2 Kô-rinh-tô 4

1Vii kơq varơuq nưq, tuôôy jư varơuq dơơp neq tyauq đaji mưk nưq đơu 'wot heq jah angơuq, 'wot be galeh galal gưlh xuum. 2Tađôôy muut đnư, 'wot heq ka'lăk kaluh thưq đangq kamưưl padu kinq, tuôôy be xa măn đom varơuq va ih va oop, kung leh đnooy bơyq apok Kơy Plêêk, bơh laa xing varơuq đnooy vlôh varơuq dik, kahnoq vlôh kadih xăk ka xuum klaak tôôy manih kangưưr Kơy Plêêk. 3Bơh pheq đnooy atoh Hêêl Kaxay ku 'wot e biq kariik kađoq, yôôych nưq laa heq biq kariik kađoq đom katul khơl adro hư hlơơp, 4đơu đom katul bing oot, vangưl đơơy neq heq dơơp apul ngook biit ku khơl adro lưp tuôq nưq, truh nôôy xaraar tađnah Hêêl Kaxay tađnah tađnaak ku Lôôk Wơơt Dêh, Kơy laa long lơuq ku Kơy Plêêk, be xaraar ahnhe tol oot. 5Vii 'wot leh padoh taboon kadih xăk, bơh laa Lôôk Wơơt Dêh Jê-xu, 'ngưq laa Lôôk, măn kadih xăk 'wot đaji khơl xapok ku oh ay vii kơq Lôôk Jê-xu. 6Vii Kơy Plêêk, Kơy heq xanoh: “Xaraar tađnah hnoq xaraar ahnhe xing pi 'lăp kamơng jaluk,” laa Kơy heq xaraar ahnhe đom xuum 'wot wih truh varơuq 'mek tađnah varơuq hlolh xet truh tađnah tađnaak ku Kơy Plêêk aduq kangưưr Lôôk Wơơt Dêh Jê-xu.

7Bơh 'wot tađnưk kuah bauq neq đom kaluh apoop wo vari dik, xôq varơuq kôt karôq galơh hloay ku taay yaak nưq laa xing Kơy Plêêk, leh aalq xing 'wot; 8laa khơl manih chiuq ahnek ahnen đom tôôy panưh, bơh leh biq kateep; biq xôôl dôôl, bơh leh gưlh xuum; 9biq rôp toop, bơh leh biq qwel ka'lăk; biq hmơt gưlh, bơh leh kaxêêt hlơơp; 10hloay taway đom xăk xamơk 'wot varơuq kaxêêt ku Lôôk Jê-xu hooy loch aduq, xôq varơuq riirh ku Lôôk Jê-xu kung hnoq ik jah kahnoq vlôh đom xăk xamơk 'wot; 11vii ju đong riirh, 'wot hloay biq nôôp ka varơuq kaxêêt vii kơq Lôôk Jê-xu, xôq varơuq riirh ku Lôôk Jê-xu kung jah kahnoq vlôh đom xăk xamơk xatyauq 'laarq varơuq kaxêêt ku 'wot. 12Đanưq, varơuq kaxêêt dưk dơơp đom 'wot, măn varơuq riirh yôôych măn đom oh ay. 13Bơh tuôôy e kung muuyq xuum klaak ku xuum tuôq tyauq apok heq valơk: “Gô tuôq, lunưq gô đnooy,” 'wot kung tuôq, lunưq 'wot kung đnooy, 14vii xet đaneq Kơy heq khienq Lôôk Jê-xu riirh hlê kung hnoq khienq 'wot riirh hlê dii Lôôk Jê-xu, ji hnoq kahnoq 'wot kung dii oh ay. 15Dik, tôôy varơuq nưq laa vii kơq oh ay, xôq vanong plêêk, atêq tuôôy athêêp tok hlê 'ngưng manih iaq, hnoq ik khienq varơuq kuh kway truh mưk raah jôh deng ka tađnah tađnaak ku Kơy Plêêk.

16Anưq, 'wot be galeh galal gưlh xuum. Lunư, pheq đnooy atoh manih pi gôk ku 'wot đong biq karaq ravoch , nưq bơh manih pi 'lăp ku 'wot đong jah dơơp đơơu tôôy muuyq hngơy. 17Vii pơơl hwơơl ahyơơl tơơp ma jơy ku 'wot đong xagook hlê ka 'wot muuyq tuôông tađnah tađnaak đơơy đơơy, leh kajoq galơh, leh kajoq taso ik, 18tuôôy 'wot leh tabông 'yo kaluh varơuq hloq ik, bơh laa kaluh varơuq leh hloq ik. Vii kaluh varơuq hloq ik laa ma jơy, măn kaluh varơuq leh hloq ik laa đơơy đơơy.