Cua Bible Literal Text
Tit 1
Phao-lô, xapok ku Kơy Plêêk ji adro jah rơơlh ku Lôôk Wơơt Dêh Jê-xu, vii xuum tuôq ku khơl adro jah Kơy Plêêk rơơlh xok ji varơuq hlolh xet hyioh jăk ta muut dii xuum tuôq kuh kul Lôôk, dii takôô gamưh kajưk dik truh varơuq riirh đơơy đơơy đơu Kơy Plêêk, Kơy leh đnooy pa ôôh, heq tavek xing adroyq tôôy đơơy xanưm. Bơh muut klip kawat, Kadraq heq kahnoq vlôh apok Kadraq xing varơuq padoh taboon hêêl kaxay đơu gô heq jah pahnăp tyauq apok tanưưl ku Kơy Plêêk, Wơơt Lôôk ku haay. Atăq ka Tit, koot dik ku gô đom xuum tuôq achung. Apôôy vanong plêêk ji varơuq hrok hrol xing Kơy Plêêk, laa Vaq, ji Lôôk Wơơt Dêh Jê-xu, Wơơt Lôôk ku haay, truh tol koot.
Gô heq xôq koot hlê aduq Kơ-rêt vii ka varơuq neq, nưq laa xôq koot e hnoq ralauq palauq kaluh varơuq măn koq payôôch ji ăm dơơp khơl draq lơơk đom tôôy theng đaji gô heq pato jarooy koot — manih nưq pheq leh e aduq đnooy ik, laa kanau ku muuyq kadrê, e koot xau muuyq xuum, leh biq đnooy pahnhiq truh đơơy riirh bơyq ba long lưp tameng tyauq. Vii adro xakaq bơy rôp dăt pheq leh e aduq đnooy ik, đaji laa adro jư 'yo hnhư ku Kơy Plêêk, leh katơơk galơh, leh tôq jaraq, leh gien lok, leh tagay tayaat, ji leh hmưch trôôch, xaloah muut đnư laa pheq xung tamooy kadrơy, xung xiaq varơuq kaxay tamaq, khôôt xet, hyioh jăk, vah xarêh, jư xăk, jư kajưk apok plêêk đangq tuôq gamưh ta muut dii jaauq liq, xôq ka manih nưq e da uh paraat xôq vơơ ahluk ahlul khơl drơy bơơn varơuq pato dayq talăng kalh, vơơ ta'meq 'moq khơl tachơơl hlê.
Vii e 'ngưng adro ahluk ka'lăk, hôôk đnooy athêêk katơơk galơh, ji bing aluut pa ôôh, nhưk laa khơl adro thuôk bing goch kađuh. Varơuq duh dik laa dăt bing oot hnhep huuy. Oot đong tagay xôôl dôôl dêq hloay kaluh kôôch hnhư tuôôy pato kaluh varơuq leh duh pato, vii kơq jêêt baak đangq kamưưl. Muuyq đom sôôq oot, 'ngưq laa khơl hnhư hlit ku kadih oot, heq đnooy đaneq: “Manih Kơ-rêt hloay laa khơl adro đnooy pa ôôh, kaluh koot ôô xamư, kaluh apoop klaak pakeng vôk alah pôk.” Apok dơơp xanưk neq laa dik. Vii kakơq nưq, dayh toah trek oot kach thier parêq, xôq oot e hnoq jah talăng kalh đom xuum tuôq, leh xôq xuum muut kaluh varơuq taboon leh e ku manih Jo Thaiq long apok pato dayq ku khơl adro wih katoor dii varơuq dik. Tôôy paroh raay xarêh xaraat ka khơl akơyq xarêh xaraat. Bơh đôôyq dii adro klơơr 'yêq ji lưp tuôq, yôôch be e kajoq xarêh xaraat, đơu kaah xuum biit hloay xuum klaak oot raay heq biq dơơp ka hư hlơơp. Oot đnooy vlôh oot xet Kơy Plêêk, lunư, đom varơuq dơơp ku oot, oot chôôyq ka'lăk Kadraq, jêêk vlôh đangq ramêq, leh tameng apok, ji leh taxưngq dii paq kê varơuq kaxay tamaq leq.
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.