Cingthuilawknaw 22

1Hnopai moikapap hlak hai minhawinae heh rawi hanelah ao,

tangka hoi sui hlak hai ayâ ni pahrennae heh

ngaihnawn hanelah ao.

2Tami ka tawnta hoi tamimathoe rei a tawn roi e teh,

BAWIPA teh bangpueng kasakkung doeh.

3Kâhruetcuet e ni teh hnokathout a hmu navah a kâhro,

hatei kamawngrame ni teh a ceisin teh rek e lah ouk ao.

4Kârahnoumnae hoi BAWIPA takinae ni tawntanae hoi

barinae hoi hringnae a tâcokhai.

5Lam longkawi dawk teh pâkhing hoi karap ao teh,

a hringnae lamthung ka ring e teh

hotnaw hoi ahlanae koe doeh ao.

6Camo ni a dawn hane lamthung pâtu haw,

a matawng to hai phen mahoeh toe.

7Tami ka tawnta ni tamimathoe a uk,

ka câwi e tami teh kacâwisakkung koe san lah ao.

8Payonpakainae cati ka tu e ni lungmathoenae a a vaiteh,

a lungkhueknae sonron a khoe han.

9Pahrennae mit ka tawn e teh yawhawi a coe han,

bangkongtetpawiteh tamimathoenaw ouk a kawk toe.

10Dudamnaw pâlei haw kâounnae tang a roum han,

kâyuenae hoi kâpakungnae hai a roum han.

11A lungthin ka thoung e teh,

kamcu e lawk a dei dawkvah

siangpahrang e hui kahawicalah ao han.

12BAWIPA mit ni panuenae a kountouk,

hatei yuemnae ka tawn hoeh e lawk teh ouk a takhoe.

13Ka pangak e tami ni alawilah sendek ao,

lam vah na kei han doeh, ouk a ti.

14Napui kahawihoehe pahni teh kadunge tangkom doeh,

BAWIPA ni a panuet e teh hawvah a bo han.

15Pathunae heh camo lungthin dawk a kâbet teh,

yuenae bongpai ni ahlanae koe ouk a pâlei.

16Ma mek nahanelah tamimathoenaw ka rektap e hoi,

katawntanaw ka poe e tami teh hoehoe a mathoe han.

Lungangnae lawknaw

17Tamilungkaangnaw e lawk heh kahawicalah thai nateh,

na lungthin hoi kaie lungangnae hah dâw haw.

18Bangkongtetpawiteh, na thung hoi na pâkuem pawiteh

hothateh lunghawinae doeh, na pahni dawk pou awm seh.

19Hottelahoi BAWIPA teh na kâuep thai han,

sahnin vah nang koe na panuesak toe.

20Kâpankhainae hoi panuenae kahawi poung e hah

na thut pouh toe nahoehmaw.

21Nang ni lawkkatang katang na panue vaiteh,

nang koe patoun e naw hah lawkkatang lawk

bout na dei pouh thai han.

22Mathoenaw e mathoenae hah thakâla hoi

ahnie hno lawm hanh, ka cunathoehnaw hai

kho longkha koe coungroe hanh.

23Bangkongtetpawiteh, BAWIPA ni ahnimae kong a pouk han doeh,

ahnimae hno kalawmnaw e hringnae a lawp pouh van han.

24A lungkaduem e tami hah kamyawngkhai hanh,

a lungkhuek thai poung e tami hai kamyawngkhai hanh.

25Ahnimae nuen na kamtu vaiteh,

na hringnae a kâman han.

26Kut tambei e taminaw hoi laiba patho pouh hanelah

lawk kâkam e taminaw koe bawk van hanh.

27Patho nahane na tawn hoeh pawiteh,

na ikhun tawm awh vaiteh oun na la pouh awh han nahoehmaw.

28Na mintoenaw ni ung e

khori hah takhoe hanh.

29Thaw kahawicalah ka tawk ni teh ka cuem e na hmu boi ou,

siangpahrangnaw hmalah hai a kangdue han doeh,

tami rumram e hmalah kangdout mahoeh.