1 Kô-rinh-tô 5

1Varơuq dong dik jah tameng đnooy măn đom katul oh ay laa muuyq varơuq apuq atrăp, ji kiêuh apuq atrăp đanưq laa varơuq pheq đnooy leh e đom katul kaluh tamooy kadrơy — truh mưk đơu muuyq adro hơq xok kadrê ku vaq ni. 2Măn oh ay yôôych măn katơơk galơh, laay kơn be lưp nhim ook kajoq, xôq ka adro heq dơơp varơuq nưq hnoq ik biq ka'lăk vlôh klơlh đom katul oh ay. 3Vii gô, ju xangưưy đom xăk xamơk bơh hloay e đom danưng kooy, heq xưh xadrah adro lôp kadrôôp dang anưq yôôch, đaji laa đong e mot kađnư. 4Đom yal Lôôk haay, laa Lôôk Wơơt Dêh Jê-xu, tuôôy oh ay heq jah nhomq anguk hlê, kung danưng kooy ku gô, dii taay yaak ku Lôôk haay, laa Lôôk Jê-xu, 5xôq pahnăp adro nưq ka Sa-tan xôq chiuq varơuq păk kaxêêt xăk xamơk, aleq ka phool hiel adro nưq hnoq ik jah wơơt đom hngơy ku Lôôk. 6Varơuq pa ưưt akhwoak ku oh ay be tolh kaxay kajoq. Oh ay leh xet đaneq muuyq takiêh tape dơơp vôô dêq ka kuk bôôt ih? 7Dayh pa xarêh tape duut, xôq oh ay hnoq ik laa kuk bôôt đơơu, dang đaji oh ay laa tôôp leh tape. Vii Lôôk Wơơt Dêh, laa trưưu koot Lêh Dalơh Hlê ku haay, kung heq biq păk kaxêêt dơơp kuah lêh. 8Lunưq, haay duh jưq lêh, leh aalq dii tape duut, kung be aalq dii tape pa ôôh lar ji xơk tauq, bơh laa dii tôôp leh tape ku varơuq dong dik ji varơuq dik.

9Đom thư gô heq valơk ka oh ay laa te xa agưt dii bing apuq atrăp — 10long anưq leh aalq khơl adro apuq trăp ku dêh araak neq, long laa khơl adro hmưch trôôch ji aluut pa ôôh, long khơl adro akuh vangưl, vii đanưq, oh ay duh pheq hooy vlôh klơlh dêh araak. 11Bơh đaji juneq, gô heq valơk ka oh ay te xa agưt dii paq kê adro leq jah taayh laa oh ay đơu laa adro apuq atrăp, hmưch trôôch, akuh vangưl, ragơy karoay toah, vuul weel, long pa ôôh aluut; pheq đnooy kung te xa achung dii muuyq adro đanưq. 12Vii xưh xadrah khơl adro măn pi gôk tapiq kajoq truh gô? Oh ay leh xưh xadrah khơl adro măn pi 'lăp ih? 13Bơh Kơy Plêêk hnoq xưh xadrah khơl adro pi gôk hơq.

“Dayh dơyh ka'lăk varơuq xơk tauq klơlh katul đom oh ay.”