Kông-vuq 16

1Tuôôy nưq, kơy kung hooy pôôt truh Đet-bơ yôôch truh Lit-trơ, ji 'yo hơq, aduq nưq e muuyq khơl xatyauq hơq anơng Ti-mô-thê, koot kanau ku muuyq mư kadrê Jo Thaiq tuôq kuh, bơh vaq laa manih Hi Lap, 2đơu nhu nưq jah xanưk tolh xing khơl oh ay aduq Lit-trơ ji I-kô-ni. 3Phao-lô xung nhu neq vlôh hooy dii kơy, lunưq atêq tuôôy nhonq nhu, kơy dơơp pheep goch kađuh ka nhu, vii it lơơy ku manih Jo Thaiq đong măn đnư kaluh aduq nưq, vii oot raay xet đaneq vaq ku nhu laa manih Hi Lap. 4Tuôôy nưq, tuôôy oot hooy trôôk hlê kaluh theng, oot đnooy hlê ka khơl tuôq pheq jư kaluh ganuun heq jah đinq xing khơl jah rơơlh ji khơl kadraq lơơk aduq Jê-ru-sa-lem. 5Anưq, kaluh tayuup vah jah kalh paraat đom xuum tuôq ji tôôy hngơy raay jah athêêp tok sôôq manih.

6Tuôôy nưq, oot hooy dalơh hlê kaluh dêh thuôk Phi-ri-gi ji Ga-la-ti, vii heq biq Lôôk Phool Hiel klơl jư padoh apok Lôôk đom dêh A-si. 7Atêq nưq, tuôôy heq truh jeq Mi-si-a, oot raanq hooy muut Bi-thi-ni, đơu Kơy Phool Hiel ku Lôôk Jê-xu kung leh ăm pheep oot. 8Nưq laa, ka'lăk hlê Mi-si-a, oot hooy pôôt truh Trô-ach. 9Muuyq varơuq ăm xet adroyq rama vlôh dii Phao-lô đom klôôy: muuyq dro Ma-xê-đoan nưq đong dưk ji taayh kơy, đaneq: “Atêq tuôôy dalơh hlê truh Ma-xê-đoan, xiin dayh waak 'wot.” 10Nưq laa, hloay tuôôy kơy heq hloq varơuq ăm xet adroyq nưq, 'wot vơơ hloay axek kach hooy truh Ma-xê-đoan, vii tuôq kajưk đaneq Kơy Plêêk heq tawooyh taayh 'wot padoh taboon Hêêl Kaxay ka oot.

11Jo nưq, tuôôy heq pôôt ge xing Trô-ach, 'wot hooy hyioh truh Sa-mô-tra-xơ, yôôch hngơy atêq truh Nê-a-bô-li, 12xing nư, truh Phi-lip, đơu neq laa theng phôq duh dik nhưk đom dêh Ma-xê-đoan, muuyq dêh vari ku La Mah, yôôch 'wot kưq măn aduq theng phôq neq taleq hngơy. 13Katuôôy, muut hngơy Sa-bat, 'wot vlôh pi gôk 'mok theng, pi gah tavook daak, aduq đơu 'wot biit laa aduq xadrook apôôy. Yôôch atêq tuôôy 'ngôôy pôôt, 'wot tajauq athêêk dii khơl mư kadrê đong tưưuq hlê aduq đnư. 14Muuyq mư kadrê nưq anơng Li-đi, laa dro tabôôt tek vaayh tôô xing theng Thi-a-ti-rơ, vii e xuum kul yôq Kơy Plêêk, đong chiuq tameng, laa dro đơu Lôôk heq luh xuum xôq tabông truh kaluh kajoq đong jah đnooy xing Phao-lô. 15Tuôôy nưq, hloay tuôôy mư heq chiuq Bap-tem kung dêq hnhư mư, mư xiin 'wot, đaneq: “Atoh êêp kơy xet hloq gô laa muuyq xuum dii Lôôk, yôôych xiin dayh măn hlê, muut đom hnhư gô.” Mư ahluk ahnek 'wot. 16Xatyauq nưq, varơuq xalih vlôh tuôôy 'wot đong hooy trôôk truh aduq xadrook apôôy, muuyq mư kadrê xapok nưq đong biq kamuuych Phi-tôn nhôp, tavơh 'wot, đơu mư nưq 'miêh đong dơơp lơơy thier 'ngưng ka kôôch ni bơơn kach xada ti. 17Tuôôy hooy tyauq atêq Phao-lô ji 'wot, mư nưq laa tok đaneq: “Khơl manih neq laa khơl xapok ku Kơy Plêêk Thier Yơơt, đơu oot đong đnooy vlôh ka oh ay trôôk wơơt xok.” 18Tuôôy nưq, mư nưq dơơp đanưq đom 'ngưng hngơy. Bơh vii biq dơơp ngơyq 'ngưng, lunưq tuôôy wiit hlê dii kamuuych nưq, Phao-lô dăt: “Đom yal Lôôk Wơơt Dêh Jê-xu, gô dăt ka may hooy vlôh klơlh mư kadrê neq.” Yôôch ni kahluh vlôh kung ajơ nưq.

19Bơh tuôôy khơl manih kôôch ku mư nưq hloq đaneq ka tuôôy tabôôt ku ni heq hlơơp, yôôych atêq tuôôy rôp xok Phao-lô ji Si-la, oot ahoot vaarq dro truh duq dêh tabôôt truh aduq kaluh khơl dơơp padrok. 20Tuôôy xagook vaarq dro truh kangưưr khơl padrok yôôch, oot đnooy: “Taleq dro neq đong dơơp xalôônq xalaaoq theng haay, vii laa tamooy Jo Thaiq, 21lunưq oot đong padoh taboon kaluh dok dơơp đơu leh e pheep ka haay 'yo nhonq long dưk dơơp, vii laa tamooy La Mah.” 22Yôôch bing karôp kung dưk tok tachơơl hlê vaarq dro, lunưq atêq tuôôy ăm chieh aau oot vlôh, khơl padrok patăk dăt tiel oot bơơn rooy. 23Katuôôy, tuôôy heq hmơt dook vaarq dro 'ngưng yôôch, bing oot xagook vaarq dro muut tu, dăt ka dro kuun 'yo jư oot dong rơơt rol, 24đơu adro padrok nưq, tuôôy heq nhonq patăk dăt đanưq, heq karuk oot muut tu 'lăp, ji kal jôôk oot muut vawauq. 25Long anưq, kawah katul klôôy, đong tuôôy xadrook apôôy, Phao-lô ji Si-la kacheeu baai vah ayuôôt laat Kơy Plêêk, măn khơl karuk kadrơy yôôych tameng oot. 26Tuôôy nưq, muuyq đơơt ahrưng vari kôt tưng hưng xalih vlôh, pheq đnooy kaluh kahnier hnhư tu biq anhưh anhưưy, yôôych dêq hloay kahlăk 'măk 'mok hloay jơnưq jah luh hwong, ji talơy looy tooy tôôy dro biq tahlok phuch. 27Nưq laa tuôôy adro 'yo hnhư karuk biq kadrăch kah, 'yo hloq kaluh 'mok hnhư karuk heq biq taluh hwong, lunưq hruut xieh ni vlôh, kơy nưq đinq kadih kaxêêt vii biit khơl biq karuk heq klôônq xadăk. 28Bơh Phao-lô taayh kalh apok, đaneq: “Te dơơp haiq xăk, vii dêq hloay 'wot đong măn kađnen.” 29Nưq laa, atêq tuôôy patăk xok đeen, kơy nưq charơơk pơl wol muut 'lăp, ji vii biq yôq varaal, kơy kul xăk pôôt ngưưr Phao-lô ji Si-la, 30yôôch atêq tuôôy jarooy oot vlôh pi gôk, kơy đnooy: “Wơơy êêp kơy, varơuq kajoq aduq gô băt dăt pheq duh dơơp,xôq ka gô hnoq ik jah wơơt?” 31Nưq laa, oot đnooy: “Dayh tuôq aduq Lôôk Jê-xu, yôôych kơy hnoq jah wơơt — kơy ji kôôch hnhư ku kơy.” 32Yôôch oot padoh apok Lôôk ka kơy kung dii dêq hloay khơl dro đom hnhư kơy. 33Ji muut wat nưq đom klôôy, atêq tuôôy jarooy oot hooy kung kơy, kơy 'nhaau xarêh ka oot aduq kaluh hlêêl xưr, yôôch kơy vơ chiuq bap-tem — kơy kung tôôy adro hnhư kơy. 34Katuôôy, tuôôy heq jarooy oot muut hnhư kơy, kơy doot garaak xa vlôh kangưưr oot ji dêq paraat hlah hlaak kung khơl adro đom hnhư, vii heq tuôq nhonq Kơy Plêêk.

35Tuôôy nưq, truh xaroq, khơl padrok patăk taleq dro kuun hooy, đnooy đaneq: “Dayh luh khơl manih nưq hooy.” 36Nưq laa, padrok 'yo tu taboon hlê kaluh apok nưq ka Phao-lô đaneq: “Khơl padrok heq patăk manih đnooy đaneq êêp kơy jah tha yôôch. Nưq juneq, atêq tuôôy hooy vlôh, apôôy baarq kơy hooy trôôk hrok hrol.” 37Bơh Phao-lô đnooy dii oot: “Atêq tuôôy ăm xet varơuq tiel đnayh 'wot, laa khơl manih pơq xok qwuyen koot manih La Mah, đơu leh xưh xadrah, oot heq qwel 'wot muut tu, yôôch juneq oot padu kadook xagook 'wot vlôh ư? Dik leh ik! Thay vii anưq, kadih oot, atêq tuôôy truh đnen, pheq jarooy 'wot vlôh.” 38Nưq laa, khơl dro kuun taboon hlê kaluh apok nưq ka khơl padrok kôt, yôôch bing oot varaal yôq tuôôy tameng đaneq vaarq dro laa koot manih La Mah. 39Tuôôy hooy truh yôôch, khơl padrok adô adeng oot ji atêq tuôôy jarooy vlôh pi gôk, khơl padrok xiin oot hooy xangưưy klơlh theng oot. 40Nưq laa, tuôôy heq vlôh klơlh tu, vaarq dro muut đom hnhư ku Li-đi. Ji atêq tuôôy tavơh khơl oh ay, vaarq dro ahmưk nhăk oot, yôôch dưk hooy.