Kông-vuq 17

1Tuôôy nưq, atêq tuôôy dalơh hlê Am-phi-bô-lit ji A-bô-lô-ni, oot hooy truh Tê-sa-lô-ni-ka, aduq e muuyq hnhư hơu ku manih Jo Thaiq. 2Yôôch tyauq katik ku Phao-lô, kơy muut jưq dii oot, ji đom pe hngơy Sa-bat, kơy padoh hlolh dii oot gamưh tol Rahlăp Vah, 3Tuôôy padoh hlolh đu dêq ji ăm hloq đaneq Lôôk Wơơt Dêh duh pheq chiuq jiq jiêh ji riirh hlê xing aduq kaxêêt đaneq: “Lôôk Jê-xu neq, Kơy đơu gô đnooy vlôh ka oh ay, Jơq laa Lôôk Wơơt Dêh.” 4Taleq dro đom khơl oot jah xok xuum ji anguk hlê tyauq Phao-lô kung Si-la, dêq hloay muuyq sôôq karôp manih Hi Lap kuh kul Kơy Plêêk, hloay leh axit khơl mư kadrê karoh e. 5Lunư, vii khơl manih Jo Thaiq e xuum 'yarơ, lunưq tuôôy heq tawooyh taayh taleq dro xơk tauq nưq aduq trôôk kôt, tưưuq anguk muuyq bing karôp manih dêh, oot dơơp xalôônq xalaaoq theng neq. Atêq tuôôy kathôp muut hnhư Ja-sôn, oot axek akhiim vaarq dro xôq jarooy vlôh kangưưr manih dêh. 6Bơh tuôôy leh axek hloq baarq kơy, oot ahoot Ja-sôn kung taleq oh ay hơq vlôh kangưưr khơl padrok theng phôq, pariau tok đaneq: “Taleq dro dơơp lôônq xôônq dêh araak neq, oot kung đong e mot ka đnen, 7laa taleq dro đơu Ja-sôn ji dêq hloay bing neq heq tiip đoonq. Oot đong dưk dơơp tachơơl hlê kaluh ganuun ku Sê-sa, tuôôy đnooy e muuyq vuua kadrơy, laa Jê-xu.” 8Nưq laa, bing oot dơơp ka bing karôp manih karôp ji khơl padrok theng phôq xalôônq xalaaoq tuôôy tameng taleq apok nưq. 9Yôôch atêq tuôôy nhonq jêêt baoh leng xing Ja-sôn ji khơl dro măn hlê, khơl padrok kôt tha ka oot hooy.

10Bơh yôôch, hloay jơnưq muut ka klôôy, khơl oh ay jarooy hloay Phao-lô kung Si-la hooy truh Bê-rê, đơu vaarq dro neq, tuôôy truh aduq, yôôych hooy muut hnhư hơu ku manih Jo Thaiq. 11Tuôôy nưq, khơl manih măn đnen yôôch hok xet iaq khơl manih măn Tê-sa-lô-ni-ka, oot heq nhonq xok apok dii dêq hloay xuum, tuôôy tôôy hngơy lăk 'yo Rahlăp vah, 'yo kaluh varơuq nưq e jơq đanưq long leh. 12Lunưq, 'ngưng dro đom sôôq oot heq tuôq, jauq hloay muuyq sôôq mư kadrê Hi Lap thuôk khơl karoh e ji leh axit khơl kanau. 13Bơh tuôôy manih Jo Thaiq aduq Tê-sa-lô-ni-ka xet đaneq apok ku Kơy Plêêk kung đong jah padoh taboon xing Phao-lô aduq Bê-rê, yôôych oot kung truh aduq neq, ahluk ji dơơp xalôônq xalaaoq manih karôp. 14Nưq laa, muut ajơ nưq, khơl oh ay hloay jơnưq jarooy Phao-lô hooy vlôh aduq truh dêh tahli, đom tuôôy baarq kơy Si-la ji Ti-mô-thê yôôych đong măn ka đnư. 15Măn khơl manih jarooy trôôk Phao-lô heq jarooy kơy truh ka A-thên yôôch atêq tuôôy nhonq apok patăk atăq ka Si-la ji Ti-mô-thê đaneq vaarq dro pheq truh kung kơy kang meel kang tolh, yôôych oot wiit hlê xuq.

16Tuôôy nưq aduq A-thên, đom tuôôy Phao-lô takôô oot, xuum klaak kơy biq tôq jaraq xing pi'lăp xăk, tuôôy hloq theng neq e viik galaay dang vangưl. 17Anưq laa kơy tagêh apok đom hnhư tagumq dii manih Jo Thaiq ji khơl dro kuh kul Kơy Plêêk, kung dii khơl dro e ka kawah tavơh muut tôôy hngơy aduq tabôôt. 18Bơh muuyq sôôq manih thuôk bing khơl thơy pato bing Khwoayq Laak ji bing Khăk kih kung tagêh apok dii kơy. Muuyq sôôq đnooy: “Kadra 'ngưng apok neq xung đnooy kajoq neq?” Măn sôôq kadrơy yôôych đnooy: “Dang đaji kơy neq laa dro padoh taboon truh taleq yaak daak kadrơy,” vii kơy đong padoh taboon Hêêl Kaxay truh Lôôk Jê-xu ji varơuq riirh hlê. 19Katuôôy, atêq tuôôy jư kơy hlê, oot jarooy truh Manih karôp A-rê-ô-ba, đnooy đaneq: “'Wot hnoq ik xet varơuq đơơu neq, pato dayq đong jah kơy pato, laa kajoq be? 20Vii kơy xagook truh toleq varơuq akêh tôôr 'wot. Lunưq 'wot xung xet kaluh varơuq nưq e iq laa kajoq.” 21(Tuôôy nưq, dêq hloay manih A-thên ji khơl tamooy riirh aduq nưq raay leh deng varơuq trôôch muut varơuq kajoq đêh iaq laa taboon varơuq long tameng varơuq đơơu akêh.)

22Nưq yôôch, tuôôy jah dưk măn katul Tayuup karôp A-rê-ô-ba, Phao-lô đnooy vlôh:

“Wơơy oh ay laa manih A-thên, gô hloq oh ay thier trôôch đaauq tyauq đu kach đaleq. 23Vii tuôôy hooy adaauq ji tabông truh khơl adro kuh ayuôôt ku oh ay, gô pheq đnooy hloq muuyq para hơu đơu tol nưq jah akleh chư: ‘Kuh Yaak Leh Xet.’ Anưq, yaak đơu oh ay akuh tuôôy be xet, nưq laa Kơy gô đong padoh taboon ka oh ay. 24Kơy Plêêk, kơy Yaak heq pajêêk panưk dêh araak ji tôôy paroh đom nưq, laa Lôôk ku plêêk ji vari, Kadraq leh riirh đom kaluh hnhư hơu jo ti koot manih xơy panưk. 25Kadraq kung leh jah hơu varơuq xing pla ti koot manih đaji Kadraq duh muuyq varơuq kajoq, vii kadih Kadraq kahniq ăm tôôy paroh varơuq riirh, hoot heet kung tôôy thưq kadrơy. 26Katuôôy, xing muuyq dro, Kadraq heq dơơp vlôh tôôy adrơơk tamooy koot manih riirh loch dêq tol raak vari, atêq tuôôy plah vlôh kaluh muua đinq adroyq ji akăk dêh aduq riirh măn ku oot, 27xôq ka axek akhiim Kơy Plêêk, xôq yôôch xet 'leq chiq axit yôôych oot hnoq ik jo jâmh jah Kadraq yôôch axek hloq Kadraq, tabơh long Kadraq dong dik be măn xangưưy dii tôôy muuyq dro đom haay. 28Vii đom Kadraq, haay riirh, axe ji măn hlê, kung đaji taleq dro đom khơl thi sih oh ay heq đnooy, đaneq: ‘Vii haay kung laa koot xau ku Kadraq.’ 29Anưq, vii laa koot xau ku Kơy Plêêk, haay leh duh biit đaneq Kơy Thiêêng Liêng yôôych dang đaji kaluh dang vangưl bơơn vajang, long baak, long phơu xing taay kheoq ji akoq biit ku koot manih. 30Lunưq, tuôôy Kơy Plêêk heq ka'lăk tuôôy đơơy thiuq hlolh xet nưq, juneq Kadraq dăt ka koot manih, tôôy dro loch tôôy aduq, pheq wiit xuum, 31Vii Kadraq heq lăp xôq muuyq hngơy, đơu muut hngơy nưq Kadraq hnoq đnooy xadrah dêh araak đom varơuq hyioh jăk xing Manih đơu Kadraq heq đinq, tuôôy heq ăm 'yo xanưk chăk chănq ka tôôy dro bơơn kach khienq Manih nưq riirh hlê xing aduq kaxêêt.”

32Tuôôy nưq, tuôôy tameng truh varơuq riirh hlê ku manih kaxêêt, muuyq sôôq tache kơy; bơh sôôq kadrơy yôôych đnooy: “'Wot kung hnoq tameng kơy truh varơuq neq yưk tra.” 33Vii anưq, Phao-lô chuh klơlh katul đom oot. 34Bơh taleq dro nưq heq tagu tyauq kơy yôôych tuôq, đom sôôq nưq đơu vơ e Đi-ô-ni-xi-ut, muuyq dro tayuup karôp A-rê-ô-ba, muuyq mư kadrê anơng Đa-ma-ri, ji khơl dro kadrơy kung dii oot.