2 Kô-rinh-tô 5:7

1Vii haay xet đaneq atoh apoop hnhư 'laarq vari ku haay, 'ngưq laa ku pơ đơ neq, biq pahyaak ka'lăk, yôôych haay e muuyq hnhư xơy panưk vlôh xing Kơy Plêêk, laa hnhư đơơy đơơy tol kaluh tal plêêk, leh jo ti koot manih dơơp vlôh. 2Ji dik, haay tanguh alo đom apoop hnhư neq, đong tuôôy takôô jah kahliik athêêp muut aduq măn ku haay xing tol plêêk, 3ji axit vlôh atoh heq hlưp yôôch, yôôych haay hnoq leh biq hloq laa kaluk kala. 4Ji dik, laa khơl manih đong măn đom pơ đơ neq, haay tanguh alo vii chiuq pơơl hwơơl, vii kơq varơuq nưq đơu haay leh xung biq leh ka'lăk, bơh jah kahliik athêêp muut, xôq kaluh thưq xatyauq 'laarq varơuq kaxêêt hnoq ik biq luôôt hlơơp bơyh varơuq riirh. 5Panưh kadrơy, Kơy heq ralauq haay ka jơq varơuq neq laa Kơy Plêêk, laa Kơy heq kahniq ka haay varơuq dơơp xanưk ku Kơy Phool Hiel. 6Jo nưq, ju hloay hloay kôk dik yôôych 'miêh xet đaneq tuôôy măn hnhư đom xăk xamơk neq, haay đong kach xangưưy klơlh Lôôk — 7vii haay tawaak hooy bơyh xuum tuôq, leh bơyh varơuq hloq ik. 8Măn 'wot kưq kôk dik ji hlah xuum long kach xangưưy klơlh xăk xamơk neq ji măn hnhư dii Lôôk yôôych iaq. 9Lunưq, 'wot dêq xuum dêq paraat xôq jah hlah xuum Lôôk, ju măn đom hnhư long kach xangưưy. 10Vii varơuq dăt băt đôôyq dii dêq hloay haay laa pheq biq kahnoq vlôh adroyq ngôôy xưh xadrah ku Lôôk Wơơt Dêh, xôq ka tôôy adro hnoq ik nhonq hlê kaluh kajoq taxưngq dii kaluh varơuq đơu xăk heq dưk dơơp gamưh xăk xamơk, hnoq ik laa tolh long xơuq.

11Jo nưq, vii xet varơuq đangq kuh yôq ku Lôôk, 'wot xok xuum manih oot. Măn 'wot jah Kơy Plêêk xet hlolh, đơu gô kung takôô gamưh jah xet hlolh đom xuum klaak ku oh ay. 12Leh aalq 'wot laay đong kahnoq vlôh kadih xăk dii oh ay, bơh laa đong ăm oh ay muuyq kawah pa ưưt vii kơq 'wot, xôq oh ay hnoq ik e apok tơơl hlê deng ka khơl adro pa ưưt akhwoak aduq kaveeh pi gôk đơu leh aalq đom xuum. 13Vii atoh 'wot e vlôh adruôy, nưq laa vii Kơy Plêêk; atoh 'wot e talăng jăk, nưq laa vii oh ay. 14Bơyh xung xiaq ku Lôôk Wơơt Dêh rôp băt 'wot, atêq tuôôy 'yo hloq varơuq neq: nưq laa muuyq adro heq kaxêêt thay ka tôôy adro, lunưq, tôôy adro heq kaxêêt. 15Kadraq heq kaxêêt thay ka tôôy adro, xôq khơl leq đong riirh be măn riirh vii kadih xăk đnoyq, bơh laa vii Kơy heq kaxêêt thay oot ji heq jah khienq riirh hlê. 16Lunưq, xing juneq, 'wot leh măn xet kơyq tyauq xăk xamơk. Pheq đnooy ju 'wot heq hmưq nhonq xet Lôôk wơơt Dêh tyauq xăk xamơk, bơh juneq, 'wot leh măn nhonq xet Kadraq tyauq kach nưq đnoyq. 17Vii anưq, atoh akơyq măn đom Lôôk Wơơt Dêh yôôych laa muuyq koot manih đơơu. Kaluh varơuq duut heq dalơh hooy; 'yo hơq, kaluh varơuq đơơu heq truh. 18Lunư, dêq hloay kaluh varơuq neq vlôh xing Kơy Plêêk, laa Kơy heq dơơp tagu hlê haay dii kadih Kadraq gamưh Lôôk Wơơt Dêh ji heq pahnăp ka 'wot varơuq dơơp tagu hlê neq, 19đaji laa Kơy Plêêk măn đom Lôôk Wơơt Dêh, tuôôy tagu hlê dêh araak dii Kadraq, leh jauq kaluh kadrôôp maroh ku oot tachơơl hlê dii oot, ji heq xôq đom 'wot đaauq tagu hlê nưq.

20Jo nưq, 'wot laa khơl jah patăk thay mot Lôôk Wơơt Dêh, đaji laa Kơy Plêêk đong tawooyh taayh gamưh 'wot: 'Wot apôôy vôôch thay mot Lôôk Wơơt Dêh: “Dayh jah tagu hlê dii Kơy Plêêk!” 21Kadraq heq khienq Kơy heq be nhonq xet kadrôôp maroh jêêk vlôh kadrôôp maroh thay ka haay, xôq haay jah jêêk vlôh varơuq hyioh jăk ku Kơy Plêêk đom Kơy nưq.