Cua Bible Literal Text
Tit 3
Dayh panhăk oot tameng tyauq ji dơơp tyauq khơl padrok vuua lôôk kung khơl hnhư adrơk qwuyen, pheq ralauq 'miêh ka tôôy varơuq kaxay, leh đnooy xơuq akơyq, leh tagoa tahmơt, đơu pheq hien tagu, kahnoq vlôh dêq paraat apôôt xăk dii tôôy adro. Vii haay adroyq neq kung laa khơl adro vlô khưrq ji lưp tameng, biq adô aluut ji dơơp xapok dong đu thưq hmưch trôôch kung xa agưt, riirh đom varơuq xơk tauq ji 'yarơ, đangq geet, ji 'yarơ karưn mamuuyq. Bơh tuôôy varơuq tolh kaxay ji xuum xung xiaq ku Kơy Plêêk, Wơơt Lôôk haay, jah kahnoq vlôh, yôôych Kadraq wơơt haay, be aalq bơyh kaluh varơuq dơơp vlôh xing varơuq hyioh jăk đơu haay heq dưk dơơp, bơh bơyh xuum biit angơuq ku Kadraq, gamưh varơuq 'nhaau xarêh ku vanong tađôôy đơơu ji varơuq tađôôy đơơu xing Kơy Phool Hiel, laa Kơy đơu Kơy Plêêk heq kahrôq pôôt kach raah jôh tol haay xing Wơơt Lôôk haay laa Lôôk Wơơt Dêh Jê-xu, xôq atêq tuôôy jah xưng hyioh jăk gamưh vanong plêêk Kadraq, haay jah wih jêêk khơl adro katôôl tyauq đaji xuum takôô gamưh kajưk dik truh varơuq riirh đơơy đơơy. Apok plêêk neq laa đangq tuôq gamưh, ji gô xung koot đnooy kalh muut kaluh varơuq nưq, aleq ăm khơl akơyq heq tuôq Kơy Plêêk hnoq rơơt rol văch 'yo xôq pahnăp xăk muut varơuq kaxay tamaq. Kaluh varơuq nưq laa tolh kaxay ji e ich ka 'ngưng adro. Bơh dayh chuh kaluh varơuq takaay tagêh vlô khưrq, kaluh adrơơk nooy, varơuq takaay tayaat ji takhuk tahăk truh ganuun vii kaluh varơuq nưq laa kaluh thưq lưp e ich ji lưp xung liq. Dayh dơyh ka'lăk adro leq tyauq jiq jaauq atêq muuyq long vaarq yưk ahmưk pato, vii xet đaneq manih đanưq heq biq hyaak hyul ji kưq lôp kadrôôp, laa adro kadih xưh xadrah xăk.
Tuôôy gô patăk A-tê-ma long Ti-chi-kơ truh aduq koot, yôôych koot dayh dayh truh tavơh gô aduq Ni-kô-bô-li, vii gô heq đinq măn hlê xiêk ka oaq aduq nưq. Dayh jarooy thơy ganuun Xê-na ji A-bô-lô dưk hooy dik tơơl dal, aleq ăm oot leh thiuq dêq kajoq. Khơl oh ay khơl tuôq ku haay kung pheq hok pahnăp xăk muut kaluh varơuq kaxay tamaq dong đu kaluh varơuq duh dik, xôq be wih jêêk leh e găp play.
Dêq hloay khơl adro măn dii gô vôôch hlơq koot. Dayh atăq apok vôôch hlơq khơl adro xung xiaq haay đom xuum tuôq. Apôôy vanong plêêk măn dii dêq hloay oh ay.
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.