Kolositina 2

1Maa ja sɛ ɩ jiŋ ganaŋkʋ ma kʋ ma wʋsɛ fɔɩ fa amɩɛ na baa ba wɩɛ Lawodikiya dɩɛ naŋ, na baa ba n jaŋina ta maŋ na. 2Ŋii ŋɩ sɩmɩɛɩ ma asa dʋɔ na nyina sɛ ba n yu tawɩ dʋ ba agela naŋ, na baa yɩɛ nʋɔ garɛ jawʋ naŋ ganaŋkʋ baa yu tie nyii kʋrʋkʋrʋ Ɩsʋɔ wɩɛ ŋii naŋ, na baa jiŋ gʋ Kirisito tɩŋtɩŋ n nyina Ɩsʋɔ wɩɛ awɩsɛsa ŋii. 3Wʋ tɩba sɛ kpiŋjim na jim akpari kpiniŋ wɩsaɩ. 4Maa tawɩ amɩɛ ŋina ganaŋkʋ wʋrʋ n baa mʋ noro ŋii ŋɩ kɩɛna takɩɛ ŋɩ yɩɛ gasiŋteŋ pɩna amɩɛ. 5Ŋɩ wɩɛ tɩba takɩɛ ma taŋ amɩɛ jaŋ wʋsɛ naŋ bɩrɛ ɛ, ama ma kpi amɩɛ dʋɔ feliŋ naŋ. Gʋ ma na gʋ ɩ bʋga ɩ sɩmɩɛɩ na doŋ amɩɛ Kirisito lɩɛdi naŋ na, ma asadi.

Ɩ yɩɛ kʋrʋkʋrʋ Kirisito naŋ

6Dɩmʋŋ dʋɔ ganaŋkʋ ɩ lɩɛ Kirisito Yesu di takɩɛ amɩɛ Kpaŋjuo na, n ju dʋɔ cha wʋ tɩba. 7N yela na amɩɛ lira a jʋʋ dɩkɩŋ wʋ tɩba, na ɩ ju dʋɔ bɩɩ na ɩ sɩŋ na doŋ amɩɛ lɩɛdi naŋ takɩɛ ganaŋkʋ ba kalaa amɩɛ na. Na ɩ mʋ yɩlɩ fa Ɩsʋɔ saŋa kʋma.

8N kɩɛ na dieli na wʋrʋ n baa pala na kalaa kpakpuo na wʋkpa kpiŋjim galaŋ ŋii ŋɩ yɩɛ pɩna sɛ ŋɩ sɩmɩɛɩ bakpa ayɩɛsa na dulunya wɩɛ apɔgʋsa ŋii ba lɩɛdʋ ŋii ŋɩ n lɩɩ Kirisito jaŋ na, a mʋ amɩɛ ju gbeŋiri naŋ.

9Akala takɩɛ Kirisito naŋ sɛ Ɩsʋɔ duluŋ kpiniŋ chaɩ wʋsɛ naŋ, 10sɛ wʋ tɩba ɩ yɩɛ kʋrʋkʋrʋ. Wʋŋ n nyina doŋ na yikuo kpiniŋ nyi. 11Kirisito tɩba sɛ ba karɛ amɩɛ baŋlɛ, naa wʋkpa n mʋ wʋ pamɩɛ karɛ ɛ. Ama wʋŋ n karɛ amɩɛ baŋlɛ na wʋ a lɩsɛ amɩɛ dɩsʋbʋ duluŋ lɩɩ amɩɛ tɩba. 12Gʋ ba sɔ amɩɛ Ɩsʋɔ sɔ na, ba wuu amɩɛ na Kirisito. Baa feŋsi amɩɛ na Kirisito kɔŋ nkpa naŋ, akala takɩɛ ɩ wɩɛna lɩɛdi Ɩsʋɔ wʋŋ wʋ feŋsi Kirisito lɩɩ sɩŋ naŋ na doŋ naŋ.

13Nafʋɔ ɩ sɩŋ amɩɛ dɩsʋbʋ naŋ sɛ ba n karaŋ amɩɛ baŋlɛ na wʋ a lɩsɛ amɩɛ dɩsʋbʋ duluŋ lɩɩ amɩɛ tɩba na, Ɩsʋɔ feŋsi amɩɛ na Kirisito kɔŋ nkpa naŋ, sɛ wʋ mʋ daa dɩsʋbʋ kpiniŋ chɩɛ daa. 14Sɛ wʋ kpaɩ daa dɩsʋbʋ gaa ba sabɩɛ si tanɛ naŋ, na ŋɩ baa mʋ fuu daa dɩpʋɛ na. Wʋ lɩsɛ ŋɩ kpiniŋ lɩɩ daa dʋɔ saŋa ga ba jɔ ɩ daŋ gasagasa gaa dʋɔ na. 15Ɩsʋɔ lɩɛ feliŋ basʋbʋɛ badoŋtina na yikuotina kpiniŋ doŋ lɩɩ ba pamɩɛ naŋ. Wʋ pala na Kirisito daŋ gasagasa dʋɔ sɩŋ yuo di ba dʋɔ bakpa naŋ.

16Dɩmʋŋ dʋɔ n baa yela wʋrʋ a fu amɩɛ dɩpʋɛ lɩɩna bʋrʋ gaa ɩɩ di yaa ɩɩ nyʋɔ yaa tʋm asadi adiya di, Gafita Fɔlɛ asadi adiya di yaa Fɩɛsɛ Wɩɩ dʋɔ. 17Abʋrɩ tɩŋtɩŋ ŋii ŋɩ kɔnɛ na kpiniŋ kɩɛna bɛ takɩɛ dikuiwu. Ama abʋrɩ tɩŋtɩŋ ŋina n nyina Kirisito. 18N baa yela na wʋŋ wʋ a yɩɛ wʋ wʋsɛ takɩɛ wʋ a kɔna wʋ wʋsɛ tie, sɛ wʋ a tʋm Ɩsʋɔ gabʋɔsɛ na, a gaa amɩɛ gbɩɛ sɛ ba n baa fa amɩɛ kɩmtʋɔ gaa ga daga amɩɛ. Dɩmʋŋ wʋkpa wina a tawɩ sɛ wʋ yu Ɩsʋɔ lɩsɛ kalaa fɔɩ. Wʋkpa nfɩɛrɛ sɛ wʋ chamɩna wʋ a jiŋna wʋ wʋsɛ, ama wʋ taŋ kpɩnɩdɩ wʋ a sɩŋ dʋɔ yɩɛ dɩmʋŋ ŋ. 19Dɩmʋŋ wʋkpa wina lɩsɛ wʋ wʋsɛ lɩɩ Kirisito wʋŋ wʋ yɩɛ nyi fa wʋsɛ gaa kpiniŋ. Sɛ nyi gaa yela sɛ lira na akɔŋ naŋ kpiniŋ chaŋ wʋsɛ bʋga, sɛ ŋɩ bɩɩ takɩɛ ganaŋkʋ Ɩsʋɔ yela sɛ ŋɩ bɩɩ na.

Ɩ sɩŋ na ɩ chaɩ na Kirisito

20Gʋ amɩɛ na Kirisito sɩŋ na dʋɔ, ɩ di amɩɛ nyie lɩɩ dulunya wɩɛ apɔgʋsa ŋii ba lɩɛ dʋ na dʋɔ. Be n yɩɛ sɛ ɩ saŋ ɩ cha takɩɛ ɩ kpi dulunya dʋɔ? Sɛ ɩɩ di ŋɛ mbara dʋɔ takɩɛ, 21<<N baa chaŋ tɩba! N baa dakɩɛ! N baa tapʋ.>> 22Gʋ ba mʋ abʋrɩ ŋina kpiniŋ yɩɛ dɩtʋm na, dɩ daga na ŋii warɩɛ. Akala takɩɛ ŋɩ yɩɛ bakpa mbara na ba kalaa bɛ. 23Gasiŋteŋ dɩmʋŋ ŋii ba n yɩɛ na kɩɛna bɛ takɩɛ kpiŋjim wɩɛ ŋii ŋɩ lɩɩ wʋkpa tʋm naŋ, sɛ baa yɩɛ ba wʋsɛ takɩɛ baa kɔna ba wʋsɛ tie yela baa yɩɛ ba wʋsɛ awʋrʋfʋɔ. Ama ŋina kpiniŋ yɩɛ kpakpuo sɛ baa dɩlɛ ga chɔna ba na ba aa di ba dɩsʋbʋ jawʋ dʋɔ ɔ.