Skip to content
BibleKenya

Cua Bible Literal Text

1 Kô-rinh-tô 4

Jo nưq, tôôy adro dayh 'yo 'wot đaji khơl xapok ku Lôôk Wơơt Dêh ji khơl adro xakaq 'yo kaluh varơuq kadook ku Kơy Plêêk. Măn varơuq ka đnen, nưq laa varơuq jah đooy vôôch aduq khơl adro xakaq 'yo laa aleq ka tôôy adro jah hloq laa muuyq xuum. Bơh varơuq neq laa varơuq thier de de đôôyq dii gô, ju ka gô hnoq ik biq vôôch 'yo xing oh ay long xing hnhư xadrah ku koot manih. Panưh kadrơy, gô kung leh kadih xưh xadrah kadih gô. Vii gô nhonq hloq be e varơuq kajoq tachơơl hlê kadih gô, lunư gô leh ik xưng hyioh jăk gamưh varơuq nưq; bơh Lôôk laa Kơy xưh xadrah gô. Lunưq, te xadrah đnooy varơuq kajoq adroyq tuôôy đinq, laa truh tuôôy Lôôk truh, laa Kơy vơơ hnoq kahnoq kaluh varơuq padu kadook ku varơuq kamơng jaluk vlôh xaraar tađnah, vơơ hnoq kahnoq vlôh kaluh iq đinq đom xuum. Yôôch muut tuôôy nưq, varơuq ayuôôt laat xing Kơy Plêêk hnoq truh dii tưng adro.

Wơơy oh ay, gô heq xok dơơp kaluh varơuq neq đôôyq dii kadih gô ji A-bô-lô vii ich lơyq ku oh ay, xôq gamưh 'wot, oh ay hnoq ik hok xet apok neq:

“Te dalơh iaq apok jah valơk,”

xôq ka leh muuyq adro leq atok xăk katơơk galơh taayh yal adro neq tachơơl hlê adro hơq. Vii kơyq ahlook aklah oh ay vlôh đêh mamuuyq? Panưh kadrơy, varơuq kajoq oh ay đong e đơu oh ay heq leh nhonq xok? Bơh atoh oh ay heq nhonq, yôôych aleq oh ay pa ưưt akhwoak đaji heq be nhonq? Oh ay yôôych heq jah hlah xuum yôôch! Oh ay heq jêêk vlôh karoh e yôôch! Oh ay heq xarôp dưk xanok đơu leh duh 'wot, ji gô trôôch oh ay dong dik dưk xanok, xôq 'wot kung hnoq ik dưk xanok achung dii oh ay. Vii gô kưq biit Kơy Plêêk heq xôq 'wot vlôh dơơp khơl jah rơơlh lôôch dik, đaji khơl adro biq rôp xadrah păk kaxêêt. Vii 'wot heq jêêk vlôh muuyq varơuq xôq xagiel ka dêh araak — kaah ka yaak plêêk hloay ka koot manih. 'Wot yôôych vlô apoop vii kơq Lôôk Wơơt Dêh, măn oh ay yôôych khôôt xet đom Lôôk Wơơt Dêh. 'Wot ravoch, măn oh ay kalh paraat. Oh ay jah vado, măn 'wot biq 'yo leh ra kajoq. Dong truh juneq, 'wot vơơ chiuq pangoot, chiuq thaal, vơơ xa vâk hyaak hyek, hloay biq tu tiel ra ơơh ra ơy, vơơ leh e aduq măn tơơl dal, hloay dơơp varơuq galeh galal, dơơp varơuq bơơn kadih pla ti 'wot. Tuôôy biq toah axaap, 'wot apôôy vanong; tuôôy biq rôp toop, 'wot chiuq uunq; tuôôy biq pahnhiq, 'wot vali langưưp. 'Wot heq jêêk vlôh đaji kaluh thưq ka'nhah ka'nhau ku dêh araak, ka'nhah 'moh ku tôôy paroh, dong truh hloay juneq.

Gô leh valơk kaluh apok neq xôq dơơp kamưưl oh ay, bơh gô ahmưk pato oh ay đaji koot xung xiaq ku gô. Vii ju oh ay e kahang waan adro jarooy pato đom Lôôk Wơơt Dêh, yôôych kung leh e 'ngưng vaq; vii gô heq pa iir vlôh oh ay đom Lôôk Wơơt Dêh Jê-xu gamưh Hêêl Kaxay. Anưq, gô ahmưk nhăk oh ay dayh jêêk vlôh khơl adro dơơp atôôlh gô. Vii kakơq neq gô patăk Ti-mô-thê hooy, 'ngưq laa adro koot xung xiaq ji muuyq xuum ku gô đom Lôôk, truh dii oh ay, nhu nưq hnoq ahmưk nhăk oh ay truh kaluh trôôk daak ku gô đom Lôôk Wơơt Dêh Jê-xu, dang đaji gô pato dayq đom tưng tayuup vah loch aduq. Lunư, đaji laa vii gô leh truh dii oh ay, lunưq muuyq sôôq adro heq atok xăk katơơk galơh. Bơh gô hnoq meel truh dii oh ay, atoh Lôôk trôôch, ji gô hnoq nhonq xet be aalq apok đnooy ku khơl adro katơơk galơh hơq, bơh laa paraat ku oot. Vii daak dêh Kơy Plêêk leh aalq măn aduq apok đnooy, bơh laa măn aduq taay yaak. Oh ay trôôch kajoq? Gô duh truh kung oh ay dii gay rooy, long dii xuum xung xiaq ji xuum klaak be huq?

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.