Kolositina 1

Yɩlɩ

1Tanɛ gana lɩɩ maŋ Pɔɔlʋ wʋŋ Ɩsʋɔ pala na wʋ jawʋ dʋɔ yɩɛ maŋ Kirisito Yesu kpɩrɩdɛ, na Timoti daa dʋɔ lɩɛdɩrɛ jaŋ.

2N mʋ tanɛ gana juna Ɩsʋɔ bakpa wʋsɛ chɩrɩchɩrɩ na daa gasiŋteŋ dɔŋa lɩɛdɩra Kirisito naŋ baa ba wɩɛ Kolosi dɩɛ naŋ na.

Ɩsʋɔ wɩɩ na wʋsɛfɩɛ ŋii ŋɩ lɩɩ Ɩsʋɔ daa Juo jaŋ n kɔŋ amɩɛ dʋɔ.1

Pɔɔlʋ jɔ dɩga yɩlɩ Ɩsʋɔ

3Saŋa kʋma dɩɩ jɔ dɩga dɩɩ yɩlɩ Ɩsʋɔ wʋŋ wʋ yɩɛ daa Kpaŋjuo Yesu Kirisito wʋ Juo dɩɩ fa amɩɛ, 4akala takɩɛ dɩ nyii amɩɛ lɩɛdi Kirisito Yesu naŋ na ganaŋkʋ ɩ ja Ɩsʋɔ bakpa wʋsɛ chɩrɩchɩrɩ kpiniŋ wɩɛ dʋɔ wɩɛ. 5Amɩɛ lɩɛdi na ganaŋkʋ ɩɩ ja bakpa wɩɛ na sɩmɩɛɩ amɩɛ tamaa dʋɔ ŋii Ɩsʋɔ desina si Ɩsʋɔ adugbe fa amɩɛ. Sɛ ɩ fɩla nyii ga dʋɔ wɩɛ lɩɩ baa ba kɔŋ amɩɛ jaŋ gaa tawɩ Ɩsʋɔ wɩɛ abama ŋii na sɛ ŋɩ yɩɛ gasiŋteŋ. 6Ɩsʋɔ wɩɛ abama ŋii yalagi dulunya gapɩlɛkʋma sɛ dɩ yela sɛ bakpa a yɩɛ ayɩɛsa abama takɩɛ ganaŋkʋ ŋii yɩɛ amɩɛ tɩba lɩɩ gɩyɩɛ gaa ɩ nyii wɩɛ abama ŋii, sɛ ɩ nyii Ɩsʋɔ wɩɩ tie na ŋɩ gasiŋteŋ kpiniŋ na. 7Epafirasi daa dʋɔ tʋmɩrɛ wʋŋ dɩɩ ja wʋ wɩɛ sɛ wʋ yɩɛ Kirisito dɩtʋm yɩɛrɛ gasiŋteŋtɛ na, wʋŋ n sɩŋ daa nafara naŋ tawɩ wɩɛ ŋii fa amɩɛ, 8sɛ wʋ ti tawɩ daa ganaŋkʋ Ɩsʋɔ Feliŋ yela sɛ ɩ ja bakpa wɩɛ na.

9Ŋina dʋɔ, lɩɩ wɩɩ gaa dɩ nyii amɩɛ wʋsɛ dʋɔ wɩɛ na, dɩ n yela dɩga jʋɔ fa amɩɛ ɛ, sɛ dɩɩ sʋlʋ Ɩsʋɔ sɛ wʋ n yela na wʋ jawʋ dʋɔ jim wɩɛ a su amɩɛ na wʋ a fa amɩɛ feliŋ naŋ kpiŋjim na tie nyii. 10Sɛ dɩ jɔ dɩga gana fa Ɩsʋɔ ganaŋkʋ ɩ cha chawʋ gaa ga daga kpaŋjuo, na ɩ su wʋ asa bʋrʋkʋma naŋ, na ɩ yɩɛ ayɩɛsa abama bʋrʋkʋma na ɩ bɩɩ Ɩsʋɔ jim naŋ. 11Dɩɩ jɔ dɩga sɛ wʋ jilima doŋ n yela na ɩ sɩŋ na doŋ ganaŋkʋ ɩ dɩlɛ sɩŋ awʋrʋfʋɔ naŋ, na ɩ yu digela na ɩ mʋ asadi 12yɩlɩ n ju fa Juo wʋŋ wʋ yela sɛ ɩ2 daga na ɩɩ yu ŋii wʋ tawɩ si sɛ wʋ a mʋ fa wʋ bakpa wʋsɛ chɩrɩchɩrɩ juori ŋmaŋi ŋii naŋ na. 13Akala takɩɛ wʋ lɩsɛ daa lɩɩ giteŋteŋbiri doŋ naŋ sɛ wʋ mʋ daa kɔŋ wʋ Bu wʋŋ wʋ a jawʋ wʋ wɩɛ na juori gaa naŋ. 14Wʋbu wʋŋ naŋ sɛ Ɩsʋɔ lɩɛ daa, sɛ wʋ mʋ daa dɩsʋbʋ chɩɛ daa.

Kirisito duluŋ na wʋ dɩtʋm

15Kirisito yɩɛ Ɩsʋɔ wʋŋ wʋrʋ baa mʋ wʋ asa wʋ a na ɩ na duluŋ bɛ. Wʋ yɩɛ bu baalɛ asanaŋtɛ wʋŋ wʋ kii bʋrʋkʋma gaa Ɩsʋɔ lɔ ga na. 16Akala takɩɛ Ɩsʋɔ pala na wʋ dʋɔ bɛ lɔ bʋrʋkʋma. Wʋ lɔ abʋrɩ ŋii ŋɩ wɩɛ Ɩsʋɔ adugbe na tie, ŋii dɩɩ na, na ŋii dɩ ɩɩ na a takɩɛ, juori yaa feliŋ basʋbʋɛ badoŋtina yaa juoneŋ yaa yikuotina. Ɩsʋɔ pala na wʋbu wʋŋ dʋɔ bɛ lɔ bʋrʋkʋma sɛ wʋ lɔ bʋrʋkʋma fa ɩ. 17Yesu wɩɛ pɔɩ sɛ Ɩsʋɔ yɩɛ bʋrʋkʋma, wʋ dʋɔ sɛ bʋrʋkʋma chaŋ bʋga. 18Kirisito n nyina nyi fa wʋsɛ gaa ga yɩɛ Kirisito lɩɛdɩra dikpeŋ, wʋŋ n nyina ga nkpa na bu asanaŋtɛ wʋŋ wʋ feŋ lɩɩ sɩŋ naŋ, ganaŋkʋ wʋ a yɩɛ bʋrʋkʋma naŋ asanaŋtɛ. 19Akala takɩɛ Ɩsʋɔ asasu takɩɛ wʋ duluuŋ kpiniŋ n cha wʋbu wʋŋ tɩba. 20Wʋ pala na wʋbu wʋŋ dʋɔ jɔ wʋ na bʋrʋkʋma ŋii ŋɩ wɩɛ Ɩsʋɔ adugbe na tie na kpiniŋ bʋga. Wʋ pala na wʋbu wʋŋ asima ŋii wʋ chɩɛgɩ daŋ gasagasa dʋɔ na kɔna wʋsɛfɩɛ.

21Nafʋɔ amɩɛ na Ɩsʋɔ tɩtɩba cha kparɛ, sɛ ɩ yɩɛ wʋ badʋŋna amɩɛ nfɩɛrɛ naŋ lɩɩna amɩɛ ayɩɛsa asʋbʋɛ dʋɔ. 22Ama dɩtɩɛna bɩrɛ, wʋ pala na Kirisito wʋŋ wʋ gaa yɩɛ wʋkpa na sɩŋ dʋɔ, jɔ amɩɛ na Ɩsʋɔ bʋga, ganaŋkʋ wʋ a mʋ amɩɛ sɩŋ wʋ asanaŋ wʋsɛ chɩrɩchɩrɩ naŋ yela amɩɛ wʋsɛ tana wɩɛ, na wʋrʋ n baa yu wɩɛ ŋarɛ mʋ pʋɩ amɩɛ. 23Sɛ ɩ ju dʋɔ ɩ sɩmɩɛɩ amɩɛ lɩɛdi naŋ na doŋ, sɛ n baa kena amɩɛ tamaa gaa ɩ wɩɛna wɩɛ abama ŋii naŋ na tɩba yela. Wɩɛ abama ŋina sɛ ɩ nyii, sɛ ba tawɩ fa bakpa kpiniŋ tibi dʋɔ gapɩlɛkʋma, sɛ maŋ Pɔɔlʋ ma gaa yɩɛ Wɩɛ abama ŋii tʋmɩrɛ.

Pɔɔlʋ tʋŋ Kirisito lɩɛdɩra dikpeŋ gaa takɩɛ tʋmɩrɛ

24Dɩtɩɛna bɩrɛ ma asadi gʋ ma na awʋrʋfʋɔ fa amɩɛ. Maa na awʋrʋfʋɔ ma wʋsɛ naŋ na maa taŋ Kirisito awʋrʋfʋɔ ŋii fa wʋ wʋsɛ gaa ga yɩɛ Kirisito lɩɛdɩra dikpeŋ. 25Ma yɩɛ Kirisito lɩɛdɩra dikpeŋ gaa tʋmɩrɛ bɛ, sɛ Ɩsʋɔ lɩsɛ maŋ sɛ wʋ mʋ wɩɛ ŋii dʋ ma pamɩɛ naŋ sɛ ma n tawɩ fa amɩɛ, 26ŋii n nyina wɩɛ awɩsɛsa ŋii Ɩsʋɔ mʋ wɩsɛ gɩbɩnɩŋtina na gɩnanaŋ, ama dɩtɩɛna bɩrɛ wʋ lɩsɛ kalaa wʋ bakpa wʋsɛ chɩrɩchɩrɩ. 27Ŋɩ yɩɛ Ɩsʋɔ jawʋ bɛ takɩɛ wʋ a yela na wʋ bakpa a na jilima akpaŋta wɩɛ awɩsɛsa ŋii wʋ lɩsɛ kalaa baa ba ba yɩɛ Yudatina na. Wɩɛ awɩsɛsa ŋii n nyina sɛ Kirisito wɩɛ amɩɛ tɩba dʋɔ, ɩ wɩɛna tamaa sɛ ɩɩ yu jilima.

28Ŋina dʋɔ sɛ dɩ tawɩ Kirisito dʋɔ wɩɛ. Dɩɩ jɔ wʋkʋma nyinaŋ yela dɩ chamɩna kpiŋjim dɩɩ kalaa wʋkʋma ganaŋkʋ dɩɩ dɩlɛ mʋ wʋkʋma gaa sɩŋ Kirisito naŋ kʋrʋkʋrʋ. 29Ŋina dʋɔ sɛ ma chɩdɩsɛ ma chamɩna doŋ ŋii Kirisito fa maŋ na maa yɩɛ dɩtʋm doŋtɛ.