Cingthuilawknaw 21

1Siangpahrang lungthin teh tui ka lawng e patetlah ao teh,

BAWIPA kut dawk ao dawkvah, a ngainae koe lah a lawng sak.

2Ma e hmunae dawk teh mae hringnuen heh a lan telah pouk awh,

hatei BAWIPA ni lungthin heh yawcu dawk a khing.

3Lannae hoi kânging lah sak e heh

thuengnae hlak BAWIPA ni a ngaihnawn.

4Kâoupnae minhmai hoi lunglennae lungthin hoi

tamikathoutnaw e hmaiim teh yon doeh.

5Tami ka hratbat e pouknae ni tawntannae a tâcokhai,

hatei kâhruetcuet hoeh e pouknae ni voutnae a tâcokhai.

6Laithoe dei laihoi hmu e hnopai teh

duenae ka tawng ni teh kahmat e patetlah ao.

7Tamikathoutnaw e lawpnae ni amamouh a raphoe han,

bangkongtetpawiteh kânginglah lawkcengnae hah a pahnawt awh.

8Tamikayon e lamthung teh a longkawi,

hatei tamikalan hanelah teh a tawk e hah kalan e doeh.

9Ka hrawang e yu hoi im kalen dawk o hlak teh,

lemphu imtakin koe awm pawiteh bet ahawihnawn.

10Tamikathout hringnae ni hnokathout a ngai,

a imrinaw ni ahnie pahrennae hmawt awh hoeh.

11Kadudame taminaw reknae dawkvah

kamawngrame ni lungang a kâla awh,

hatei tamilungkaangnaw cangkhai navah panuenae a hmu awh.

12Tamikalan ni tamikathout imthung hah kahawicalah a pouk,

hatei Cathut ni tamikathoutnaw teh

amamae thoenae lahoi a tâkhawng.

13Tamimathoe hramnae lawk thai ngai laipalah

a hnâ ka tabuem e teh,

ama hai a hram toteh apinihai thai pouh mahoeh.

14Arulahoi poe e poehno ni lungphuennae,

a lungtabue dawk poe e tadawnghno ni

puenghoi lungkhueknae a roum sak.

15Kalan lah lawkcengnae e teh tamikalan hanelah konawmnae doeh,

hatei yonnae kasaknaw teh rawknae koe a pha awh han.

16Thaipanueknae lam kaphennaw teh

tamikadoutnaw kamkhuengnae koe a kâhat van han.

17Nawmnae dueng ka ngai e teh a mathoe han,

misurtui hoi satui ka ngai poung e teh tawnta mahoeh.

18Tamikathout teh tamikalan hanelah,

Yuemkamcuhoeh e teh tamikalan ratangnae lah ao.

19A lungkaduem ni teh ka hrawang e yu hoi o hlak teh,

ramkenae koe awm pawiteh bet ahawihnawn.

20Tamilungkaang onae koe hno ngai kaawm hoi satui ao teh,

tamipathu ni teh a kaseikasak.

21Lannae hoi lungmanae katawngnaw ni hringnae hoi

lannae hoi barinae ouk a hmu awh.

22Tamilungkaang ni kacakpounge khopui dawk a kâen teh,

khocanaw ni a kângue e rapanim hah a tip sak.

23A laihoi a pahni ka ring e teh runae thung hoi

a hringnae ouk a hlout.

24Tami moikai hoi kâoup e teh a min patenghai

dudamkung telah a phung awh teh,

kâoup lungkhuek laihoi ouk a kâroe.

25Tami ka pangak e teh thaw a tawk ngaihoeh dawkvah,

a doun e ni ama a thei.

26Hnintangkuem nôe laihoi ao, hatei tamikalan niteh

pasai laipalah a poe.

27Tamikathout e thuengnae teh panuet a tho,

hnokathout ngainae lungthin hoi thuengnae teh panuet hoe a tho.

28Kapanuekkhaikung kaphawk teh takhoe lah ao han,

hatei kapanuekkhaikung katang ni a panue e patetlah

a dei e teh dâw lah ao han.

29Tamikathout ni a minhmai tamundun lah a ta,

hatei tamikalan ni a lamthung a cak sak.

30BAWIPA taranlahoi lungangnae, thaipanueknae,

hoi kâpankhainae awm hoeh.

31Marangtan teh tarantuk hnin hanelah rakueng lah ao,

tânae teh BAWIPA e doeh.