Filipotina 3

Gasiŋteŋ gaa ga yɩɛ chirigi

1Ma dɔŋa lɩɛdɩra, ŋii ŋɩ kakaa na n nyina sɛ n yu asadi kpaŋjuo naŋ. Ŋɩ ba yɩɛ maŋ wɩɛ atirisa takɩɛ ma n ti bɔrɛ sabɩɛ wɩɛ adʋŋdʋlʋŋ ŋina fa amɩɛ ɛ, ŋii aaŋ gara amɩɛ.

2N kɩɛ amɩɛ wʋsɛ dʋɔ na dieli lɩɩna bakpa baa ba kɩɛna takɩɛ paasɛ, bakpa bana baa yɩɛ dɩsʋbʋ, sɛ baa tawɩ sɛ n kara amɩɛ baŋlɛ. 3Akala takɩɛ daa baa dɩɩ pala na Ɩsʋɔ Feliŋ dʋɔ dɩɩ tʋm na, daa n nyina baa ba yɩɛ baŋlɛ karada gasiŋteŋ. Dɩɩ jiŋna daa wʋsɛ Kirisito Yesu naŋ na, sɛ dɩ n mʋ daa wʋsɛ lɔ wʋkpa dʋɔ. 4Nafʋɔ maŋ gba ma wɩɛna kpɩnɩdɩ sɛ mʋ ma wʋsɛ lɔ ŋina dʋɔ. Sɛ wʋrʋ a yɩɛ wʋ nfɩɛrɛ takɩɛ wʋ wɩɛna kpɩnɩdɩ dʋɔ sɛ wʋ a dɩlɛ mʋ wʋ wʋsɛ lɔ wʋkpa dʋɔ na, maa wɩɛna kii wʋkʋma.

5Ba kara ma baŋlɛ wɩɛ jiŋinara wɩɩ, ma yɩɛ Isirai wʋkpa bɛ, ma lɩɩ Benyamiŋ buonɔ, ma yɩɛ Hibiri wʋkpa tɩŋtɩŋ bɛ, lɩɩna mbara ŋii kpaŋ dʋɔ na ma yɩɛ Farasi wʋkpa bɛ, 6lɩɩna jawʋ gadoŋtɛ dʋɔ ma nyala lɩɛdɩra dikpeŋ gaa, sɛ dɩ kɔŋ chirigi lɩɩna mbara ŋii kpaŋ dʋɔ na, nafʋɔ maŋ bɩrɛ, ma yɩɛ wʋsɛ tana wɩɛ ŋarɛ.

7Ama bʋrʋkʋma gaa nafʋɔ gaa yɩɛ tɔnʋɔ fa maŋ na, Kirisito dʋɔ ŋɩ yɩɛ kpakpuo fa maŋ. 8Naa ŋina nyiŋeŋ ŋ, sɛ ma mʋ bʋrʋkʋma mʋ kɩɛsɩna ma Kpaŋjuo Yesu Kirisito wʋŋ ma jiŋ na, ma na gʋ ŋɩ yɩɛ kpakpuo bɛ. Kirisito dʋɔ ma tʋsʋ bʋrʋkʋma sɛ maa kɩɛ bʋrʋkʋma takɩɛ dɩbɩɩ dʋɔ abʋrɩ, ganaŋkʋ aja yɩɛ na maa yu Kirisito na. 9Na maŋ na ɩ dɩɩ yɩɛ bʋdʋŋdʋlʋŋ. Na ma n baa ti yu ma tɩŋtɩŋ chirigi gaa ga lɩɩ mbara ŋii kpaŋ dʋɔ, ama gaa ga pala na Kirisito naŋ lɩɛdi. Chirigi ŋina lɩɩ Ɩsʋɔ jaŋ sɛ ga sɩŋ lɩɛdi dʋɔ. 10Maa ja sɛ maa jiŋ Kirisito, na wʋ doŋ ŋii ŋɩ wɩɛ wʋ feŋ lɩɩ sɩŋ naŋ, na maa yɩɛ Kirisito wʋ dʋɔ awʋrʋfʋɔ naŋ, na maa yɩɛ takɩɛ ɩ wʋ sɩŋ naŋ. 11Dɩmʋŋ dʋɔ maa kɩɛ gbɩɛ takɩɛ maŋ gba Ɩsʋɔ aja feŋsi maŋ lɩɩ sɩŋ naŋ.

Pɔɔlʋ chɩdɩsɛ na wʋ tala ŋii wʋ sɩmɩɛɩ ŋɩ dʋɔ na

12Maa kalaa sɛ ma taŋ yu ŋina kpiniŋ yaa ma taŋ yɩɛ kʋrʋkʋrʋ ga taŋ ŋ. Ama ma chɩdɩsɛ na ma pam a chaŋ ŋii Yesu Kirisito yagɛ maŋ ŋɩ dʋɔ na. 13Ma dɔŋa lɩɛdɩra, maa fa nfɩɛrɛ sɛ ma pam taŋ cham ŋɛ ɛ. Ama bʋrʋ gadʋŋdʋlʋŋ gaa maa yɩɛ na n nyina sɛ, maa solo ŋii ŋɩ lam, na maa yɩɛ aniya tala ŋii ŋɩ wɩɛ ma asanaŋ na dʋɔ. 14Ŋina dʋɔ ma chɩdɩsɛ na maa tala ŋii ma sɩmɩɛɩ dʋɔ na maa yu kɩmtʋɔ gaa ga dʋɔ sɛ Ɩsʋɔ pala na Kirisito Yesu dʋɔ yagɛ maŋ.

15Daa kpiniŋ baa dɩ bɩɩ lɩɛdi naŋ na, dɩ daga na dɩɩ fa nfɩɛrɛ dɩmʋŋ. Sɛ nyaa wɩɛna nfɩɛrɛ ngoriŋ lɩɩna ŋina dʋɔ na, Ɩsʋɔ aja lɩsɛ tie kalaa ɩ. 16Ama n yela na dɩɩ ju dʋɔ chaŋ ŋii dɩ fɩla yu na.

17Ma dɔŋa lɩɛdɩra, amɩɛ kpiniŋ n kpalɩɛna maŋ, na ɩ kɩɛ baa ba kpamɩna daa na dieli, na ɩ kpalɩɛna ba. 18Ma fɩla tawɩ amɩɛ, sɛ dɩtɩɛna ma ti bɔrɛ mʋ asalɩŋ maa tawɩ amɩɛ sɛ bakpa galaga baa chawʋ yɩɛ ba Kirisito daŋ gasagasa gaa badʋŋna. 19Dɩmʋŋ bakpa bana, ba dɩtamtɩŋ n nyina dɩwarɩɛ ba. Ba panɛ n nyina ba wʋsɛ jawʋ sɛ ŋii ŋɩ yɩɛ asaju na tɩba sɛ baa jiŋna ba wʋsɛ adugbe. Sɛ baa fa nfɩɛrɛ dulunya abʋrɩ nyiŋeŋ dʋɔ. 20Ama daa bɩrɛ, dɩ yɩɛ dɩɛsɛbie bɛ Ɩsʋɔ adugbe. Sɛ dɩ dana daa Mɔlɔgɩrɛ Kpaŋjuo Yesu Kirisito lɩɩ dɩmaŋ kɔŋ. 21Wʋŋ wʋ wɩɛna yikuo wʋ a dɩlɛ mʋ bʋrʋkʋma dʋ wʋ juori tie, na wʋ a biliŋi daa wʋsɛ gaa ga fʋʋ na ŋii ŋɩ yɩɛ takɩɛ wʋ jilima wʋsɛ.