Kông-vuq 18

1Atêq kaluh varơuq nưq, tuôôy xarôp hooy xing A-thên, kơy hooy truh Kô-rinh-tô. 2Yôôch tuôôy heq tavơh muuyq dro Jo Thaiq nưq, anơng A-qui-la, dêh katu aduq dêh Bông, đơơu truh xing I-ta-li kung Bê-rit-sin, kadrê kơy, vii Kơ-lôt heq vlôh tanưưl ka dêq hloay manih Jo Thaiq pheq chuh klơlh Rô-ma, yôôych kơy truh hlơq oot, 3đơu vii e kung ngê, kơy heq măn ji dơơp varơuq kung dii oot, vii oot raay laa khơl thơq axit pơ raap 'yo tyauq ngê dơơp. 4Tuôôy nưq, kưq tôôy hngơy Sa-bat, kơy padoh taboon đom hnhư hơu, kơy xok jah xuum dêq manih Jo Thaiq hloay manih Hi Lap. 5Bơh tuôôy kaah Si-la ji Ti-mô-thê heq hooy pôôt xing Ma-xê-đoan, yôôych Phao-lô jah dêq hloay xuum padoh taboon ka đaauq, dêq xuum dơơp xanưk ka manih Jo Thaiq truh Lôôk Jê-xu laa Lôôk Wơơt Dêh. 6Lunư, tuôôy oot tachơơl hlê ji đnooy ra ơơh kơy, yôôych atêq tuôôy aruh aau, kơy đnooy dii oot: “Apôôy vahaap êêp kơy kahrôq tol akoq êêp kơy! Măn gô lưp e kadrôôp! Jauq xing juneq, gô hnoq truh dii kaluh tamooy daak kadrơy.” 7Tuôôy heq chuh klơlh đnư, kơy hooy truh hnhư muuyq dro kuh kul Kơy Plêêk nưq, anơng Ti-ti-u Juk-tu, đơu hnhư dro neq măn pi gah hnhư hơu. 8Long anưq, Kơ-rit-bu, dro jư 'yo hnhư hơu, heq tuôq Lôôk, kung tôôy dro đom hnhư kơy, ji 'ngưng manih Kô-rinh-tô, atêq tuôôy tameng đaauq, yôôych tuôq ji chiuq Bap-tem. 9Tuôôy nưq, Lôôk xanoh dii Phao-lô gamưh muuyq varơuq ăm xet adroyq đom klôôy: “Te yôq, wih hlê, dayh đnooy đnoyq, ji be duh niinq hnhep kajoq. 10Vii Gô măn kung koot ji be kơyq hnoq đuk ti tol koot xôq dơơp ra ơơh koot, vii e 'ngưng dro deng ka Gô đom theng neq.” 11Nưq laa, kơy măn hlê muuyq xanưm drơu xiêk, pato apok ku Kơy Plêêk katul đom oot.

12Bơh tuôôy Ga-li-ôn dơơp padrok kôt dêh A-chai, yôôych manih Jo Thaiq anguk mamuuyq dưk tok tachơơl hlê Phao-lô ji jarooy kơy vlôh xadrah, 13tơơl đaneq: “Adro neq ahluk manih karôp ayuôôt laat Kơy Plêêk be troq ganuun.” 14Bơh tuôôy Phao-lô xung hah huuy, Ga-li-ôn heq đnooy dii manih Jo Thaiq: “Wơơy lơơy, taleq kơy Jo Thaiq hơq, atoh neq dik laa kaluh varơuq dơơp leh troq ganuun long varơuq dơơp lưp troq xơk aak, yôôych gamưh tyauq dong varơuq nưq, nưq yôôych gô heq atuq xuum dii êêp kơy, 15măn atoh neq laa kaluh takaay truh apok xarooy, yal taayh ji ganuun đêh ku êêp kơy, yôôych êêp kơy kadih êêp 'yo ralauq. Gô leh trôôch dơơp padrok xadrah ka taleq kaluh varơuq đaneq.” 16Yôôch kơy đuôôy oot vlôh klơlh hnhư xadrah. 17Atoh bơh, atêq tuôôy rôp Sôt-then, adro jư 'yo hnhư hơu, dêq hloay bing oot tu tiel kơy kangưưr hnhư xadrah, đơu be varơuq leq đom sôôq nưq laa đangq tabông truh đôôyq dii Ga-li-ôn.

18Măn Phao-lô, ka truh ajơ neq hloay đong măn athêêp 'ngưng hngơy, yôôch vlôh hooy xing khơl oh ay, kơy hooy ge truh Si-ri, kung dii kơy laa Bê-rit-sin ji A-qui-la, atêq tuôôy heq kadih kwoah akoq kơy aduq Sen-kơ-rê, vii kơy heq e apok paleek apôôy. 19Tuôôy nưq, oot hooy pôôt truh Ê-phê-sô, ji kơy xôq oot măn hlê đnư, măn kadih kơy, tuôôy heq hooy muut đom hnhư hơu, kơy tagêh dii manih Jo Thaiq. 20Bơh tuôôy oot dăt kơy măn hlê athêêp muuyq kawat đnoyq, yôôych kơy leh ưng anưq. 21Lunư, atêq tuôôy vlôh hooy xing oot ji đnooy: “Gô hnoq wiit hlê dii oh ay yưk tra atoh Kơy Plêêk trôôch,” yôôych kơy pôôt ge chuh klơlh Ê-phê-sô.

22Ji tuôôy heq tok gah aduq Sê-sa-rê, yôôch hooy tok ji vôôch hlơq tayuup vah, yôôych kơy hooy pôôt truh An-ti-ôt. 23Atêq tuôôy dalơh hlê muuyq kawah kawat, kơy dưk hooy, pa xarôp hooy hlê kaluh dêh Ga-la-ti ji Phi-ri-gi, dơơp ka dêq hloay khơl xatyauq kajưk kalh.

24Tuôôy nưq, muuyq dro Jo Thaiq nưq, anơng A-bô-lô, dêh katu aduq A-lek-xan-đơ-ri-a, muuyq dro e taay xa athêêk, heq hooy pôôt truh Ê-phê-sô, tuôôy laa muuyq dro hlolh xet truh Rahlăp Vah. 25Kơy 'miêh heq jah pato dayq truh apok Lôôk, ji vii xuum klaak talăng jăk, kơy padoh ji pato klip kaluh varơuq apiq truh Lôôk Jê-xu, tuôôy vơ xet pheep Bap-tem ku Jăng đơu heq. 26Katuôôy, kơy pa xarôp đnooy kach kôk kalh đom hnhư hơu, bơh atêq tuôôy tameng kơy, Bê-rit-sin ji A-qui-la heq jarooy kơy xuq ji padoh hlolh ka kơy muuyq kach troq dik iaq truh đaauq ku Kơy Plêêk. 27Tuôôy nưq, vii kơy xung trôôch luh ranưh hlê A-chai, lunưq atêq tuôôy ahmưk nhăk kơy, khơl oh ay valơk thư atăq hlê khơl xatyauq xôq đoonq tiip kơy, đơu atêq tuôôy truh aduq, kơy heq waak thier 'ngưng ka khơl leq heq tuôq gamưh vanong plêêk. 28Vii kơy kahnoq vlôh aklơ hlê manih Jo Thaiq muuyq kach kalh paraat, tuôôy gamưh tol Rahlăp Vah pato vlôh Lôôk Jê-xu laa Lôôk Wơơt Dêh.