Cua Bible Literal Text
2 Ti-mô-thê 3
Bơh koot pheq xet varơuq neq, nưq laa đom kaluh hngơy lôôch dik, hnoq xalih truh kaluh katuôôy xanưm pơơl hwơơl. Vii khơl drơy hnoq xiaq xăk, xiaq baak jêêt, pa ưưt akhwoak, atok xăk, katơơk galơh, leh tameng apok miq vaq, leh xet ơơn, leh vah xarêh, leh xet xung xiaq, leh ik tagu, ragơy đnooy xơuq, leh jư xăk, e xuum trôôch tađnưk tađnayh, leh xiaq trôôch varơuq kaxay, xalih xuum, dayh tôq jaraq, atok xuum katơơk galơh, xiaq xa agưt iaq xiaq Kơy Plêêk, e kaveeh tuôq kuh kul, bơh laay chôôyq ka'lăk taay yaak ku varơuq tuôq kuh kul. Dayh chuh xangưưy khơl adro nưq.
Vii đom katul oot laa khơl adro leenq muut hnhư khơl drơy, adô luut khơl drê vlô khưrq, rahloot viik kadrôôp maroh, biq jarooy aluut xing đu thưq hmưch trôôch, hok miet đơu be dong leq hnoq ik hooy truh aduq hlolh xet varơuq dik. Jan-net ji Jam-be heq tachơơl hlê Môi-se đaleq, yôôych khơl adro neq kung đong tachơơl hlê varơuq dik đanưq, bing adro nưq laa khơl adro e xuum biit biq va ih va oop, laa khơl adro pa ôôh lar đôôyq dii xuum tuôq. Bơh oot hnoq leh hooy xangưưy iaq ik, vii varơuq vlô khưrq ku oot hnoq jêêk vlôh ro raang adroyq tôôy manih, kung dang đaji varơuq vlô apoop ku vaarq adro hơq heq kahnoq vlôh.
Bơh koot heq dơơp tyauq apok pato, kach riirh, muk đik, xuum tuôq, varơuq atuq xuum, xuum xung xiaq, varơuq wêêt kajưk ku gô, kaluh varơuq rôp toop, kaluh pơơl dal đaji heq xalih truh ka gô aduq An-ti-ôt, aduq I-kô-ni, aduq Lit-trơ, kaluh varơuq rôp toop đơu gô heq chiuq. Ji Lôôk heq wơơt xok gô klơlh dêq hloay kaluh varơuq nưq. Đơu dik, dêq hloay khơl akơyq xung riirh kach tuôq kuh kul đom Lôôk Wơơt Dêh Jê-xu raay hnoq biq rôp toop. Măn bing manih xơk tauq ji adro aluut pa ôôh hnoq kang athêêp tok varơuq xơuq 'ngưng iaq, aluut pa ôôh manih ji biq manih aluut pa ôôh. Lunư, koot dayh kưq măn đom kaluh varơuq đơu koot heq hok ji tuôq kajưk, vii xet koot heq hok kaluh varơuq nưq xing aduq akơyq, ji đaneq xing tuôôy măn de, koot heq hok xet Rahlăp Vah, hnoq ik khienq koot khôôt xet wih truh varơuq wơơt xok xing xuum tuôq đom Lôôk Wơơt Dêh Jê-xu.
Kaah Rahlăp Vah laa varơuq khuh hơơy ku Kơy Plêêk, ji laa varơuq ich lơơy ka varơuq pato dayq, đnooy toah, 'meq dook, pato đom varơuq hyioh jăk, xôq manih ku Kơy Plêêk hnoq ik vlôh yuôôr xaleep, jah ralauq xôq đu tol ka tôôy varơuq kaxay.
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.