Tit 2

1Bơh koot, dayh đnooy kaluh kajoq laa troq dik dii varơuq pato dayq talăng kalh. 2Dayh ahluk ahlul khơl kơy e tuuyh pheq jư xăk, goh gool, xet chưng mưk, talăng kalh đom xuum tuôq, đom xuum xung xiaq, ji đom varơuq atuq xuum. 3Kung anưq, dayh ahluk ahlul khơl mo e tuuyh kahnoq vlôh varơuq đangq vado đom kach xa athêêk, leh đnooy xơuq long biq dơơp xapok ka lok, bơh pheq laa manih pato dayq varơuq tolh kaxay, 4xôq ka oot e hnoq pato dăt khơl mư kadrê blaay jêêk vlôh khơl adro xiaq kanau, xiaq koot, 5xet chưng mưk, xarêh xaraat, wêêt jư 'yo varơuq hnhư ji tameng tyauq kanau mư, xôq apok ku Kơy Plêêk leh biq đnooy katơơk galơh. 6Dang anưq, koot dayh ahmưk pato khơl tadăp blaay pheq xet chưng mưk, 7tuôôy kahnoq vlôh kadih xăk koot đaji tômq ramil truh varơuq kaxay đom tôôy panưh, kaluh varơuq hyioh jăk, katik goh gool đom varơuq pato dayq, 8dii apok plêêk troq dik leh hnoq vơ đnooy ik, xôq paq kê akơyq xing bing tachơơl pheq biq kamưưl iel vii be e varơuq xơuq leq xôq đnooy truh haay. 9Dayh pato khơl xapok pheq tameng tyauq kôôch oot, dơơp hlah xuum kôôch đom tôôy varơuq, bơh leh takaay hlê, 10leh xa atôk, đơu xaloah muut đnư pheq xanưk kahnoq dêq hloay đangq tuôq gamưh, xôq đom tôôy kach, oot e hnoq xagook hlê apok thơơm ka varơuq pato dayq truh Kơy Plêêk, Wơơt Lôôk haay. 11Vii vanong plêêk ku Kơy Plêêk xôq wơơt xok tôôy adro heq jah kahnoq vlôh, 12juneq đong pato dayq haay, xôq tuôôy heq ka'lăk varơuq lưp kuh kul kung kaluh hmưch trôôch ku dêh araak, haay e hnoq riirh muuyq kach rơơt rol, hyioh jăk ji talăng jăk đom đơơy neq, 13đong tuôôy takôô xuum takôô gamưh vanong kaxay ji varơuq rama truh tađnah tađnaak ku Kơy Plêêk yơơt hloay ji Wơơt Lôôk haay laa Lôôk Wơơt Dêh Jê-xu, 14Kơy heq pahnăp kadih xăk Kadraq vii haay xôq wơơt root haay klơlh tôôy varơuq xơk tauq ji xôq pa xarêh ka Kadraq muuyq tamooy dong dik, laa tamooy talăng jăk dii varơuq kaxay.

15Dayh pato kaluh varơuq nưq, ahluk ahlul ji ta'meq pato dii dêq hloay qwuyen da uh. Te xôq akơyq 'yo leh ra kajoq koot.