2 Ti-mô-thê 4

1Gô kôk kalh đnooy pato koot kangưưr Kơy Plêêk ji Lôôk Wơơt Dêh Jê-xu, Kơy hnoq xưh xadrah manih riirh hloay manih kaxêêt, vii varơuq rama truh ku Kadraq ji daak Kadraq, đaneq: 2Dayh padoh taboon Apok Lôôk; dayh ralauq 'miêh, ju đom varơuq hlơu klêq long varơuq pơơl hwơơl; dayh toah dook, đnooy toah, đnooy panhăk, dii dêq hloay varơuq atuq xuum ji pato dayq. 3Vii hnoq truh katuôôy xanưm tuôôy khơl drơy hnoq leh chiuq ik apok pato kaxay tamaq. Tađôôy muut đnư, oot hnoq anguk hlê ka oot khơl thơy pato tyauq varơuq hmưch trôôch đêh ku oot, dong đol ahmoot troop tôôr, 4yôôch hnoq leh vơ kajet tôôr vlôh klơlh varơuq dik, đơu măn wih hlê kaluh varơuq taboon leh e. 5Bơh koot dayh talăng jăk đom tôôy varơuq. Dayh chiuq uunq pơơl hwơơl. Dayh dơơp kông varơuq ku manih padoh taboon Hêêl Kaxay. Dayh dơơp payôôch varơuq dơơp ku koot.

6Măn gô yôôych đong biq kahrôq vlôh đaji muuyq kua lêh yôôch, ji kawat vlôh hooy ku gô heq jeq. 7Gô heq tahmơt đom muuyq varơuq ta thi tolh kaxay; gô heq payôôch varơuq charơơk; gô heq jư kajưk xuum tuôq. 8Juneq, đoat tađnah hyioh jăk heq deng 'miêh ka gô, 'ngưq đoat tađnah đơu Lôôk, Kơy Padrok Xadrah hyioh jăk, hnoq kahniq kadrool ka gô đom hngơy nưq, đơu leh vơ deng ka gô, bơh măn ka dêq hloay khơl adro xung xiaq varơuq rama truh ku Kadraq.

9Dayh raanq dêq paraat xôq meel truh tavơh gô, 10vii Đê-ma heq ka'lăk gô, vii hmưch xiaq đơơy neq, ji ni heq hooy truh Tê-sa-lô-ni-ka. Kơ-rêt-xen hooy Ga-la-ti, Tit hooy Đa-ma-ti. 11Vơ e Lu-ka măn dii gô. Atêq tuôôy đoonq Maak, dayh jarooy ay nưq tyauq kung koot bơyh vii ay nưq e ich ka gô đom varơuq dơơp. 12Gô heq patăk Ti-chi-kơ truh Ê-phê-sô. 13Tuôôy hooy, koot dayh adrơk tyauq poop aau kot kek đơu gô xôq măn aduq Ka-but aduq theng Trô-ach, kung dii taleq rahloot rahlăp, nhưk laa kaluh rahloot rahlăp kađuh.

14Ti thơq đông A-lek-xan-đơ heq dơơp ra ơơh gô 'ngưng yưk. Lôôk hnoq bla hlê ni xatyauq kaluh varơuq dơơp ku ni, 15laa adro đơu koot kung pheq rơơt rol, vii ni dêq paraat tachơơl hlê apok pato ku haay.

16Đom yưk đnooy bing adroyq dik ku gô, be akơyq truh kahnoq kung gô, bơh dêq hloay raay hooy ka'lăk gô. Apôôy kadrôôp nưq leh kahrôq hlê tol oot. 17Bơh Lôôk heq dưk gah gô ji dơơp ka gô kalh paraat, xôq gamưh gô, varơuq đnooy vlôh Hêêl Kaxay jah dưk dơơp xaleep, ji dêq hloay tamooy kadrơy raay e hnoq tameng ik. Gô kung heq jah wơơt klơlh huuy ôô vomq. 18Lôôk hnoq wơơt xok gô klơlh tôôy varơuq xơuq ji hnoq jư 'yo gô ka daak plêêk ku Kadraq. Apôôy tađnah tađnaak thuôk xuq Kadraq dong truh đơơy đơơy, miet miet. Amen.

19Dayh vôôch hlơq Bê-rit-sin ji A-qui-la, kung dêq hloay hnhư Ô-nê-si-phô-rơ. 20Ê-rat măn hlê aduq Kô-rinh-tô, măn Trô-phim vii jiq lunưq gô xôq hlê aduq Mi-lê. 21Dayh raanq dêq paraat truh adroyq xiêk ka oaq. Ơ-bu-lu, kung Bu-đen, Li-nut, Kơ-lau-đia, ji khơl oh ay raay vôôch hlơq koot.

22Apôôy Lôôk măn dii danưng kooy koot. Apôôy vanong plêêk măn dii oh ay.