Kolositina 3

Mbara fa chawʋ chɩrɩchɩrɩ

1Gʋ Ɩsʋɔ cha feŋsi amɩɛ na Kirisito lɩɩ sɩŋ naŋ na dʋɔ, n ju dʋɔ ja abʋrɩ ŋii ŋɩ wɩɛ Ɩsʋɔ adugbe, diele gaa Kirisito cha ɩ Ɩsʋɔ jɩsaŋ dʋɔ na. 2N fa nfɩɛrɛ abʋrɩ ŋii ŋɩ wɩɛ Ɩsʋɔ adugbe na dʋɔ, naa ŋii ŋɩ wɩɛ tibi dʋɔ ɔ. 3Akala takɩɛ ɩ sɩŋ, sɛ dɩtɩɛna bɩrɛ amɩɛ nkpa wɩsaɩ Kirisito naŋ Ɩsʋɔ naŋ. 4Gʋ Kirisito wʋŋ wʋ yɩɛ amɩɛ nkpa bɔrɛ kɔŋ na, amɩɛ na ɩ gba ɩɩ lɩɩ ifuli jilima naŋ.

5N lɩsɛ bʋrʋkʋma gaa ga yɩɛ amɩɛ dulunya dɩsʋbʋ jawʋ takɩɛ danaŋburidi, iniesi, ala na baalɛ jawʋ gayalaga, dɩsʋbʋ jawʋ na dɩsɛchɩbɛ gaa ga yɩɛ panɛ tʋm lɩɩ amɩɛ tɩba. 6Ŋina dʋɔ, Ɩsʋɔ biŋbira janɛ a kɔnɛ.1 7Nafʋɔ amɩɛ gba ɩ cha dɩmʋŋ dɩsʋbʋ chawʋ ŋina naŋ. 8Ama dɩtɩɛna bɩrɛ, ŋɩ tiri gʋ n yela dɩmʋŋ dɩsʋbʋ ŋina kpiniŋ yɩɛ takɩɛ biŋbira karɛ, biŋbira sʋbʋ, kɔlɩŋ ayɩɛsa, yɩrɛ warɩɛwʋ na dɩtawɩ jaga. 9N baa yɩɛ akarɩɛ fa dɔŋa, akala takɩɛ ɩ lɩsɛ amɩɛ gɩbɩnɩŋ chawʋ na ŋɩ ayɩɛsa tʋsʋ, 10na ɩ fu wʋkpa duluŋ gafɔlɛ gaa. Ɩsʋɔ aaŋ ja wʋ a ju dʋɔ yɩɛ amɩɛ bafɔlɩɛ ganaŋkʋ ɩɩ yɩɛ takɩɛ wʋŋ wʋ lɔ amɩɛ na duluŋ, na ɩ jiŋ ɩ na dieli. 11Ŋina dʋɔ, ŋɩ n ti tiri sɛ wʋrʋ yɩɛ Giriki wʋkpa yaa Yuda wʋkpa, baŋlɛ karɩŋ yaa baa ba n kara ba baŋlɛ, wʋrʋ yɩɛ mʋɔrɛ yaa wʋrʋ asa n fulu u, wʋrʋ yɩɛ gbeŋi yaa wʋrʋ di wʋ nyie, ama Kirisito n nyina bʋrʋkʋma amɩɛ kpiniŋ naŋ sɛ wʋ wɩɛ wʋkʋma naŋ.

12Dɩmʋŋ dʋɔ gʋ ɩ yɩɛ Ɩsʋɔ bakpa baa wʋ lɩsɛ, sɛ ɩ yɩɛ wʋsɛ chɩrɩchɩrɩ sɛ wʋ a ja amɩɛ wɩɛ dʋɔ, n fu gɩyɔŋ wɩɩ, na dɩbam yɩɛ, na kɔna wʋsɛ tie, n fʋʋ, na ɩ yu digela. 13N yu digela na ɩ nyii dɔŋa tie na ɩ mʋ ŋii ɩ yɩɛ dɔŋa sɛ ŋɩ taŋ dieli kpiniŋ mʋ chɩɛ dɔŋa. N mʋ chɩɛ takɩɛ ganaŋkʋ Kpaŋjuo mʋ chɩɛ amɩɛ na. 14Ŋii ŋɩ kɩɩ abʋrɩ abama ŋina kpiniŋ n nyina sɛ n yu jawʋ fa dɔŋa, ŋii aaŋ ja ŋii jɔ amɩɛ kpiniŋ bʋga nʋɔ garɛ naŋ kʋrʋkʋrʋ.

15Gʋ ɩ yɩɛ wʋsɛ gadʋŋdʋlʋŋ gaa salɩŋ, sɛ wʋ yagɛ amɩɛ kɔŋ wʋsɛfɩɛ naŋ na dʋɔ, n yela na Kirisito wʋsɛfɩɛ a di juori amɩɛ agela naŋ, na ɩ mʋ yɩlɩ fa Ɩsʋɔ. 16N yela na Kirisito wɩɛ ŋii a cha amɩɛ tɩba na dieli na ɩ mʋ kpiŋjim kalaa na ɩ jɔ dɔŋa nyienaŋ. N kpie numbasɛ, na n kpie kalɩɛwʋ numbasɛ na ɩ kpie feliŋ naŋ numbasɛ lɩɩ amɩɛ agela naŋ mʋ yɩlɩ Ɩsʋɔ. 17Bʋrʋkʋma gaa ɩɩ yɩɛ na, ŋɩ yɩɛ dɩtawɩ naŋ bɛ o, yaa ayɩɛsa naŋ bɛ o, n yɩɛ ŋɩ kpiniŋ Kpaŋjuo Yesu yɩrɛ naŋ, na ɩ pala na wʋ dʋɔ mʋ yɩlɩ fa Juo Ɩsʋɔ.

Kirisitotina waasɛ dʋɔ mbara

18Ala sara, n kɔna amɩɛ wʋsɛ tie fa amɩɛ baala takɩɛ ganaŋkʋ dɩ daga na ɩɩ yɩɛ Kpaŋjuo Yesu naŋ na.

19Baala, n ja amɩɛ ala, na n baa nyala ba.

20Bachaasɛ, n nyii amɩɛ lʋrʋda wɩɛ bʋrʋkʋma naŋ. Akala takɩɛ ŋina aaŋ su Kpaŋjuo Yesu asa.

21Juo aba, n baa dʋ amɩɛ bie biŋbira ganaŋkʋ ba wʋsɛ n baa yɔgɔsɛ ba.

22Gbeŋa, n nyii amɩɛ tibi gana dʋɔ kpaŋjuo aba wɩɛ bʋrʋkʋma naŋ, naa saŋa gaa ɩɩ tʋŋ na ɩɩ su ba asa na nyiŋeŋ, ganaŋkʋ baa ja amɩɛ wɩɛ ɛ. Ama n lɩɩ digela bam naŋ na ɩ bu ba lɩɩna gʋ ɩɩ se Kpaŋjuo Yesu na dʋɔ. 23Bʋrʋkʋma gaa ɩɩ yɩɛ na, n yɩɛ ga lɩɩ amɩɛ digela naŋ takɩɛ ganaŋkʋ ɩ yɩɛ ɩ fa Kpaŋjuo Yesu na, naa bakpa a. 24Ɩ jiŋ gʋ ɩɩ yu gapatɩɛ takɩɛ kɩmtʋɔ lɩɩ Kpaŋjuo jaŋ. Sɛ Kpaŋjuo Kirisito sɛ ɩɩ tʋŋ. 25Wʋkʋma wʋŋ wʋ yɩɛ bʋrʋ gaa ga taŋ dieli na, wʋ a yu ga dʋɔ kɩmtʋɔ, sɛ Ɩsʋɔ bɩrɛ, wʋ aa kɩɛ wʋkpa asanaŋ ŋ.