2 Kô-rinh-tô 6

1Panưh kadrơy, đong tuôôy kung dơơp varơuq dii Kadraq, 'wot kung apôôy vôôch oh ay te nhonq vanong plêêk ku Kơy Plêêk kach đaji hloh — 2vii Kadraq xanoh:

“Đom tuôôy jah nhonq, gô heq đong tameng xôq tơơl hlê koot,

ji đom hngơy wơơt xok, gô heq wơơt waak koot.”

“Hơq, juneq laa tuôôy hlah nhonq. Hơq, juneq laa hngơy wơơt xok.” —

3bơơn kach leh dơơp kơq xatôôlh lôp đom paq kê varơuq kajoq, xôq varơuq dơơp ku 'wot klơlh biq đnooy toah, 4Tađôôy muut đnư, đom tôôy varơuq, 'wot kahnoq vlôh kadih xăk đaji khơl xapok ku Kơy Plêêk: đom varơuq chiuq uunq thier kôt, đom 'ngưng pơơl dal, đom 'ngưng pơơl hwơơl, đom đơơt parêq parơh, 5đom kaluh hlêêl panoon, đom aduq hnhư karuk, đom aduq paloanq, đom varơuq pơơl hwơơl, đom kaluh klôôy leh ik vik, đom kaluh đơơt pangoot hrah, 6đom varơuq paxa rêh, đom varơuq hlolh xet, đom varơuq atuq xuum, đom varơuq hwêêt xuum, đom Kơy Phool Hiel, đom xuum xung xiaq dong dik, 7đom apok varơuq dik, đom taay yaak ku Kơy Plêêk; gamưh kaluh khêêl jaauq hyioh jăk aduq ti akoh ji ti akeng, 8xing tađnah tađnaak hloay nhuk dik, xing apok xơuq hloay apok kaxay; đaji adro aluut pa ôôh, đơu laay đangq tuôq gamưh; 9đaji be ik xet truh, đơu laay jah 'ngưng adro nhonq xet; đaji jeq kaxêêt, đơu — hơq! — măn riirh; đaji chiuq hmơt dook, đơu laay leh biq păk kaxêêt; 10đaji chiuq hlu rơu, bơh hloay hlah hlaak; đaji adrah pơơl, bơh dơơp ka 'ngưng adro jêêk vlôh karoh; đaji be e kajoq, đơu laay heq jah tôôy varơuq.

11Oh ay manih Kô-rinh-tô lơơy, vel 'wot heq luh vlôh đôôyq dii oh ay; xuum 'wot heq jah luh ranưh. 12Leh aalq oh ay biq bo vek bơyh 'wot, bơh oh ay biq bo vek bơyh xuum oh ay; 13lunưq đom varơuq bla hlê dong xađong — gô đnooy đaji dang dii on oh — oh ay kung dayh xôq kadih xăk jah luh ranưh vlôh.

14Te chiuq pơq varaq leh achung dii khơl adro be tuôq, vii varơuq hyioh jăk ji lưp ganuun e varơuq dơơp raa kajoq? Long xaraar tađnah dii kamơng jaluk e varơuq anguk achung leq? 15Lôôk Wơơt Dêh dii Bê-li-an e varơuq tagu kajoq? Long manih tuôq e phon kajoq achung dii adro leh tuôq? 16Hnhư hơu ku Kơy Plêêk kung dii vangưl e varơuq tagumq kajoq? Vii haay laa hnhư hơu ku Kơy Plêêk hloay riirh, dang đaji Kơy Plêêk heq xanoh đaneq:

“Gô hnoq măn ji hooy hlê hooy hooy đom katul oot;

Gô hnoq laa Kơy Plêêk ku oot,

ji kadih oot hnoq laa tamooy Gô.”

17Lunưq,

“Dayh hooy vlôh xing katul bing oot

ji chiuq aklah vlôh dii oot,” Lôôk xanoh,

“ji te đungq truh tuôông klơơr 'yêq,

yôôch Gô hnoq đoonq nhonq êêp koot.”

18Ji

“‘Gô hnoq laa Vaq đôôyq dii êêp koot,

ji êêp koot hnoq laa koot kanau, koot kadrê đôôyq dii Gô,’

Lôôk Taay Yaak xanoh.”