Filipotina 4

Pɔɔlʋ tawɩ Filipotina ŋii ba n yɩɛ

1Ma dɔŋa lɩɛdɩra baa maa ja amɩɛ wɩɛ, sɛ maa ja maa na amɩɛ. Amɩɛ n nyina ma asadi na kɩmtʋɔ gaa ma yu ma dɩtʋm naŋ. Dɩmʋŋ dʋɔ ma dɩɛtina, n sɩŋ na doŋ Kpaŋjuo naŋ.

2Maa sʋlʋ Yuwodiya na Sintiki sɛ ba n tawɩ kpa dɔŋa Kpaŋjuo naŋ. 3Sɛ maa sʋlʋ nyaŋ ma dʋɔ dɩtʋm yɩɛrɛ gasiŋteŋtɛ sɛ nya n chɔna dɩmʋŋ ala bana, akala takɩɛ maŋ na ba bʋga yɩɛ dɩtʋm doŋtɛ tawɩ Ɩsʋɔ wɩɛ abama ŋii. Ba na Kilementi na ma dɔŋa dɩtʋm yɩɛra baa ba kakaa sɛ ba sabɩɛ ba yɩrɩɛ nkpa tanɛ gaa naŋ na.

4N yela na a yɩɛ amɩɛ jʋŋ saŋa kʋma Kpaŋjuo naŋ. Ma ti bɔrɛ maa tawɩ amɩɛ sɛ, n yela na a yɩɛ amɩɛ jʋŋ! 5N yela wʋkʋma a na gʋ ɩ fʋʋ. Sɛ Kpaŋjuo bɔrɛ kɔnɛ tirina. 6N baa yɩyɩɛ bʋrʋ garɛ dʋɔ, ama n jɔ dɩga na ɩ sʋlʋ Ɩsʋɔ na ɩ yɩlɩ Ɩsʋɔ bʋrʋkʋma naŋ na, na ɩ mʋ amɩɛ wɩɛ atasɛsa si wʋ asanaŋ. 7Na Ɩsʋɔ a fa amɩɛ wʋsɛfɩɛ gaa ga kii bakpa tie nyii kpiniŋ, na gaa gara amɩɛ agela na amɩɛ nfɩɛrɛ Yesu Kirisito naŋ.

8Dɩtamtɩŋ na, ma dɔŋa lɩɛdɩra, ŋii ŋɩ kakaa na n nyina sɛ bʋrʋkʋma gaa ga yɩɛ gasiŋteŋ, bʋrʋkʋma gaa ga wɩɛ jilima, bʋrʋkʋma gaa ga wɩɛ dieli, bʋrʋkʋma gaa ga yɩɛ chɩrɩchɩrɩ, bʋrʋkʋma gaa gaa su asa, na bʋrʋkʋma gaa ga wɩɛna yɩrɩ bam. Sɛ bʋrʋ garɛ wɩɛ sɛ ga yɩɛ gabam yaa ga daga kalɩɛwʋ na, ŋina dʋɔ sɛ n fa nfɩɛrɛ. 9Bʋrʋkʋma gaa ɩ kpalɩɛna yaa ɩ yu yaa nyii ɩ lɩɩ ma jaŋ, yaa ɩ na ma tɩba na ŋii sɛ n yɩɛ. Na wʋsɛfɩɛ Ɩsʋɔ n kpi amɩɛ dʋɔ.

Pɔɔlʋ yɩlɩ Filipotina lɩɩ gafaasa gaa ba fa ɩ

10Ma asadi fɔɩ Kpaŋjuo naŋ takɩɛ dɩtɩɛna bɩrɛ ma wɩɛ tiri amɩɛ. Ŋɩ wɩɛ tɩba takɩɛ ma wɩɛ tiri amɩɛ bɩrɛ, ama ɩŋ yu gbɩɛ chɔna maŋ ŋ. 11Dɩ n yɩɛ sɛ ma wʋsɛ chaŋ maŋ dʋɔ sɛ maa tawɩ ŋina a, akala takɩɛ ma kpalɩɛna ganaŋkʋ chawʋ kʋma gaa ma wɩɛ ga tɩba na, ga mɩɛ maŋ. 12Ma jiŋ ganaŋkʋ wʋsɛ chaŋ kɩɛna, sɛ ma jiŋ ganaŋkʋ nya wɩɛna abʋrɩ fɔɩ chawʋ naŋ kɩɛna. Ma kpalɩɛna asiri lɩɩna ganaŋkʋ dɩ mɩɛ maŋ chawʋ kʋma naŋ. Hali ma di pa yaa ma dusoŋ naŋ, hali ma wɩɛna abʋrɩ fɔɩ chawʋ naŋ yaa wʋsɛ chaŋ naŋ. 13Maa dɩlɛ pala na Kirisito wʋŋ wʋ fa maŋ doŋ na dʋɔ yɩɛ bʋrʋkʋma.

14Ama ɩ yɩɛ na dieli gʋ ɩ chɔna maŋ saŋa gaa ma wɩɛ awʋrʋfʋɔ naŋ. 15Amɩɛ Filipotina gba jiŋ na dieli gʋ saŋa gaa ɩ chɩŋkpɩɛ nyii Ɩsʋɔ wɩɛ abama, gʋ ma lɩɩ Masidoniya na, lɩɛdɩra dikpeŋ garɛ gba n chɩɛ maŋ bʋrʋ ʋ sɛ maŋ dʋɔ ma n yu bʋrʋ lɩɩ ba jaŋ ŋ amʋɔ amɩɛ nyiŋeŋ. 16Akala takɩɛ hali saŋa gaa ma wɩɛ Tesalonika sɛ ma wʋsɛ chaŋ maŋ na, ɩ yelie maŋ gbɩɛta bʋla. 17Naa gafaasa sɛ maa ja lɩɩ amɩɛ jaŋ ŋ. Ama maa ja sɛ Ɩsʋɔ a yɩɛ amɩɛ kusee bɛ. 18Dɩtɩɛna ma yu bʋrʋkʋma gaa maa jawʋ na kpiniŋ galaŋ. Lɩɩna gʋ ma pam chaŋ afaasa ŋii ɩ mʋ fa Epafuroditusi sɛ wʋ n mʋ kɔna maŋ na dʋɔ, ma wɩɛna bʋrʋkʋma gaa gaa tiri maŋ. Ŋɩ kɩɛna bɛ takɩɛ faa alifeŋsa, gadiesa gaa Ɩsʋɔ lɩɛ dʋ sɛ ga su wʋ asa. 19Ma Ɩsʋɔ aja fa amɩɛ abʋrɩ ŋii ŋɩ tiri amɩɛ na kpiniŋ lɩɩ wʋ akpaŋta jilima ŋii ŋɩ wɩɛ Kirisito Yesu naŋ na.

20Jilima n ju fa Ɩsʋɔ daa Juo gakpaa-gakpaa. Ami.

Yɩlɩ ŋii ŋɩ yɩɛ dɩtamtɩŋ

21N yɩlɩ Ɩsʋɔ bakpa wʋsɛ chɩrɩchɩrɩ baa kpiniŋ Yesu Kirisito naŋ fa maŋ. Ma dɔŋa lɩɛdɩra baa ba wɩɛ ma jaŋ jɩna na gba a yɩlɩ amɩɛ. 22Ɩsʋɔ bakpa wʋsɛ chɩrɩchɩrɩ baa ba wɩɛ jɩna na kpiniŋ a yɩlɩ amɩɛ, fɔŋfɔŋ baa ba wɩɛ Juo Kayisa waa dʋɔ na.

23Sɛ Kpaŋjuo Yesu Kirisito Ɩsʋɔ wɩɩ n kɔŋ amɩɛ kpiniŋ dʋɔ. Ami.1