2 Kô-rinh-tô 7

1Jo nưq, wơơy oh ay xung xiaq, vii e kaluh apok tavek nưq, haay dayh paxa rêh kadih xăk klơlh tôôy 'moh nhơy ku xăk xamơk ji danưng kooy, tuôôy dơơp varơuq paxa rêh jêêk xaleep đom varơuq kuh yôq Kơy Plêêk.

2Dayh deng aduq ka 'wot! 'Wot heq be dơơp ra ơơh muuyq akơyq; 'wot heq be dơơp pa hư muuyq akơyq; 'wot heq be aluut muuyq akơyq. 3Gô leh đnooy xôq wih truh varơuq xưh xadrah oh ay; vii gô heq hmưq đnooy adroyq đaneq oh ay măn đom xuum 'wot, xôq kung mamuuyq kaxêêt ji kung mamuuyq riirh. 4Varơuq tuôq gamưh ku gô aduq oh ay yôôych 'ngưng; xuum pa ưưt ku gô truh oh ay yôôych kôt. Gô heq jah galơh galaay varơuq ahmưk nhăk. Gô jah thier 'ngưng xuum hlah neq đom tôôy pơơl hwơơl ku 'wot.

5Vii hloay kaah atêq tuôôy gô hooy truh Ma-xê-đoan, xăk xamơk 'wot heq be e varơuq padơy axit leq, bơh biq pơơl hwơơl đom tôôy panưh — 'ngưng tahmơt tayaat pi gôk, 'ngưng kamo yôq pi'lăp. 6Lunư, Kơy Plêêk, Kơy hlơq hlôôp khơl akơyq ruh rooy, heq hlơq hlôôp 'wot bơơn varơuq Tit truh đnen, 7đơu leh vơ xing varơuq truh đnen ku nhu nưq, bơh măn xing varơuq ahmưk nhăk đơu nhu nưq heq jah hlơq hlôôp măn aduq oh ay, tuôôy taboon ka 'wot truh xuum trôôch takôô ku oh ay, varơuq nhim alo ku oh ay, xuum talăng jăk ku oh ay vii kơq gô, ka pheq đnooy gô kang jah hlah hlaak iaq đnoyq.

8Vii pheq đnooy atoh gô dơơp ka oh ay hlu đom thư, yôôych gô leh biit alay 'leq. Pheq đnooy atoh gô 'miêh biit alay (gô hloq đaneq hla thư nưq heq dơơp oh ay hlu, ju vơ đom muuyq jơy), 9yôôych juneq, gô hlah hlaak, leh aalq vii oh ay heq biq hlu rơu, bơh vii oh ay heq biq hlu rơu xôq wih truh varơuq wiit xuum. Vii oh ay heq biq hlu rơu tyauq Kơy Plêêk, xôq ka oh ay hnoq ik be chiuq ra ơơh đom paq kê varơuq kajoq xing aduq 'wot. 10Bơyh varơuq hlu rơu tyauq Kơy Plêêk dơơp yuôôr varơuq wiit xuum xôq wih truh varơuq wơơt xok đơu leh huq alay. Bơh varơuq hlu rơu ku dêh araak yôôych xagook truh varơuq kaxêêt. 11Vii 'yo hơq, kung varơuq dơơp nưq, tuôôy jah dơơp ka hlu rơu tyauq Kơy Plêêk, yôôych heq xagook hlê đom oh ay xuum talăng jăk xet taleq: măn e varơuq đnooy bing đaleq, varơuq tôq tơh đaleq, varơuq kuh yôq đaleq, xuum trôôch takôô đaleq, xuum tôq dayh đaleq, varơuq ta'meq dook đaleq! Đom tôôy varơuq, oh ay heq kahnoq vlôh xăk laa xarêh xaraat truh đom varơuq neq. 12Lunưq, pheq đnooy ju gô heq valơk ka oh ay, yôôych leh aalq vii kơq manih heq dơơp varơuq lưp troq, long vii kơq manih heq biq dơơp ra ơơh, bơh laa vii kơq xuum talăng jăk ku oh ay, 'ngưq laa varơuq thay mot 'wot, heq jah kahnoq vlôh ka oh ay kangưưr Kơy Plêêk. 13Gamưh varơuq neq, 'wot heq jah ahmưk nhăk.

Panưh kadrơy, đôôyq dii varơuq ahmưk nhăk ku kadih xăk, 'wot heq kang jah mưng me 'ngưng iaq aduq hlah hlaak ku Tit, vii danưng kooy ku nhu nưq heq jah dơơp ka ahyơơl tơơp bơyh dêq hloay oh ay. 14Vii atoh gô hmưq pa ưưt varơuq kajoq dii nhu nưq truh oh ay, yôôych gô heq be huq kamưưl, bơh đaji tôôy varơuq 'wot heq đnooy dii oh ay đom varơuq dong dik, yôôych apok pa ưưt vlôh ku 'wot kung heq jah kahnoq vlôh varơuq dong dik đanưq đôôyq dii Tit. 15Ji xuum xung xiaq ku nhu nưq deng ka oh ay yôôych raah jôh iaq đnoyq, tuôôy văch hlê varơuq tameng apok ku dêq hloay oh ay, đaleq đơu oh ay heq đoonq tiip nhu nưq dii varơuq kamo yôq ji padrau padrik. 16Gô hlah hlaak vii gô tuôq gamưh aduq oh ay đom tôôy varơuq.