Kông-vuq 21

1Tuôôy nưq, varơuq xalih vlôh tuôôy 'wot heq jah xagook vlôh tahli, nưq laa atêq tuôôy vlôh hooy klơlh oot, yôôych hooy hyioh, 'wot hooy truh Kôôt, yôôch truh hngơy atêq truh Rô-đơ, ji xing nưq truh Ba-ta-ra. 2Tuôôy heq axek jah muuyq poop tau hooy hlê truh Phê-ni-xi, yôôych pôôt tau nưq, 'wot jah xagook vlôh tahli. 3Tuôôy nưq, atêq tuôôy 'yo hloq ngok tahli Chip-rơ, yôôych valah hlê kơn keng ngok tahli, 'wot hooy ge truh Si-ri ji hooy aloh truh Ti-rơ, vii tau pheq tơq haang aduq nưq. 4Tuôôy nưq, atêq tuôôy axek jah khơl xatyauq, 'wot măn hlê đnư pơh hngơy, đơu oot, gamưh Kơy Phool Hiel ăm xet, kưq đnooy Phao-lô te hooy truh Jê-ru-sa-lem. 5Tuôôy nưq, varơuq xalih vlôh tuôôy 'wot heq payôôch taleq hngơy neq, nưq laa atêq tuôôy dưk hooy, 'wot kưq đnoyq dưk hooy, tuôôy dêq hloay oot raay raa hooy jarooy 'wot kung dii kadrê ji khơl koot, ka truh hloay pi gôk theng phôq, yôôch atêq tuôôy kul takuul pôôt tol gah tahli xadrook apôôy, 6yôôych 'wot athêêk dii mamuuyq ji tawaak tok tau, măn khơl manih nưq yôôych wiit xuq aduq oot, 7bơh 'wot, tuôôy heq payôôch kaluh hngơy hooy xing Ti-rơ, yôôych hooy pôôt truh Bê-tô-lê-mai, ji atêq tuôôy vôôch hlơq khơl oh ay, 'wot măn hlê dii oot muuyq hngơy. 8Yôôch hngơy atêq, atêq tuôôy dưk hooy, 'wot hooy truh Sê-sa-rê ji, tuôôy heq muut đom hnhư ku Phi-lip, hnhư padoh taboon Hêêl Kaxay, laa muuyq đom pơh châp sưq, 'wot măn hlê dii kơy. 9Tuôôy nưq, Kơy e poot dro koot kadrê măn tadăp đnooy hlit. 10Yôôch đom 'ngưng hngơy tuôôy 'wot măn hlê đnư, muuyq hnhư hlit nưq, anơng A-ga-but, heq hooy aloh xing Ju-đê. 11Atêq tuôôy truh tavơh 'wot ji xok talơy hnek katêêk ku Phao-lô, yôôch vek jôôk ti ku kơy hlê, kơy đnooy: “Kơy Phool Hiel xanoh kaluh varơuq neq: ‘Tyauq kach neq, manih Jo Thaiq aduq Jê-ru-sa-lem hnoq vek manih khơl kanau, đơu manih nưq e talơy hnek katêêk neq, ji oot hnoq noop adro nưq muut ti tamooy daak kadrơy.’” 12Nưq laa, tuôôy 'wot tameng taleq apok nưq, dêq 'wot hloay khơl manih ka daak dêh raay adô adeng kơy te hooy truh Jê-ru-sa-lem. 13Xatyauq nưq, Phao-lô tơơl hlê: “Oh ay đong dơơp kajoq nưq, nhim ook ji khienq xuum gô jiq jiêh long aleq? Bơyh gô e varơuq e 'miêh xuum, leh vơ xôq biq vek, đơu măn chiuq kaxêêt vii yal Lôôk Jê-xu aduq Jê-ru-sa-lem đnoyq.” 14Tuôôy nưq, kơy leh chiuq tameng, lunưq 'wot paq laayq đnooy nhăk, tơơl đaneq: “Apôôy iq Lôôk jah jêêk.”

15Tuôôy nưq, atêq kaluh hngơy nưq, tuôôy heq ralauq đôô đaak, 'wot hooy tok truh Jê-ru-sa-lem. 16Yôôch muuyq sôôq khơl xatyauq xing Sê-sa-rê kung hooy dii 'wot, jarooy 'wot truh aduq Ma-na-sôn, muuyq dro katu măn Chip-rơ, laa khơl xatyauq xing kapa tep, đơu măn aduq manih neq 'wot jah adoot waal.

17Tuôôy nưq, tuôôy 'wot heq truh aduq Jê-ru-sa-lem, khơl oh ay hlah hlaak vôôch hrok 'wot. 18Yôôch hngơy atêq, Phao-lô hooy dii 'wot truh tavơh Ja-kơ, katuôôy dêq hloay khơl draq lơơk raay e mot. 19Vôôch hlơq oot yôôch, kơy taboon hlê tyauq tưng varơuq tôôy varơuq đơu Kơy Plêêk heq dơơp katul khơl tamooy daak kadrơy gamưh khơl hơu varơuq ku kơy. 20Tuôôy nưq, atêq tuôôy tameng anưq, oot ayuôôt laat Kơy Plêêk, katuôôy oot đnooy dii kơy: “Dro oh ay, ay hloq nưq, e kahang waan manih heq tuôq katul đom tamooy Jo Thaiq ji oot raay e xuum talăng jăk truh ganuun. 21Bơh, oot heq jah tameng đnooy truh ay, đaneq ay pato dayq truh varơuq chuh ka'lăk klơlh ganuun Môi-se ka tôôy dro Jo Thaiq katul khơl tamooy kadrơy, tuôôy dăt khơl manih nưq te goch kađuh ka koot xau oot, kung te riirh tyauq kaluh dok dơơp. 22Nưq yôôych, pheq dơơp aleq? Chăk chănq oot hnoq tameng đaneq ay heq truh. 23Nưq dayh dơơp luneq, laa varơuq đơu 'wot đnooy dii ay. Poot dro đong măn dii 'wot, đong e aduq oot muuyq apok paleek. 24Atêq tuôôy jarooy khơl manih neq tyauq yôôych dayh chiuq pa xarêh 'moh kung dii oot, ji dayh bla jêêt ka oot, xôq oot hnoq jah kwoah akoq oot, yôôch tôôy dro hnoq xet đaneq kaluh varơuq oot heq jah tameng đnooy truh ay laa be hmưq e, wih hlê kadih xăk ay kung xa măn jơq troq, tuôôy tameng jư ganuun. 25Măn truh khơl manih daak kadrơy heq tuôq, 'wot heq atăq thư, valơk hlolh pheq jư xăk klơlh tuôông đơơp đok dang vangưl, vahaap, kaluh ôô kaxêêt phoch, ji varơuq apuq atrăp.” 26Nưq yôôch, hngơy atêq, atêq tuôôy jarooy taleq dro nưq tyauq, tuôôy heq jah pa xarêh kung dii oot, yôôych phao-lô hooy muut đom hnhư hơu, xôq đnooy varơuq payôôch truh sôôq hngơy ku lêh pa xarêh, jauq truh tuôôy ku lêh jah tơơk tưp ka tôôy muuyq adro đom sôôq oot.

27Bơh tuôôy pơh hngơy jeq jah xaleep, taleq dro manih Jo Thaiq truh xing A-si, atêq tuôôy hloq Phao-lô đom hnhư hơu, heq ahluk ahlul dêq bing karôp ji vlôh ti tol kơy, 28laa tok: “Tôôy adro lơơy, manih I-sơ-ra-ên lơơy, xiin waak rơy! Neq laa dro pato tôôy adro loch aduq tachơơl hlê tamooy dêh, ganuun ji aduq neq. Katuôôy, ni pheq đnooy măn jarooy manih Hi Lap muut đom hnhư hơu ji dơơp klơơr 'yêq aduq vah neq.” 29Vii adroyq nưq, oot heq hloq Trô-phim, manih Ê-phê-sô, kung dii kơy đom theng, đơu oot biit đaneq Phao-lô heq jarooy ay neq muut hnhư hơu. 30Dêq theng vơơ biq ahluk, vơơ e muuyq bing tamooy karôp ka uun truh, yôôch atêq tuôôy rôp xok Phao-lô, oot heq hoot kơy vlôh pi gôk hnhư hơu, ji 'mok nhăp jah kađnoch hlê. 31Kung đom tuôôy raanq păk kaxêêt kơy, yôôych pahêêr lơy truh padrok xakaq bing kuun đaneq dêq theng Jê-ru-sa-lem đong biq lôônq xôônq, 32yôôych hloay jơnưq, atêq tuôôy jarooy tyauq bing kuun ji khơl padrok dưk ưk, kơy charơơk pôôt truh aduq manih karôp. Yôôch tuôôy khơl drơy 'yo hloq padrok xakaq kung bing kuun, oot paq laayq tiel đnayh Phao-lô. 33Đom tuôôy neq, tuôôy heq hooy hlê jeq, padrok xakaq ăm rôp jư kơy, đnooy dăt xôq kơy biq vek bơơn vaarq raq looy tooy, yôôch vôôch 'yo kơy laa kơyq ji kơy heq dơơp kajoq. 34Lunư, manih neq adro hơq đom bing karôp đong laa tarok muuyq varơuq đêh raa, măn padrok xakaq bing kuun, tuôôy leh e ka paraat axek vôôch jah varơuq kajoq chăk chănq vii xarooy tarok 'nhih paloanq, yôôych heq đnooy dăt xôq kơy jah jarooy xuq đôôn. 35Bơh tuôôy kơy hooy truh bơk katưlh, yôôych varơuq xalih vlôh ka kơy laa pheq jah bing kuun xakôôk hooy xing varơuq xơk tauq ku manih karôp. 36Vii muuyq bing manih thier karôp kưq hooy tyauq, laa tarok: “Păk kaxêêt ni yơu!”

37Katuôôy, tuôôy xarôp biq jarooy muut đôôn, Phao-lô đnooy dii padrok xakaq kuun: “E pheep ka gô đnooy taleq apok dii kơy be?” Yôôch padrok xakaq kuun đnooy: “Kơy xet apok Hi Lap ih? 38Nưq yôôych kơy leh aalq laa dro Ai Kâp, adro đơu adroyq kaluh hngơy neq heq paloanq ji jarooy poot ravơu ti păk kaxêêt muut wăngq we ih?” 39Yôôch Phao-lô tơơl: “Gô ji manih Jo Thaiq, katu măn theng Tat-sơ, dêh Si-li-si, muuyq adro manih ku theng phôq be aalq laa de kajoq. Lunưq gô xiin kơy ăm pheep gô đnooy athêêk dii manih karôp.” 40Nưq laa atêq tuôôy padrok xakaq kuun ăm pheep, tuôôy dưk tol bơk katưlh, Phao-lô vlôh hlêêl bơơn ti ka manih karôp. Tuôôy nưq, tuôôy heq hloq hnhep yôôch, kơy padoh đnooy bơơn apok Hê-bơ-rơ, đaneq: