Kông-vuq 19

1Tuôôy nưq, varơuq xalih vlôh đom tuôôy A-bô-lô măn aduq Kô-rinh-tô, yôôych Phao-lô, atêq tuôôy dalơh hlê kaluh dêh măn pi ataalh, kơy hooy pôôt truh Ê-phê-sô ji tavơh muuyq sôôq khơl xatyauq hơq. 2Katuôôy, kơy đnooy dii oot: “Tuôôy heq tuôq, oh ay e nhonq xok Kơy Phool Hiel long leh?” Bơh oot tơơl hlê kơy: “Lưp, pheq đnooy atoh e Kơy Phool Hiel, yôôych 'wot kung koq hmưq tameng truh.” 3Kơy kung đnooy: “Anưq yôôych, oh ay heq chiuq pheep Bap-tem leq?” Yôôch oot tơơl: “Pheep Bap-tem ku Jăng.” 4Nưq laa, Phao-lô đnooy: “Jăng dơơp pheep Bap-tem ka varơuq wiit xuum, tuôôy padoh ka manih karôp truh Kơy đong truh atêq kơy, xôq ka oot hnoq ik tuôq, nưq laa tuôq aduq Lôôk Jê-xu.” 5Ji yôôch, atêq tuôôy tameng anưq, oot chiuq pheep bap-tem đom yal Lôôk Jê-xu. 6Tuôôy Phao-lô xôq ti tol oot, yôôych Kơy Phool Hiel truh tol oot, katuôôy oot đnooy kaluh thưq apok đêh hloay đnooy hlit. 7Tuôôy nưq, oot e dêq hloay lakah kưl vaarq dro khơl kanau.

8Tuôôy nưq, atêq tuôôy hooy muut đom hnhư hơu, kơy kưq kôk kalh pato dayq đom pe xiêk, padoh hlolh ji xok jah xuum truh daak dêh ku Kơy Plêêk. 9Bơh tuôôy muuyq sôôq manih kưq đnoyq găk xuum ji leh tuôq, đnooy xơuq Đaauq kangưưr manih karôp, yôôych kơy heq aklah vlôh khơl xatyauq, chuh xangưưy klơlh oot, tôôy hngơy athêêk tajauq dii mamuuyq aduq hnhư hok Ti-ra-nu. 10Katuôôy, varơuq neq heq xalih vlôh đom vaarq xanưm, pheq đnooy dêq hloay khơl leq riirh aduq A-si raay tameng jah apok Lôôk, dêq manih Jo Thaiq hloay manih Hi Lap. 11Kơy Plêêk kung dưk dơơp kaluh pheep akêh kôt lơyq xing ti ku Phao-lô, 12truh nôôy pheq đnooy khanh long vaayh kahliik apiq aduq kađuh kơy jah xagook truh ka khơl leq tavơh bingq yôôych tâk bingq vlôh klơlh oot, kamuuych 'moh kung pheq kahluh vlôh. 13Tuôôy nưq, taleq thơy druyh kamuuych manih Jo Thaiq hooy kađneng kahơ kung raanq apôôy taayh yal Lôôk Jê-xu tol khơl adro biq garu xi nhôp, đaneq: “Gô dăt ka may bơyh yal Jê-xu đơu Phao-lô padoh pato,” 14(Tuôôy nưq, e pơh koot kanau ku kơy Sê-va hơq, muuyq thơy tơơk tưp kôt manih Jo Thaiq, đong dơơp varơuq neq.) 15Bơh tơơl hlê, garu xi đnooy dii oot, đaneq: “Gô nhonq xet Jê-xu, gô kung xet Phao-lô, bơh êêp laa kơyq?” 16Yôôch adro đơu garu xi đong nhôp muut, atêq tuôôy talong kathôp muut oot yôôych katơq dêq kaah bing, ni hmơt qwayq tachơơl hlê oot, pheq đnooy tachiah kachek laa lôk ji xưr xôôh, pheq xadăk klôônq klơlh hnhư nưq. 17Tuôôy nưq, varơuq nưq vlôh jêêk varơuq taboon văch xet ka dêq hloay khơl leq riirh aduq Ê-phê-sô, dêq manih Jo Thaiq hloay manih Hi Lap. Varơuq yôq varaal apôôt tol dêq hloay oot, ji yal Lôôk Jê-xu jah vado. 18'Ngưng adro đom sôôq khơl manih heq tuôq kung truh, xưng nhonq ji đnooy tauq kaluh varơuq dơơp ku oot. 19Katuôôy, 'ngưng dro dơơp ngê thơy pajơơu, atêq tuôôy anguk rahlăp jơyq ku oot hlê, heq vuh kangưưr tôôy adro. Khơl drơy jauq jaq triq ku kaluh nưq, ji oot nhonq hloq laa dăp waan đông baak. 20Nưq atoh, vii taay yaak, apok Lôôk ranưh vlôh athêêp ji kajưk kalh.

21Tuôôy nưq, hloay tuôôy kaluh varơuq neq jah payôôch, Phao-lô heq đinq đom Kơy Phool Hiel, dalơh pangach hlê Ma-xê-đoan ji A-chai, xôq hooy xuq Jê-ru-sa-lem, tuôôy đnooy đaneq: “Atêq tuôôy gô heq truh aduq nưq, yôôych gô kung duh pheq hooy hlơq Rô-ma đnoyq.” 22Nưq yôôch, atêq tuôôy patăk hooy vaarq đom sôôq khơl dro waak varơuq kơy, laa Ti-mô-thê ji Ê-rat, truh Ma-xê-đoan, yôôych kadih kơy heq măn ka A-si athêêp muuyq kawat.

23Bơh muut kawah kawat nưq, muuyq varơuq paloanq leh de heq xalih vlôh tajinq truh Đaauq. 24Vii muuyq ti thơq baak nưq, anơng Đê-mê-triu, ragơy dơơp vangưl mo yaak At-tê-mit bơơn baak, heq taway hlê leh axit lơơy tabôôt tek ka khơl thơq dơơp bơơn ti, 25đơu dro nưq, atêq tuôôy anguk tưưuq khơl adro thơq đom varơuq neq hlê, heq đnooy: “Wơơy tôôy adro, oh ay xet đaneq varơuq karoh e ku haay laa vlôh xing varơuq dơơp tabôôt tek neq. 26Oh ay kung hloq ji tameng đaneq leh vơ aduq Ê-phê-sô, bơh dang đaji loch dêq A-si, anơng Phao-lô neq, atêq tuôôy xok jah xuum, heq khienq muuyq sôôq karôp manih dêh wiit xuum, vii đnooy đaneq kaluh tuôông dơơp vlôh xing ti khơl drơy be aalq laa yaak vah kajoq dêq. 27Nưq bơh, varơuq neq leh vơ laa varơuq naap joa jarooy truh apok leh tolh đôôyq dii ngê dơơp ku haay, đơu pheq đnooy đôôyq dii hnhư đơơp mo yaak At-tê-mit kôt lơyq tuôôy be jah 'yo vlôh kajoq. Katuôôy, varơuq tađnah tađnaak ku mo yaak đơu loch A-si, truh hloay dêh araak kuh kul, dong dik jeq biq pahyaak ka'lăk.” 28Tuôôy nưq, atêq tuôôy tameng anưq yôôych vơơ hloay thier ra tôq jaraq, oot pariau tok đaneq: “Kôt lơyq hloay mo yaak At-tê-mit ku manih Ê-phê-sô!” 29Yôôch dêq theng biq galaay ngôp varơuq rađiik miik nưq, ji manih dêh ka uun mamuuyq ka uua truh raap kacheeu, rôp tyauq Gai-ut ji A-ri-tak, manih Ma-xê-đoan, laa khơl 'wơyq kung hooy ku Phao-lô. 30Bơh tuôôy Phao-lô xung vlôh kahnoq katul manih karôp, yôôch khơl xatyauq leh xôq ka kơy dơơp anưq. 31Măn muuyq sôôq padrok dêh A-si laa khơl 'wơyq ku kơy, bơơn kach pahêêr truh kơy, kung heq đnooy nhăk kơy te kadih noop xăk muut raap kacheeu nưq. 32Nưq yôôch, manih hơq adro neq kưq alo tok muuyq kiêuh đêh ra, vii bing manih yôôych đong rađiik miik, ji 'ngưng sôôq be xet oot tagumq tưưuq hlê vii kakơq kajoq. 33Tuôôy nưq, taleq dro xing đom bing karôp taboon hêêl varơuq ka A-lek-xan-đơ, atêq tuôôy manih Jo Thaiq taluq kơy hooy tok pi adroyq, yôôch A-lek-xan-đơ, awaayh ti vlôh dơuq, đong xung đnooy hlolh dii manih karôp. 34Bơh tuôôy nhonq vlôh đaneq kơy neq laa manih Jo Thaiq, yôôych muuyq hnưm ahlôôk laa kôt xing dêq hloay bing oot heq xalih vlôh đom tuôôt vaarq wat: “Kôt lơyq hloay mo yaak At-tê-mit ku manih Ê-phê-sô.” 35Lunư, tuôôy dro thư kiq theng heq khienq manih karôp langưưp xuum hlê, kơy đnooy:

“Wơơy oh ay, khơl manih tamooy Ê-phê-sô, dik e adro leq đơu be xet đaneq theng Ê-phê-sô laa manih jư hnhư hơu ku mo yaak At-tê-mit kôt lơyq ji vangưl yaak xing plêêk klêh pôôt? 36Nưq yôôych, vii kaluh varơuq neq laa leh ik chôôyq takaay ik, lunưq varơuq duh dik ka oh ay laa pheq jư langưưp xuum ji leh dơơp varơuq kajoq pơl wol. 37Vii oh ay heq jarooy khơl manih neq truh, đơu oot be aalq laa dro atôk hnhư hơu, kung leh aalq laa dro đnooy ra ơơh mo yaak ku haay. 38Lunưq, atoh Đê-mê-triu ji khơl thơq dơơp dii ti kung dii kơy nưq e apok rôp kadrôôp kơyq, yôôych kaluh aduq xưh xadrah măn đong jah luh 'mok, ji kung e khơl padrok ưk dêh; dayh xôq oot rôp xadrah mamuuyq. 39Măn atoh oh ay đong xung vôôch kajoq truh kaluh varơuq kadrơy, yôôych ni hnoq jah xưh xadrah đom tayuup karôp tyauq heq đinq. 40Vii dik, haay hnoq ik biq rôp kadrôôp paloanq apiq truh dong varơuq hngơy neng, tuôôy leh e kakơq kajoq, đơu vii kơq nưq, haay hnoq be ik ăm vlôh apok đnooy hlê ka varơuq tưưuq anguk dơơp lôônq xôônq neq.” 41Atêq tuôôy đnooy đanưq, kơy ăm padơy bing karôp tưưuq anguk nưq.