Skip to content
BibleKenya

Cua Bible Literal Text

1 Ti-mô-thê 6

Paq kê akơyq đong măn 'laarq varaq dơơp xapok, pheq 'yo kôôch xăk laa đangq dêq xuum vado, xôq yal Kơy Plêêk ji varơuq pato dayq klơlh biq đnooy katơơk galơh. Panưh kadrơy, khơl xapok e khơl adro kôôch laa khơl tuôq leh ik vii kơq oot laa oh ay đơu 'yo leh ra kajoq, bơh pheq hơu varơuq kang iaq đnoyq, vii oot laa khơl tuôq ji manih jah xung xiaq, manih jưq phon muut varơuq hơu varơuq. Koot dayh pato dayq ji ahmưk nhăk kaluh varơuq nưq.

Atoh adro leq pato dayq trôôk đêh ji leh tameng tyauq kaluh apok varơuq dik, 'ngưq laa apok ku Lôôk haay, laa Lôôk Wơơt Dêh Jê-xu, kung dii apok pato truh varơuq tuôq kuh kul, yôôych manih nưq laa adro katơơk galơh, be hlolh xet kajoq, đơu e katik a'moh đom varơuq takaay tayaat ji takhelh truh chư valơk, xing nưq dơơp vlôh varơuq 'yarơ, tagoa, đnooy katơơk galơh, xuum biit va ih va oop, tagay tayaat, katul khơl adro biq va ih va oop đom xuum biit ji biq thiuq hlơơp varơuq dik, 'yo varơuq tuôq kuh kul laa aduq xôq dơơp karoh.

Bơh varơuq tuôq kuh kul kung dii varơuq hlah xuum laa muuyq lơơy kôt. Vii haay heq leh xagook kajoq muut dêh araak, đơu haay kung be e hnoq xagook kajoq hooy ik. Panưh kadrơy, tuôôy e pong xa, aau hlưp, yôôych haay hnoq jah hlah xuum dii kaluh varơuq nưq. Măn khơl adro trôôch jêêk vlôh karoh e yôôych gưlh muut adô aluut ji vơơt rayaalh, dii 'ngưng hmưch trôôch vlô apoop, taay haayq, 'ngưq laa kaluh thưq panheet karăp khơl drơy muut varơuq hruh hrek ji păk kaxêêt dêq. Vii ưk rayah ku đu thưq varơuq xơk laa varơuq hmưch jêêt, đơu muuyq sôôq adro, vii thaal tajôh ni, heq biq aluut vlôh klơlh xuum tuôq ji dơơp ra ơơh ka xăk dii 'ngưng varơuq jiq hlu.

Bơh koot, manih ku Kơy Plêêk lơơy, dayh chuh xangưưy kaluh varơuq nưq, đơu charơơk tyauq varơuq hyioh jăk, tuôq kuh kul, xuum tuôq, xuum xung xiaq, katik wêêt kajưk, xuum tagu. Dayh tathi đom varơuq charơơk kaxay tamaq ku xuum tuôq, dayh jư riit varơuq riirh đơơy đơơy, laa varơuq đơu koot heq jah taayh truh ji heq kôk xuum vlôh apok xưng nhonq tolh kaxay kangưưr 'ngưng manih xanưk. Gô vlôh tanưưl ka koot kangưưr Kơy Plêêk, Kơy khienq ka kaluh paroh jah riirh, ji kangưưr Lôôk Wơơt Dêh Jê-xu, Kơy đnooy vlôh apok xưng nhonq tolh kaxay aduq Bôn-xơ Phi-lat, đaneq koot pheq tameng jư apok pato dayq neq kach leh e tachoot, leh e aduq đnooy ik, dong truh hngơy rama vlôh ku Lôôk haay, laa Lôôk Wơơt Dêh Jê-xu, laa Kơy đơu Kơy Plêêk Thier Yơơt đangq vanê ayuôôt ji vơ muuyq, laa Vuua ku khơl vuua ji Lôôk ku khơl lôôk, hnoq kahnoq vlôh muut klip kawat, vơ muuyq adro Kadraq e varơuq leh kaxêêt, măn đom varơuq tađnah leh truh jeq ik, ji Kơy be akơyq hmưq 'yo hloq, kung leh akơyq hnoq ik 'yo hloq, apôôy varơuq vado ji taay yaak đơơy đơơy awih xuq Kadraq. Amen.

Dayh pato dăt manih karoh đom đơơy neq te katơơk galơh, kung te takôô gamưh aduq garuh anôôp leh kajưk dik, đơu takôô gamưh aduq Kơy Plêêk, Kơy kahniq ka haay tôôy thưq kach galơh galaay xôq hlah nhonq, ji pato dăt oot dơơp varơuq kaxay, raah jôh đom varơuq kaxay, e xuum ranưh ranơơy,ralauq palauq ahlook ăm, tagoop xôq ka kadih xăk muuyq kahnier kaxay tamaq ka varơuq jeq truh, xôq oot hnoq ik jư riit varơuq riirh dik.

Ti-mô-thê lơơy, koot dayh jư xok varơuq jah pahnăp ka koot, chuh xangưưy taleq apok taboon leh ik xung liq, ji kaluh takaay tayaat đnooy nưq laa hlolh xet, đơu taleq adro, vii đnooy vlôh đanưq, heq hooy hyaak trôôk xuum tuôq.

Apôôy vanong plêêk măn kung khơl oh ay.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.