôy nhonq xok.’”

36Atêq tuôôy đnooy kaluh varơuq nưq, yôôych tuôôy heq kul takuul pôôt, kơy xadrook apôôy dii dêq hloay oot. 37Tuôôy nưq, varơuq nhim ook thier kôt xalih vlôh katul đom oot, ji tuôôy kabiin xok ranong Phao-lô yôôch, oot hiip kơy, 38vii hlu rơu nhưk laa apok kơy heq đnooy, đaneq oot xarôp leh măn tavơh mot kơy đnoyq. Atêq nưq, oot jarooy kơy pôôt tau.