2 Kô-rinh-tô 3

1E jơq 'wot laay xarôp vado kadih xăk? Long đaji muuyq sôôq adro, be aleq 'wot duh thư jơyq thiuq atăq truh oh ay long xing oh ay? 2Kadih oh ay laa hla thư ku 'wot, heq jah valơk đom xuum 'wot, jah tôôy adro xet ji đok, 3vii jah kahnoq vlôh ro raang đaneq oh ay laa hla thư ku Lôôk Wơơt Dêh, heq jah 'wot văch xiap, leh aalq jah valơk bơơn phôôm bơh bơơn Kơy Phool Hiel ku Kơy Plêêk hloay riirh, be aalq tol kapah phơu, đơu laa tol kapah xuum bơơn hlek. 4Panưh kadrơy, gamưh Lôôk Wơơt Dêh, 'wot e xuum tuôq kajưk đanưq đôôyq dii Kơy Plêêk. 5Leh aalq vii 'wot e đu paraat xing aduq kadih xăk xôq biit đaji laa muuyq varơuq leq nưq laa raak play xing kadih xăk. Tađôôy muut đnư, paraat ku 'wot vlôh xing Kơy Plêêk, 6laa Kơy kung heq khienq 'wot e paraat dơơp manih hơu varơuq ku tavek đơơu, leh aalq bơơn chư valơk, bơh laa bơơn Kơy Phool Hiel; vii chư valơk păk kaxêêt, măn Kơy Phool hiel khienq ka riirh. 7Panưh kadrơy, atoh varơuq dơơp ku varơuq kaxêêt — jah akleh aklek bơơn chư tol phơu — heq jah kahnoq vlôh đom tađnah tađnaak, truh nôôy koot xau I-sơ-ra-ên leh e paraat 'yo hyioh muut mamưưt Môi-se vii kơq tađnah tađnaak biq hlơơp ku mamưưt kơy, 8yôôych be aalq varơuq dơơp ku Kơy Phool hiel hnoq kahnoq vlôh đom tađnah tađnaak kang 'ngưng iaq xet taleq? 9Vii atoh tađnah tađnaak măn deng ka varơuq dơơp ku varơuq xưh xadrah, yôôych varơuq dơơp ku varơuq hyioh jăk kang galơh galaay tađnah tađnaak 'ngưng iaq đnoyq! 10Dik, vii varơuq heq hmưq jah tađnah tađnaak yôôych leh jah tađnah tađnaak đom varơuq neq, vii kơq varơuq tađnah tađnaak galơh yơơt iaq. 11Vii atoh varơuq biq hlơơp heq truh dii tađnah tađnaak, yôôych varơuq hloay măn hnoq truh đom tađnah tađnaak kang 'ngưng phon iaq!

12Jo nưq, tuôôy e xuum takôô gamưh đanưq, 'wot nămq xok ưu thêq dii xuum thier kôk dik, 13ji leh dang đaji Môi-se, kơy heq biit đơ muuyq tômq vaayh tok tol mamưưt kơy wih truh varơuq leh xôq koot xau I-sơ-ra-ên 'yo hyioh muut lôôch dik ku tađnah tađnaak biq hlơơp. 14Lunư, xuum klaak oot heq biq găk golh, vii dong truh hngơy neng, kung muuyq tômq vaayh nưq hloay e măn tol varơuq đok tavek duut, vii leh jah wơh luh, nưq laa bơyh đom Lôôk Wơơt Dêh, ni đơơu biq hlơơp . 15Bơh anưq, dong truh hngơy neng, long tuôôy leq ganuun Môi-se jah đok, yôôych muuyq tômq vaayh klum tok xuum oot, 16măn atoh tuôôy leq akơyq nưq wih wiit xuq Lôôk, yôôych tômq vaayh nưq jah xagook hooy. 17Panưh kadrơy, Lôôk laa Kơy Phool Hiel, ji Kơy Phool Hiel ku Lôôk măn 'leq, yôôych e rayơh rayơơy măn đnư. 18Măn dêq hloay haay, dii mamưưt leh biit đơ, xaraar jaraak tađnah tađnaak ku Lôôk, yôôych đong jah tađôôy đơơu jêêk vlôh kung muuyq long lơuq xing tađnah tađnaak truh tađnah tađnaak, dang đaji xing Lôôk, laa Kơy Phool Hiel.