Cua Bible Literal Text
2 Ti-mô-thê 2
Lunưq, koot gô lơơy, koot dayh xôq koot jah kalh paraat đom vanong plêêk aduq Lôôk Wơơt Dêh Jê-xu. Kaluh varơuq koot heq tameng xing aduq gô katul 'ngưng manih dơơp xanưk, dayh pahnăp oot ka khơl adro đangq tuôq gamưh đơu oot kung hnoq e paraat xôq pato dayq khơl drơy. Dayh kung chiuq pơơl hwơơl dii gô, đaji muuyq adro kuun jooy ku Lôôk Wơơt Dêh Jê-xu. Tuôôy dơơp adro kuun, leh akơyq xôq ni biq măk tawaq kaluh varơuq ku đơơy riirh varơuq đơơy, xôq ka adro kuun nưq hnoq ik dơơp hlah xuum manih heq rơơlh taayh ni. Kung anưq, tuôôy akơyq nưq truh ta thi, adro nưq hnoq leh jah đoat raak jah jay atoh leh ta thi tyauq ganuun. Manih dơơp nôông wêêt garơng pheq jah xok raak play adroyq nhưk. Dayh biit hlê varơuq gô đong đnooy, vii Lôôk hnoq kahniq ka koot varơuq hlolh xet đom tôôy varơuq.
Dayh văch truh Lôôk Wơơt Dêh Jê-xu, heq jah khienq riirh hlê xing aduq kaxêêt, thuôk adrơơk Đa-vik, tyauq đaji Hêêl Kaxay ku gô, vii Hêêl Kaxay nưq, gô chiuq pơơl truh nôôy taway talơy looy tooy đaji muuyq adro lôp kadrôôp. Lunư, apok Kơy Plêêk yôôych leh biq vek jư 'leq. Vii anưq, gô chiuq uunq tôôy varơuq vii khơl adro jah rơơlh xok, xôq oot kung hnoq ik jah varơuq wơơt xok đom Lôôk Wơơt Dêh Jê-xu, kung dii tađnah tađnaak đơơy đơơy.
Apok neq laa đangq tuôq gamưh:
“Vii atoh haay heq kaxêêt dii Kadraq, yôôych haay kung hnoq riirh dii Kadraq.
Atoh haay chiuq uunq ik, yôôych haay kung hnoq dưk xakaq dii Kadraq.
Atoh haay chôôyq Kadraq, yôôych Kadraq kung hnoq chôôyq haay.
Atoh haay leh muuyq xuum, yôôych Kadraq kung kưq jư apok,
vii Kadraq leh ik chôôyq kadih Kadraq.”
Dayh panhăk khơl tuôq kaluh varơuq nưq, tuôôy đnooy pato oot kangưưr Kơy Plêêk xôq te takaay tayaat truh chư valơk, vii be lơơy ich kajoq, vơ taway truh varơuq hư hlơơp đôôyq dii manih tameng. Dayh dơơp dêq paraat xôq kahnoq vlôh kadih xăk koot đaji adro jah xanưk nhonq kangưưr Kơy Plêêk, muuyq adro dơơp kông leh kamưưl, pato dayq klip troq apok varơuq dik. Panưh kadrơy, dayh chuh kaluh varơuq tagêh bơyq ba leh e, vii varơuq nưq hnoq taway truh aduq leh kuh kul iaq đnoyq, ji apok tagêh ku khơl adro nưq hnoq jêêk yuôôr varơuq taba lơy dang đaji ple oop hlek, đơu đom sôôq nưq laa Hi-mê-nê ji Phi-lêt, khơl adro heq hooy hyaak xangưưy đôôyq dii varơuq dik, tuôôy đnooy đaneq varơuq riirh hlê heq xalih vlôh yôôch, ji oot đong pahyaak ka'lăk xuum tuôq ku muuyq sôôq adro. Lunư, kahnier găk kajưk ku Kơy Plêêk heq dưk kajưk, tuôôy e apok hlêêl xanưk neq: “Lôôk xet khơl adro thuôk xuq Kadraq” ji “Dêq hloay akơyq apôôy taayh yal Lôôk pheq chuh xangưưy klơlh varơuq leh hyioh jăk.”
Panưh kadrơy, đom muuyq poop hnhư kôt, leh vơ e wo bơơn vajang ji baak, đơu măn bơơn gay ji vari dôôp, muuyq sôôq deng ka varơuq kôt galơh, đơu sôôq kadrơy deng ka varơuq de. Lunưq, atoh akơyq heq pa xarêh xăk klơlh kaluh varơuq nưq, yôôych adro nưq hnoq laa poop wo deng ka varơuq kôt galơh, heq jah xôq đêh vlôh, ik yuôôr đôôyq dii kôôch, jah ralauq xôq 'miêh ka tôôy varơuq kaxay.
Dayh xadăk klôônq kaluh hmưch trôôch ku tadăp blaay, đơu charơơk tyauq varơuq hyioh jăk, xuum tuôq, xuum xung xiaq, kung varơuq tagu dii khơl adro apôôy taayh Lôôk bơơn xuum klaak pa xarêh. Bơh dayh chôôyq ka'lăk kaluh apok tagêh vlô khưrq ji biit ahyaal, vii xet đaneq kaluh varơuq nưq vơ dơơp vlôh varơuq takaay tayaat. Adro xapok ku Lôôk pheq leh takaay tayaat, bơh pheq tagu đôôyq dii tôôy adro, e paraat pato dayq, atuq xuum, tuôôy vơ dăt khơl adro tachơơl hlê xăk dii varơuq hwêêt xuum, xet 'leq Kơy Plêêk kahniq ka oot varơuq wiit xuum wih truh varơuq hlolh xet varơuq dik, ji oot hnoq ik kadrăch hlê klơlh xađook ku kamuuych, atêq tuôôy biq ni rôp jư xôq dơơp tyauq iq ni.
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.