2 Kô-rinh-tô 2

1Vii gô heq 'yo hloq varơuq neq laa tolh ka kadih xăk xôq leh truh dii oh ay yưk tra đom varơuq hlu rơu. 2Bơyh atoh kadih xăk gô dơơp oh ay hlu rơu, yôôych akơyq laa adro dơơp ka gô hlah hlaak, atoh leh aalq adro biq gô dơơp ka hlu rơu? 3Ji gô heq valơk kung muuyq varơuq đaneq, xôq atêq tuôôy truh, gô klơlh tavơh varơuq hlu rơu xing khơl adro đơu đangq vlôh gô pheq hlah hlaak, vii heq xôq xuum tuôq aduq dêq hloay oh ay đaneq xuum hlah ku gô laa xuum hlah ku dêq hloay oh ay. 4Vii vlôh xing đơơt pơơl hwơơl kôt lơyq ji xuum klaak kagul kaxul, gô heq valơk ka oh ay bơơn 'ngưng daak mot, leh aalq xôq oh ay biq hlu rơu, bơh laa xôq oh ay hnoq ik nhonq vlôh xuum xung xiaq đơu gô e deng ka oh ay muuyq kach raah jôh iaq.

5Bơh atoh adro leq heq dơơp hlu rơu, yôôych adro nưq heq dơơp hlu rơu leh vơ ka gô, đơu măn tol muuyq phon leq nưq — đnooy đanưq laa xôq gô leh rahloot gengq parêq tol dêq hloay oh ay. 6Hmơt dook nưq deng ka adro đanưq bơyh phon karôp oh ay laa đu yôôch, 7lunưq, wih hlê laa oh ay duh tha ka'lăk ji hlơq hlôôp ay nưq yôôych iaq, te be truh mưk leq nưq, adro đanưq hnoq ik biq nhonq karăp đom đơơt hlu rơu thier galơh ku ni. 8Lunưq, gô ahmưk nhăk oh ay dayh kahnoq vlôh xuum xung xiaq đôôyq dii adro nưq. 9Dik, gô kung heq valơk vii kakơq neq: xôq gô hnoq ik xet jah bơơn xanưk dưk dơơp aduq oh ay, tabơh oh ay e tameng apok đom tôôy varơuq long be. 10Panưh kadrơy, đôôyq dii adro đơu oh ay tha ka'lăk muuyq varơuq kajoq nưq, yôôych gô kung anưq — vii hloay kaah gô, đôôyq dii adro đơu gô heq tha ka'lăk (atoh gô heq tha ka'lăk muuyq varơuq kajoq nưq), nưq laa vii ich lơơy deng ka oh ay duq kangưưr Lôôk Wơơt Dêh, 11xôq ka haay klơlh biq Sa-tan aluut pa ôôh, vii be aalq haay leh xet kajoq truh kaluh varơuq xôq vih ku ni.

12Bơh, atêq tuôôy hooy truh Trô-ach, ji ju muuyq poop 'mok ka Hêêl kaxay ku Lôôk Wơơt Dêh heq jah luh vlôh ka gô đom Lôôk, 13bơh gô heq be e varơuq ahyơơl tơơp đom danưng kooy gô, vii gô heq leh tavơh ik Tit, adro oh ay ku gô. Lunư, atêq tuôôy aklah xing oot, gô dưk hooy truh Ma-xê-đoan.

14Anưq yôôch, kuh kway Kơy Plêêk, laa Kơy hloay hloay jarooy 'wot hooy jưq phon kach jah jay đom Lôôk Wơơt Dêh, ji gamưh 'wot, kahnoq vlôh muuy thơơm truh varơuq nhonq xet Kadraq măn tôôy aduq. 15Vii đôôyq dii Kơy Plêêk, 'wot laa muuy thơơm ku Lôôk Wơơt Dêh katul khơl adro jah wơơt ji katul khơl adro hư hlơơp — 16ju đôôyq dii khơl adro neq, laa muuy vlôh xing varơuq kaxêêt xôq wih truh varơuq kaxêêt, bơh đôôyq dii khơl adro kadrơy, laa muuy thơơm vlôh xing varơuq riirh xôq wih truh varơuq riirh. Kơyq đu paraat ka kaluh varơuq neq? 17Vii 'wot leh dang đaji 'ngưng adro tabôôt tek apok ku Kơy Plêêk vii lơơy, bơh đaji bơyh xuum dong dik paxa rêh, đaji laa xing Kơy Plêêk, 'wot padoh taboon kangưưr Kơy Plêêk đom Lôôk Wơơt Dêh.