2 Ti-mô-thê 1

1Phao-lô, adro jah rơơlh ku Lôôk Wơơt Dêh Jê-xu vii xuum trôôch ku Kơy Plêêk, tyauq apok tavek truh varơuq riirh đom Lôôk Wơơt Dêh Jê-xu, 2atăq ka Ti-mô-thê, koot xung xiaq ku gô:

Apôôy koot jah vanong plêêk, varơuq biit angơuq ji hrok hrol xing Kơy Plêêk, laa Vaq ji Lôôk Wơơt Dêh Jê-xu, Lôôk haay.

3Gô tưp apok kuh kway Kơy Plêêk, Kơy gô hơu varơuq xatyauq xing khơl mo kơy, dii xuum klaak pa xarêh, tuôôy klôôy hngơy gô hloay văch truh koot đom kaluh apok apôôy ku gô, 4takôô trôôch tavơh koot, văch truh daak mot koot, xôq gô jah galơh galaay xuum hlah, 5vii e varơuq panhăk văch truh xuum tuôq dong dik đom koot, laa xuum tuôq tuôôy kapa tep măn đom Lô-it, mo pa iir miq koot, yôôch Ơ-nit, miq koot, gô tuôq đaneq xuum tuôq nưq kung đong măn đom koot.

6đơu vii kakơq nưq, gô panhăk koot dayh atuut hlê vanong ku Kơy Plêêk laa vanong măn đom koot xing varơuq xôq ti ku gô. 7Vii Kơy Plêêk heq be kahniq ka haay danưng kooy ku varơuq yôq kamo, đơu laa ku paraat kalh, ku xuum xung xiaq ji varơuq jư xăk. 8Lunưq, koot te kamưưl truh varơuq dơơp xanưk ka Lôôk haay, kung te kamưưl truh gô, adro tu ku Kadraq, tađôôy muut đnư, dayh kung chiuq pơơl vii Hêêl Kaxay, gamưh taay yaak ku Kơy Plêêk, 9Kơy heq wơơt haay ji tawooyh taayh haay bơơn varơuq tawooyh taayh vah, leh aalq tyauq varơuq dơơp ku haay, bơh tyauq iq trôôch ku đêh Kadraq ji tyauq vanong plêêk, laa varơuq heq jah kahniq ka haay đom Lôôk Wơơt Dêh Jê-xu xing adroyq tôôy đơơy miet miet, 10đơu juneq heq jah kahnoq vlôh xing varơuq rama vlôh ku Wơơt Lôôk haay, laa Lôôk Wơơt Dêh Jê-xu, tuôôy heq dơơp ka varơuq kaxêêt jêêk vlôh paq ik yuôôr aar đơu ataak tađnah varơuq riirh kung varơuq leh kaxêêt gamưh Hêêl Kaxay, 11vii Hêêl Kaxay nưq đơu gô heq jah rơơlh laa adro padoh taboon, adro jah rơơlh, ji thơy pato. 12Kung vii kakơq nưq đơu gô chiuq pơơl hwơơl dii kaluh varơuq neq. Bơh gô leh kamưưl vii gô xet Kơy gô tuôq ji gô tuôq kajưk đaneq Kadraq e qwuyen jư 'yo varơuq pahnăp ku gô dong truh hngơy nưq.

13Koot dayh jư xok pheep tăk truh kaluh apok pato kaxay tamaq đơu koot heq tameng aduq gô, dii xuum tuôq ji xuum xung xiaq đom Lôôk Wơơt Dêh Jê-xu. 14Dayh jư 'yo varơuq pahnăp tolh kaxay gamưh Lôôk Phool Hiel, laa Kơy riirh đom haay.

15Koot xet varơuq neq, nưq laa dêq hloay khơl adro aduq A-si heq chôôyq ka'lăk gô, đơu đom nưq e Phi-gen ji Het-mô-gen.

16Apôôy Lôôk kahniq vanong biit angơuq ka hnhư Ô-nê-si-phô-rơ, vii ay 'ngưng yưk hlơq hlôôp gô ji leh kamưưl truh talơy looy tooy ku gô, 17wih hlê, tuôôy măn aduq Rô-ma, ay heq talăng jăk vôôch axek truh gô ji heq akhiim hloq. 18Apôôy Lôôk kahniq vanong ka ay xôq akhiim jah varơuq biit angơuq xing aduq Kadraq đom hngơy nưq. Măn koot xet ro ay nưq heq hơu varơuq 'ngưng đaleq aduq Ê-phê-sô.