Filipotina 2

Kirisito wʋsɛ kɔna tie na Ɩsʋɔ jiŋna ɩ adugbe

1Sɛ ɩ chaɩ Kirisito naŋ na, ɩ yu tawɩ dʋ, ɩ yu tawɩ dʋ lɩɩ wʋ jawʋ naŋ na, amɩɛ na Ɩsʋɔ Feliŋ bʋga yɩɛ garɛ, ɩ wɩɛna jawʋ na gɩyɔŋ wɩɩ fa dɔŋa, 2dɩmʋŋ bɩrɛ n yu nfɩɛrɛ adʋŋdʋlʋŋ, n yu jawʋ adʋŋdʋlʋŋ, na ɩ yɩɛ bʋdʋŋdʋlʋŋ feliŋ naŋ, na ɩ sɩŋ bʋrʋ garɛ dʋɔ. Ŋina aaŋ ja yela na maa yu asadi galaŋ. 3N baa yɩɛ dɩsɛchɩbɛ yaa n baa jiŋna amɩɛ wʋsɛ adugbe, ama n kɔna amɩɛ wʋsɛ tie na ɩ kɩɛ amɩɛ dɔŋa takɩɛ ba kɩɩ amɩɛ. 4Amɩɛ wʋkʋma n baa fa nfɩɛrɛ wʋ nyiŋeŋ wʋ teri dʋɔ, ama wʋ n fa nfɩɛrɛ wʋ dɔŋa gba teri dʋɔ.

5N yela na amɩɛ ayɩɛsa a kɩɛna takɩɛ Kirisito Yesu teri.

6Kirisito yɩɛ Ɩsʋɔ duluŋ bɛ,

ama wʋ n kɩɛ sɛ wʋ na Ɩsʋɔ ba yɩɛ bʋdʋŋdʋlʋŋ ŋ.

7Ama wʋ yɩɛ wʋ wʋsɛ takɩɛ wʋ ba yɩɛ bʋrʋ ʋ,

wʋ yɩɛ wʋ wʋsɛ takɩɛ tʋmɩrɛ,

sɛ wʋ gaa yɩɛ wʋkpa.

8Wʋ gaa yɩɛ wʋkpa na,

wʋ kɔna wʋ wʋsɛ tie

sɛ wʋ nyii Ɩsʋɔ wɩɛ ga tala wʋ sɩŋ,

hali wʋ sɩŋ daŋ gasagasa dʋɔ.

9Dɩmʋŋ dʋɔ Ɩsʋɔ jiŋna ɩ sɛ wʋ fa ɩ jilima dɩchatɩŋ Ɩsʋɔ adugbe,

sɛ wʋ fa ɩ yɩrɛ gaa ga kii yɩrɛ kʋma.

10Sɛ ba yagɛ Yesu yɩrɛ na, dɩ daga na nafara wʋkʋma a luuŋ maŋ,

na ŋɩ wɩɛ Ɩsʋɔ adugbe na tie, na tibi tie kpiniŋ,

11na nʋɔjʋlʋŋ kʋma a fulu tawɩ sɛ Yesu Kirisito n nyina Kpaŋjuo wʋŋ,

na baa mʋ jilima fa Ɩsʋɔ daa Juo.

N ŋalagi takɩɛ achikpebi tibi dʋɔ

12Ma dɩɛtina baa ma ja amɩɛ wɩɛ, ganaŋkʋ ɩ nyii ma jaŋ saŋa kʋma, naa saŋa gaa ma wɩɛ amɩɛ jaŋ na nyiŋeŋ ŋ, ama dɩtɩɛna gʋ ma taŋ amɩɛ jaŋ na gba. N ju dʋɔ mʋ nyɩŋtɩɛ na wʋsɛ selesi yɩɛ amɩɛ mɔlɔgɩ dɩtʋm. 13Akala takɩɛ Ɩsʋɔ aaŋ yɩɛ dɩtʋm amɩɛ tɩba na ɩ yu jawʋ, na ɩ dɩlɛ yɩɛ ŋii wʋ a jawʋ.

14N baa mʋ fʋlʋ yaa noro di yɩɛ bʋrʋ, 15ganaŋkʋ ɩɩ yɩɛ Ɩsʋɔ bie baa amɩɛ wʋsɛ tana wɩɛ sɛ ɩ chirigi sɛ ɩ yɩɛ kʋrʋkʋrʋ gɩnanaŋ gaa baa di gasiŋteŋ sɛ ba aa yɩɛ dɩsʋbʋ na naŋ. N ŋalagi takɩɛ achikpebi tibi dʋɔ 16takɩɛ gʋ ɩ chamɩna nkpa wɩɛ ŋii. Ganaŋkʋ amɩɛ dʋɔ, maa jiŋna ma wʋsɛ adugbe wɩɩ gaa Kirisito aja bɔrɛ kɔŋ na, akala takɩɛ ma aniya na ma dɩtʋm doŋtɛ amɩɛ tɩba n yɩɛ kpakpuo o. 17Ama hali gba ba chɩɛgɩ ma asima wʋrʋgɩ takɩɛ ganaŋkʋ baa wʋrʋgɩ sʋlʋŋ gadiesa dʋɔ na, ganaŋkʋ amɩɛ lɩɛdi kɩɛna takɩɛ gadiesa gaa ɩɩ diesi ɩɩ fa Ɩsʋɔ na, ŋii yɩɛ maŋ jʋŋ na maŋ na amɩɛ asa a di. 18Dɩmʋŋ dʋɔ, amɩɛ gba dɩ n yɩɛ amɩɛ jʋŋ, na maŋ na amɩɛ asa a di.

Timoti na Epafuroditusi

19Ma wɩɛna tamaa Kpaŋjuo Yesu naŋ sɛ baa taŋgɩlɛ maa kpiri Timoti amɩɛ jaŋ. Sɛ ma nyii amɩɛ dʋɔ na, ma asa aja di. 20Ma tana wʋrʋ wʋŋ amɩɛ wɩɛ tiri ɩ gasiŋteŋ takɩɛ Timoti, 21akala takɩɛ wʋkʋma aja wʋ nyiŋeŋ teri bɛ, naa Yesu Kirisito teri i. 22Ama amɩɛ tɩŋtɩŋ ɩ jiŋ ganaŋkʋ Timoti tʋŋ gasiŋteŋ naŋ. Takɩɛ juo na bu, maŋ na ɩ tʋŋ Ɩsʋɔ wɩɛ abama ŋii tawɩ naŋ. 23Dɩmʋŋ dʋɔ ma wɩɛna tamaa takɩɛ ma nyii ŋii ŋii tibi ma dʋɔ na, maa kpiri ɩ amɩɛ jaŋ gabʋanaŋ. 24Ma wɩɛna lɩɛ di Ɩsʋɔ naŋ takɩɛ ba aa taŋgɩlɛ ɛ ma tɩŋtɩŋ maa kɔŋ amɩɛ jaŋ.

25Ama maa fa nfɩɛrɛ sɛ ŋɩ tiri gʋ ma n bɔrɛ kpiri ma dʋɔ lɩɛdɩrɛ, na ma dʋɔ tʋmɩrɛ na ma dʋɔ lɩɛdɩra naŋ yuori Epafuroditusi amɩɛ jaŋ. Wʋŋ wʋŋ gba wʋ yɩɛ amɩɛ kpɩrɩdɛ wʋŋ ɩ kpiri sɛ wʋ n gaa kɩɛ maa dʋɔ. 26Wʋ a ja sɛ wʋ a na amɩɛ kpiniŋ, sɛ wʋ yɩyɩɛ akala takɩɛ ɩ nyii sɛ wʋ a kili. 27Ŋɩ yɩɛ gasiŋteŋ gʋ wʋ kili, nafʋɔ wʋ ja wʋ a sɩŋ. Ama Ɩsʋɔ wɩɩ wʋ gɩyɔŋ, naa wʋ nyiŋeŋ ŋ, ama maŋ gba ganaŋkʋ maa bɔtaa kpi i. 28Dɩmʋŋ dʋɔ maa ja sɛ maa kpiri ɩ amɩɛ jaŋ, ganaŋkʋ ɩ ti bɔrɛ na ɩ na, na ŋii yɩɛ amɩɛ jʋŋ. Maŋ gba ma bɔtaa a kɔgɩ. 29Dɩmʋŋ dʋɔ n mʋ asadi mʋ lɩɛ ɩ takɩɛ amɩɛ dʋɔ lɩɛdɩra Kpaŋjuo Yesu naŋ. N bu bakpa baa ba kɩɛna takɩɛ wʋŋ, 30Akala takɩɛ Kirisito dɩtʋm gaa dʋɔ wʋ sɩŋ taŋ sɛ wʋ mʋ wʋ nkpa fa sɩŋ ganaŋkʋ wʋ a dɩlɛ chɔna maŋ na wʋ a yɩɛ ŋii ɩŋ dɩlɛ yɩɛ fa maŋ na.