Kolositina 4

1Sɛ Kpaŋjuo aba, n yɩɛ ŋii ŋɩ wɩɛ dieli na ŋii ŋɩ daga na fa amɩɛ gbeŋa, akala takɩɛ ɩ jiŋ gʋ amɩɛ gba ɩ wɩɛna Kpaŋjuo Ɩsʋɔ adugbe.

Pɔɔlʋ tawɩ Kolositina ŋii ba n yɩɛ

2N mʋ amɩɛ wʋsɛ kpiniŋ fa dɩga jʋɔ na ɩ kɩɛ amɩɛ wʋsɛ dʋɔ na dieli, na ɩ mʋ yɩlɩ fa Ɩsʋɔ. 3Na ɩ jɔ dɩga fa daa gba sɛ Ɩsʋɔ n fulu gbɩɛ fa daa wɩɛ ŋii dɩɩ tawɩ na, ganaŋkʋ dɩɩ dɩlɛ tawɩ Kirisito wɩɛ awɩsɛsa ŋii, ŋɩ dʋɔ sɛ ba tɔ maŋ danɛ na. 4N jɔ dɩga sɛ ma n dɩlɛ lɩsɛ wɩɛ ŋii tie na dieli ganaŋkʋ ŋɩ daga maa tawɩ ŋɩ na. 5N mʋ kpiŋjim cha na baa ba ba yɩɛ Kirisito lɩɛdɩra, gbɩɛ kʋma gaa ɩɩ yu na, n yɩɛ na dieli. 6Saŋa kʋma n yela na amɩɛ dɩtawɩ amɩɛ dɩtawɩ a yɩɛ jʋŋ takɩɛ yasɛ, na ɩ jiŋ ganaŋkʋ ɩɩ lɩsɛ wʋkʋma nʋɔ na.

Yɩlɩ ŋii ŋɩ yɩɛ dɩtamtɩŋ

7Daa dʋɔ lɩɛdɩrɛ Tikiko, wʋŋ wʋ yɩɛ gasiŋteŋ dɩtʋm yɩɛrɛ na dʋɔ tʋmɩrɛ Kpaŋjuo naŋ, wʋŋ dɩɩ ja wʋ wɩɛ na aja kɔŋ amɩɛ jaŋ gaa tawɩ ma wʋsɛ dʋɔ wɩɛ kpiniŋ fa amɩɛ. 8Ŋina dʋɔ sɛ maa kpiri ɩ amɩɛ jaŋ na ɩ jiŋ ganaŋkʋ daa wʋsɛ chaɩ na wʋ a gaa tawɩ dʋ amɩɛ. 9Wʋ na Onesimosi daa dʋɔ lɩɛdɩrɛ wʋŋ dɩɩ ja wɩɛ sɛ wʋ yɩɛ gasiŋteŋtɛ sɛ wʋ yɩɛ amɩɛ tɩba wʋrʋ na aaŋ kɔnɛ. Baa aaŋ ja baa tawɩ wɩɛ ŋii ŋɩ tibi jɩna na kpiniŋ fa amɩɛ.

10Arisitakosi, ma dʋɔ wʋŋ baa tɔ maŋ na ɩ danɛ na, a yɩlɩ amɩɛ. Dɩmʋŋ sɛ Maakɩ wʋŋ wʋ yɩɛ Banabasi wʋ nabu na gba, a yɩlɩ amɩɛ. [Ɩ fɩla nyii wʋ wʋsɛ dʋɔ wɩɛ, sɛ wʋ kɔnɛ na, n lɩɛ ɩ na dieli.] 11Yesu wʋŋ baa yagɛ ɩ sɛ Jositosi na gba, a yɩlɩ amɩɛ. Ba nyiŋeŋ n nyina Yudatina baa ba kpi ma dɔŋa dɩtʋm yɩɛra dʋɔ sɛ dɩɩ yɩɛ Ɩsʋɔ Juori gaa dʋɔ dɩtʋm, sɛ ba tawɩ dʋ maŋ. 12Epafirasi wʋŋ wʋ yɩɛ amɩɛ tɩba wʋrʋ sɛ wʋ yɩɛ Kirisito Yesu tʋmɩrɛ na gba, a yɩlɩ amɩɛ. Saŋa kʋma wʋ a chɩdɩsɛ wʋ a jɔ dɩga wʋ a fa amɩɛ ganaŋkʋ ɩɩ dɩlɛ sɩŋ na doŋ na ɩɩ bɩɩ, na ɩɩ lɩɛ Ɩsʋɔ jawʋ di na dieli. 13Ma tɩŋtɩŋ maa di Seriya sɛ Epafirasi yɩɛ dɩtʋm doŋtɛ fa amɩɛ na baa ba wɩɛ Lawodikiya na Hirapolisi na. 14Daa dɩɛtɛ Luka wʋŋ wʋ yɩɛ dɔkɩta na Demasi a yɩlɩ amɩɛ. 15N yɩlɩ ma dɔŋa lɩɛdɩra baa ba wɩɛ Lawodikiya dɩɛ naŋ, alʋ Nimfa na lɩɛdɩra dikpeŋ gaa baa jaŋi wʋ waa dʋɔ na.

16Ba karaŋ tanɛ gaa ma sabɩɛ fa amɩɛ taŋ na, n kɩɛ na baa karaŋ ga fa lɩɛdɩra dikpeŋ gaa ga wɩɛ Lawodikiya na, sɛ amɩɛ gba n karaŋ tanɛ gaa ma sabɩɛ fa lɩɛdɩra baa ba wɩɛ Lawodikiya na.

17N tawɩ Akiposi sɛ, <<Wʋ n kɩɛ takɩɛ wʋ a taŋ dɩtʋm gaa Kpaŋjuo mʋ fa ɩ na.>>

18Maŋ Pɔɔlʋ, n mʋ ma tɩŋtɩŋ ma pam sabɩɛ yɩlɩ ŋina maa fa amɩɛ. N nyiŋi gʋ ma saŋ ma wɩɛ danɛ dɩtʋɔtɩŋ. Ɩsʋɔ wɩɩ n kɔŋ amɩɛ dʋɔ.