Kông-vuq 14

1Tuôôy nưq, varơuq xalih vlôh aduq I-kô-ni nưq laa kung dii mamuuyq oot hooy muut đom hnhư tagumq ku manih Jo Thaiq ji pato dayq dang đanưq pheq đnooy thier 'ngưng manih, dêq Jo Thaiq hloay Hi Lap, heq tuôq. 2Bơh khơl manih Jo Thaiq lưp tuôq heq ahluk ji khienq xuum biit khơl manih tamooy kadrơy 'yarơ tachơơl hlê khơl oh ay. 3Jo anưq, oot măn hlê đnư muuyq kawat yơơt, pato dayq kach kôk kalh truh Lôôk, laa Kơy dưk xanưk ka apok ku vanong plêêk Kadraq bơơn kach dơơp ka kaluh hlêêl akêh ji varơuq akêh xalih vlôh gamưh hlê ti oot. 4Bơh tamooy đom theng biq aklah vlôh, ji muuyq sôôq yôôych tyauq manih Jo Thaiq, măn sôôq kadrơy tyauq khơl jah rơơlh. 5Lunư, đom tuôôy xôq vih rôp toop ku dêq hloay khơl manih daak kadrơy ji manih Jo Thaiq, kung khơl dưk xanok ku oot, jah vlôh jêêk xôq dơơp ra ơơh ji tiip phơu oot, 6yôôych atêq tuôôy xet varơuq nưq, oot du naanq hlê kaluh theng Li-kao-ni, Lit-trơ, Đet-bơ, ji dêh gah gih, 7yôôch măn đnư, oot dơơp đnoyq padoh taboon Hêêl Kaxay.

8Aduq Lit-trơ, muuyq dro atul tâk nưq đong 'ngôôy, dii vaarq jôôk taqwauq talêêt xing tuôôy măn đom klaak miq ni, đơu ay nưq koq hmưq tawaak hooy. 9Ay neq tameng Phao-lô padoh, đơu kơy tuôôy 'yo atrêêk muut ay yôôych hloq đaneq ay neq e xuum tuôq xôq jah payơh. 10Kơy đnooy kôt apok đaneq: “Dayh dưk hyioh tok tol jôôk ku ay”, yôôch ay kaplok tok ji tawaak hooy. 11Katuôôy, tuôôy manih karôp 'yo hloq varơuq đơu Phao-lô heq dơơp, oot atok apok tok, đnooy bơơn apok Li-kao-ni ku oot, đaneq: “Kaluh yaak, hlưp xok xăk xamơk koot manih, heq hooy pôôt dii haay.” 12Oot kung taayh Ba-na-ba laa “yaak Jơơt,” măn Phao-lô laa “yaak Hek-mê,” vii kơy laa dro đnooy vlôh đaauq. 13Kung tuôôy nưq, thơy dok dơơp ku yaak Jơơt, laa para măn pi adroyq theng, atêq tuôôy xagook ôô bo ji vong raak truh 'mok, kơy nưq đinq tơơk tưp lêh kung dii manih karôp. 14Bơh tuôôy tameng anưq, yôôych khơl jah rơơlh, nưq laa Ba-na-ba ji Phao-lô, atêq tuôôy heq chieh aau oot, oot kathôp hloay muut manih karôp, pariau kôt 15ji đnooy: “Tôôy dro lơơy, aleq oh ay dơơp kaluh varơuq neq? 'Wot kung laa khơl manih kung dang xăk đaji oh ay, đong padoh Hêêl Kaxay ka oh ay, xôq wih oh ay klơlh taleq varơuq lưp e it neq xôq wih truh Kơy Plêêk hloay riirh, Kơy panưk jêêk plêêk, vari ji tahli, kung tôôy paroh đom nưq, 16laa Kơy đơu đom kaluh đơơy heq dalơh hlê, heq xôq ăm dêq hloay kaluh tamooy tawaak hooy tyauq trôôk đêh ku oot, 17bơh long anưq, Kadraq heq leh xôq ăm thiuq xanưk nưq truh kadih Kadraq, tuôôy măn dơơp vanong kaxay ka oh ay, bơơn kach kahniq jit xing plêêk kung muua xiêk raak play, khienq xuum oh ay phiq phơh dii tuôông xa ji hlah hlaak.” 18Ji tuôôy heq đnooy kaluh varơuq neq, oot vơ đu jư ik manih karôp leh tơơk tưp kuah lêh ka oot.

19Nưq bơh, khơl manih Jo Thaiq heq truh xing An-ti-ôt ji I-kô-ni, atêq tuôôy heq ahluk manih karôp yôôch tiip phơu Phao-lô, oot ahoot kơy vlôh pi gôk theng, vii biit kơy heq kaxêêt. 20Lunư, tuôôy khơl xatyauq dưk rawiit kơy, yôôych atêq tuôôy dưk tok, kơy hooy muut đom theng, yôôch hngơy atêq, kơy hooy kung Ba-na-ba truh Đet-bơ. 21Katuôôy, tuôôy heq padoh taboon Hêêl Kaxay aduq theng nưq ji waak 'ngưng dro vlôh jêêk khơl xatyauq, oot wiit xuq aduq Lit-trơ, yôôch truh I-kô-ni, ji An-ti-ôt, 22dơơp đnoyq dơơp ăm kajưk xuum khơl xatyauq, ahmưk nhăk oot kajưk đom xuum tuôq, đaneq: “Tavơh 'ngưng varơuq pơơl hwơơl laa varơuq duh dik ka haay xôq muut đom daak dêh ku Kơy Plêêk.” 23Tuôôy nưq, atêq tuôôy paja dơơp khơl kadraq lơơk ka oot aduq tôôy Tayuup Vah, tuôôy heq xadrook apôôy kung dii varơuq deek xa, vaarq dro atăq panhăp khơl manih nưq ka Lôôk, laa Kơy đơu oot heq xôq xuum tuôq truh. 24Ji atêq tuôôy dalơh hlê Bi-si-đi, oot hooy truh Bam-phi-li. 25Tuôôy padoh đaauq aduq Bet-jê yôôch, oot hooy pôôt truh At-ta-li. 26Xing aduq nưq, oot hooy ge truh An-ti-ôt, laa aduq oot heq jah ăm panhăp muut vanong plêêk ku Kơy Plêêk ka kaluh varơuq đơu oot heq payôôch. 27Tuôôy nưq, tuôôy heq truh aduq ji nhomq tagumq Tayuup Vah hlê, oot padoh taboon xet taleq varơuq Kơy Plêêk heq dơơp kung dii oot ji đaneq Kadraq heq luh 'mok xuum tuôq ka khơl tamooy daak kadrơy. 28Xatyauq nưq, oot măn hlê dii khơl xatyauq muuyq kawat leh lêq.