Kông-vuq 15

1Yôôch, muuyq sôôq manih hơq hooy pôôt xing Ju-đê, pato khơl oh ay đaneq: “Atoh oh ay leh chiuq goch kađuh tyauq ganuun ku Môi-se, yôôych oh ay leh ik jah wơơt.” 2Nưq laa, atêq tuôôy xalih vlôh varơuq lưp tagu ji takaay tayaat leh de katul Phao-lô ji Ba-na-ba kung dii khơl dro hơq, lunưq khơl oh ay dăt Phao-lô ji Ba-na-ba kung muuyq sôôq manih kadrơy katul đom oot xôq hooy tok tavơh khơl jah rơơlh ji kadraq lơơk aduq Jê-ru-sa-lem truh tayaat neq. 3Anưq, khơl manih jah tayuup vah patăk hooy dalơh hlê kaah Phê-ni-xi hloay Sa-ma-ri, đnooy taboon hlolh varơuq wiit xuq tuôq đaauq ku khơl tamooy daak kadrơy, ji oot heq taway hlê hlah hlaak kôt ka dêq hloay khơl oh ay. 4Tuôôy nưq, tuôôy heq truh aduq Jê-ru-sa-lem, oot jah vôôch hrok xing tayuup vah, khơl jah rơơlh ji khơl kadraq lơơk, katuôôy oot padoh hlê xet taleq varơuq đơu Kơy Plêêk heq kung dơơp dii oot. 5Bơh taleq dro heq tuôq hơq thuôk bing Pha-ri-si dưk tok, đnooy đaneq: “Duh pheq dơơp pheep goch kađuh ka khơl dro nưq ji pato dayq oot pheq jư ganuun Môi-se.” 6Nưq laa, khơl jah rơơlh ji khơl kadraq lơơk tagumq hlê xôq 'yo hlê truh dong varơuq neq. 7Tuôôy nưq, atêq tuôôy 'ngưng tagêh xalih vlôh, Phi-e-rơ, dưk tok, đnooy dii oot:

“Wơơy oh ay, wơơy oh ay, oh ay raay xet đaneq xing kaluh hngơy patep katul đom oh ay, Kơy Plêêk heq rơơlh kaluh tamooy daak kadrơy gamưh hlê vel huuy gô xôq tameng đaauq Hêêl Kaxay ji tuôq. 8Kơy Plêêk, Kơy xet xuum klaak, heq dơơp xanưk ka oot, tuôôy kahniq Lôôk Phool Hiel ka oot, kung đaji ăm haay; 9ji Kadraq leh aklah đêh katul haay dii oot, tuôôy khienq xuum oot jah pa xarêh bơyh xuum tuôq. 10Nưq yôôych aleq juneq oh ay thưh Kơy Plêêk, tuôôy vâk muut ranong khơl jah rơơlh poop varaq đơu khơl mo kơy haay leh ik, ji haay kung leh e paraat xôq pơq? 11Wih hlê, haay tuôq xôq jah wơơt xing vanong plêêk ku Lôôk Jê-xu, đơu oot kung tyauq muuyq kach đanưq.”

12Tuôôy nưq, dêq manih karôp jư hnhep ji tameng Ba-na-ba ji Phao-lô taboon hlê xet taleq dơuq akêh ji varơuq akêh Kơy Plêêk heq dưk dơơp katul đom khơl tamooy daak kadrơy gamưh oot. 13Nưq yôôch, atêq tuôôy oot đnooy yôôch, Ja-kơ tơơl apok, đaneq: “Wơơy oh ay, wơơy oh ay, xiin dayh tameng gô. 14Si-môn heq pato vlôh đaleq Kơy Plêêk adroyq dik heq angơuq 'yo xôq xok vlôh xing kaluh tamooy daak kadrơy muuyq tamooy ka yal Kadraq. 15Varơuq neq kung tamuut dii taleq apok ku khơl hnhư hlit đaji heq jah valơk:

16‘Atêq kaluh varơuq nưq, Gô hnoq wiit hlê,

yôôch Gô hnoq panưk hlê raap ku Đa-vik, laa raap heq biq hrưp pôôt,

Gô hnoq panưk hlê kaluh thưq biq hrưp pôôt ku ni ji 'meq hlê ni,

17xôq ka phon măn hlê ku koot manih bơh dik hnoq ik axek akhiim Lôôk,

hloay kaah dêq hloay kaluh tamooy daak kadrơy, đơu tol kaluh tamooy nưq, yal Gô jah taayh apôôy măn aduq oot.

Lôôk xanoh anưq, tuôôy dưk dơơp kaluh varơuq neq, 18laa varơuq jah xet truh xing tuôôy hnu hmeq.’

19Vii nưq, gô 'yo hloq đaneq te dơơp xôôl dôôl ka khơl manih xing khơl tamooy daak kadrơy wiit hlê dii Kơy Plêêk, 20lunư, duh valơk thư pato dăt oot chuh xangưưy varơuq klơơr 'yêq ku dang vangưl, varơuq apuq atrăp, hlek ôq kaxêêt phoch ji vahaap. 21Vii xing kaluh tuôôy đơơy hnu hmeq, aduq tôôy theng, ganuun Môi-se măn ragơy e 'ngưng dro padoh taboon ganuun nưq, gamưh jah đok đom hnhư hơu muut tôôy hngơy Sa-bat.”

22Atêq nưq, khơl jah rơơlh ji khơl draq lơơk, kung hloay tayuup vah, hloq duh patăk khơl dro jah rơơlh katul đom oot hooy truh An-ti-ôt achung dii Phao-lô ji Ba-na-ba — e Ju-đa jah taayh laa Ba-sa-ba, ji Si-la, nưq laa khơl manih dơơp ưk đom khơl oh ay — 23tuôôy valơk thư xagook hooy gamưh ti oot: “Khơl jah rơơlh ji khơl kơy draq lơơk, khơl oh ay, atăq ka khơl tuôq Lôôk loch dêh An-ti-ôt, Si-ri ji Si-li-si, nưq laa ăm oh ay, khơl manih vlôh xing khơl tamooy daak kadrơy. Dong dik kuh hlơq! 24Vii tuôôy neq, 'wot heq tameng đaneq taleq dro nưq tuôôy hooy vlôh xing katul 'wot heq ahluk oh ay bơơn kaluh apok đnooy dơơp loanq xuum oh ay, đơu khơl manih nưq yôôych 'wot be ăm qwuyen kajoq, 25lunưq varơuq e veeh tolh dik ka 'wot laa atêq tuôôy heq muuyq xuum, rơơlh xok taleq dro, yôôych patăk oot hooy truh oh ay kung dii Ba-na-ba ji Phao-lô, vaarq oh ay xung xiaq ku haay, 26laa vaarq dro heq hôôk kaxêêt xăk riirh baarq vii yal Lôôk haay, laa Lôôk Wơơt Dêh Jê-xu. 27Jo nưq, 'wot heq dăt Ju-đa ji Si-la, laa khơl dro kung padoh taboon dong varơuq neq bơơn apok đnooy. 28Vii kajưk đaneq Lôôk Phool Hiel ji 'wot heq hloq be e athêêp varơuq kajoq jah xôq dơơp pơq parêq tol oh ay đêh vlôh kaluh varơuq duh dik atêq neq: 29pheq chuh xangưưy kaluh thưq đơơp ka dang vangưl, vahaap, kaluh ôô kaxêêt phoch, ji varơuq apuq atrăp, oh ay hnoq dơơp tolh, tuôôy jư kadih xăk klơlh kaluh varơuq nưq. Kuh oh ay jah kajưk kalh.”

30Nưq laa, atêq tuôôy jah patăk hooy, oot hooy pôôt truh An-ti-ôt, ji tuôôy anguk tayuup vah hlê yôôch, oot palo hla thư ăm. 31Tuôôy nưq, tuôôy đok thư yôôch, khơl tuôq jah hlah hlaak adroyq varơuq ahmưk nhăk nưq. 32Kaah Ju-đa hloay Si-la, kadih oot kung laa khơl hlit, heq ahmưk nhăk khơl oh ay bơơn muuyq apok yơơt ji khienq oot kalh paraat. 33Tuôôy nưq, atêq tuôôy măn đnư muuyq kawat, oot jah khơl oh ay jarooy xuq dii khơl dro heq patăk dăt oot kach hrok hrol. 34[Bơh Si-la hloq duh pheq măn hlê kung oot, lunưq Ju-đa heq dưk hooy muuyq dro.] 35Măn Phao-lô ji Ba-na-ba măn đnoyq aduq An-ti-ôt, pato dayq ji đnooy vlôh apok Lôôk, kung dii 'ngưng dro kadrơy.

36Xatyauq nưq, atêq muuyq sôôq hngơy nhăk đinq, Phao-lô đnooy dii Ba-na-ba: “Dik, haay duh truh hlơq khơl oh ay, tuôôy wiit hlê aduq tôôy theng đơu măn đnư, haay heq padoh taboon apok Lôôk, 'yo oot đong đaleq.” 37Bơh Ba-na-ba kung xung jarooy Jăng, jah taayh laa Mak, kung hooy. 38Măn Phao-lô hloq leh đangq xôq jarooy nhu nưq kung hooy, nưq laa dro heq ka'lăk hooy klơlh oot tuôôy xing Bam-phi-li ji leh dưk dơơp dii oot đom kaluh varơuq. 39Tuôôy nưq, muuyq đơơt tayaat takaay kôt xalih vlôh, pheq đnooy oot biq aklah vlôh dii mamuuyq, katuôôy Ba-na-ba jarooy Mak tyauq kơy hooy ge truh Chip-rơ. 40Măn Phao-lô, tuôôy heq rơơlh Si-la, yôôych dưk hooy, atêq tuôôy jah khơl oh ay pahnăp muut vanong plêêk ku Lôôk. 41Nưq yôôch, kơy hooy loch Si-ri ji Si-li-si, dơơp kalh paraat kaluh tayuup vah.