1 Kô-rinh-tô 6

1Tuôôy e varơuq tachơơl hlê dii adro kadrơy, kơyq nưq đom oh ay hôôk xôq biq xưh xadrah kangưưr khơl adro leh hyioh jăk, đơu leh aalq kangưưr khơl vah ih? 2Long oh ay leh xet đaneq khơl vah hnoq xưh xadrah dêh araak? Ji atoh dêh araak hnoq biq xưh xadrah bơyh oh ay, yôôych oh ay leh đu paraat truh kaluh varơuq kienq thier ra de neq ih? 3Oh ay leh xet đaneq haay hnoq xưh xadrah khơl yaak plêêk ih? Đnooy kajoq truh kaluh varơuq ku đơơy neq? 4Anưq yôôych, ju oh ay e kaluh varơuq kienq thuôk ku đơơy neq, dơơp aleq oh ay xôq khơl adro nưq 'ngôôy xưh xadrah, 'ngưq laa khơl adro biq 'yo be e phon kajoq đom tayuup vah? 5Gô đong đnooy truh varơuq thier kamưưl ier ku oh ay. Đanưq, dang aleq leh e adro khôôt xet leq đom oh ay, laa adro hnoq ik 'yo xadrah đom katul oh ay haay ih? 6Wih hlê, oh ay neq chiuq palo vlôh xưh xadrah tachơơl hlê oh ay hơq, ji ka varơuq nưq măn kangưưr khơl adro be tuôq? 7Lunưq, ka varơuq neq 'miêh laa leh jay dêq hloay đôôyq dii oh ay yôôch, vii oh ay e kaluh varơuq rôp kienq đom katul kadih oh ay. Vii aleq be tha chiuq thiet? Vii aleq be tha chiuq aluut pa ôôh? 8Lunư, oh ay dưk dơơp leh hyioh jăk ji aluut, yôôch dơơp anưq dii oh ay haay! 9Long oh ay leh xet đaneq adro leh hyioh jăk hnoq be jah nhonq daak dêh Kơy Plêêk? Te xôq biq pa ôôh lar; be adro apuq atrăp, adro akuh vangưl, adro tuut taak, adro xakwoah, adro khơl kanau xok khơl kanau khơl drê xok khơl drê, 10adro xa atôk, adro ham hmưch, adro vuul weel, adro pahnhiq long adro aluut pa ôôh, hnoq nhonq jah daak dêh Kơy Plêêk. 11Ji muuyq sôôq đom oh ay heq hmưq đanưq. Lunư, oh ay heq jah pa xarêh, heq jah tađôôy đơơu, heq jah xưng hyioh jăk đom yal Lôôk, laa Lôôk Wơơt Dêh Jê-xu, ji bơyh Kơy Phool Hiel ku Kơy Plêêk haay.

12“Tôôy varơuq đôôyq dii gô laa ik pheep,” bơh leh aalq tôôy varơuq taway truh e ich. “Tôôy varơuq đôôyq dii gô laa ik pheep,” bơh gô hnoq leh biq dơơp xapok bơyh paq kê varơuq kajoq. 13“Tuôông xa deng ka vaduk, ji vaduk deng ka tuôông xa,” bơh Kơy Plêêk hnoq pahyaak ka'lăk hloay ưng neq hloay ưng hơq. Bơh xăk xamơk leh aalq deng ka varơuq apuq atrăp, đơu deng ka Lôôk, ji Lôôk deng ka xăk xamơk. 14Kơy Plêêk heq khienq Lôôk riirh hlê, kung hnoq khienq haay riirh hlê bơyh taay yaak ku Kadraq. 15Oh ay leh xet đaneq xăk xamơk haay laa chi thêêh ku Lôôk Wơơt Dêh ih? Anưq yôôych, atêq tuôôy xok chi thêêh ku Lôôk Wơơt Dêh, gô duh dơơp ni jêêk chi thêêh ku adro xakwoah be? Leh dong leq e varơuq nưq! 16Long oh ay leh xet đaneq adro tabich kadih ni dii adro xakwoah laa muuyq hlek dii ni? Vii e valơk: “Vaarq adro hnoq jêêk vlôh muuyq hlek.” 17Bơh kơyq tabich kadih ni dii Lôôk yôôych laa muuyq danưng kooy kung Kadraq. 18Dayh chuh xangưưy varơuq apuq atrăp! Tôôy kadrôôp đơu khơl kadrơy lôp e be laa măn pi gôk xăk xamơk, bơh adro dơơp varơuq apuq atrăp yôôych lôp kadrôôp dii kadih xăk xamơk ni. 19Long oh ay leh xet đaneq xăk xamơk oh ay laa hnhư hơu ku Kơy Phool Hiel măn đom oh ay, laa Kơy đơu oh ay nhonq xing Kơy Plêêk? Ji oh ay be thuôk xuq kadih oh ay, 20vii oh ay heq jah root bla bơơn jaq kanaq yôôch. Vii anưq, dayh dơơp tađnah tađnaak Kơy Plêêk bơơn xăk xamơk oh ay.