Filipotina 1

Yɩlɩ

1Maŋ Pɔɔlʋ na Timoti baa dɩ yɩɛ Kirisito Yesu tʋmɩra na.

N mʋ tanɛ gana juna Ɩsʋɔ bakpa wʋsɛ chɩrɩchɩrɩ baa ba wɩɛ Filipo dɩɛ naŋ sɛ ba wɩɛ Kirisito naŋ na kpiniŋ, na Kirisito lɩɛdɩra dikpeŋ bɩnɩɛ na tʋmɩra baa.

2Ɩsʋɔ daa Juo na daa Kpaŋjuo Yesu Kirisito Ɩsʋɔ wɩɩ na wʋsɛfɩɛ n kɔŋ amɩɛ dʋɔ.

Pɔɔlʋ jɔ dɩga fa Kirisito lɩɛdɩra baa

3Maa yɩlɩ ma Ɩsʋɔ saŋa kʋma gaa maa nyiŋi amɩɛ na. 4Saŋa kʋma gaa maa jɔ dɩga fa amɩɛ kpiniŋ na, maa mʋ asadi bɛ maa jɔ ga. 5Akala takɩɛ ɩ yɩɛ ma dɔŋa dɩtʋm yɩɛra sɛ dɩ tawɩ Ɩsʋɔ wɩɛ abama ŋii lɩɩ wɩɩ gaa ga dɔŋ asanaŋ gaa tala jaŋ. 6Ma lɩɛ di sɛ Ɩsʋɔ wʋŋ wʋ faara wʋ dɩtʋm bam amɩɛ tɩba na, wʋ a ju dʋɔ yɩɛ ga tala wʋ a taŋ ga saŋa gaa Yesu Kirisito aja bɔrɛ kɔŋ.

7Gʋ maa ja amɩɛ wɩɛ ma digela naŋ dʋɔ, ŋii wɩɛ dieli fa maŋ takɩɛ maa fa nfɩɛrɛ ŋina amɩɛ kpiniŋ dʋɔ. Akala takɩɛ hali gʋ ba tɔ maŋ danɛ yaa gʋ maa tawɩ maa garɛ wɩɛ abama ŋii sɛ ŋɩ yɩɛ gasiŋteŋ na, maŋ na amɩɛ kpiniŋ dɩ yu Ɩsʋɔ wɩɩ. 8Ɩsʋɔ aaŋ ja wʋ a di maŋ seriya takɩɛ maa ja na ma na amɩɛ, akala takɩɛ maa ja amɩɛ kpiniŋ wɩɛ ganaŋkʋ Kirisito Yesu gba a ja amɩɛ wɩɛ na.

9Maa jɔ dɩga maa fa amɩɛ sɛ amɩɛ jawʋ n bɔla fɔɩ ganaŋkʋ ɩ yu jim na tie nyii dikeŋ, 10ganaŋkʋ ɩɩ dɩlɛ jiŋ na dieli bʋrʋ gaa ga yɩɛ gabam, na ɩ wʋsɛ chɩrɩchɩrɩ na ɩ yɩɛ wʋsɛ taŋ wɩɛ ŋarɛ ga tala wɩɩ gaa Kirisito a ja bɔrɛ kɔŋ na, 11na ɩɩ pala na Yesu Kirisito dʋɔ yɩɛ chirigi ayɩɛsa na ŋii kɔna jilima na kalɩɛwʋ fa Ɩsʋɔ.

Ma chaɩ nkpa naŋ na ma chaɩ fa Kirisito bɛ

12Ma dɔŋa lɩɛdɩra, dɩtɩɛna maa ja na ɩ jiŋ gʋ bʋrʋ gaa ga tibi ma dʋɔ na yela sɛ Ɩsʋɔ wɩɛ abama ŋii yalagi. 13Ŋina dʋɔ, juorigbɩɛ gaa kɩɛra baa kpiniŋ na baa ba kakaa na jiŋ gʋ Kirisito dʋɔ sɛ ba tɔ maŋ danɛ. 14Ma danɛ tʋɔ dʋ ma dɔŋa lɩɛdɩra fɔɩ doŋ Ɩsʋɔ naŋ, sɛ ba mʋ digela tawɩ Ɩsʋɔ wɩɛ yela nyɩŋtɩɛ ba chamɩna ba kpiniŋ-kpiniŋ ŋ.

15Ŋɩ yɩɛ gasiŋteŋ bɛ takɩɛ barɛ a tawɩ Kirisito dʋɔ wɩɛ lɩɩ kɔlɩŋ na gɩbɩrɛ naŋ bɛ. Ama barɛ dʋɔ a tawɩ lɩɩ digela bam naŋ bɛ. 16Baa baa tawɩ wɩɛ ŋii lɩɩ digela bam naŋ na, baa yɩɛ dɩmʋŋ bɛ lɩɩna jawʋ dʋɔ, ba jiŋ gʋ Ɩsʋɔ wɩɛ abama ŋii garɩŋ dʋɔ sɛ ba tɔ maŋ danɛ. 17Baa baa tawɩ Kirisito dʋɔ wɩɛ lɩɩ kɔlɩŋ na gɩbɩrɛ naŋ na, baa tawɩ Kirisito dʋɔ wɩɛ ganaŋkʋ baa yu ba nyiŋeŋ teri, ama ŋɩ n lɩɩ nfɩɛrɛ bam naŋ ŋ. Baa fa nfɩɛrɛ sɛ baa yela na maa na awʋrʋfʋɔ kpi gʋ ma wɩɛ danɛ dɩtʋɔtɩŋ na. 18Ama ŋɩ tiri maŋ? Bʋrʋ gaa ga tiri maŋ na n nyina takɩɛ sɛ baa tawɩ lɩɩ nfɩɛrɛ abama dʋɔ yaa nfɩɛrɛ asʋbʋɛ dʋɔ bɛ o, baa tawɩ Kirisito dʋɔ wɩɛ ŋii. Ŋina dʋɔ maa di ma asa.

Sɛ maa ju dʋɔ di ma asa.

19Akala takɩɛ ma jiŋ gʋ ɩ jɔ dɩga fa maŋ na Yesu Kirisito Feliŋ ŋii ŋɩ chɔna maŋ na dʋɔ, baa lɩɛ maŋ. 20Ŋii ma asa jagaɩ dʋɔ na ma tamaa n nyina takɩɛ gbɩɛ kʋma dʋɔ ma aa di asa juu u. Ama dɩtɩɛna na saŋa kʋma maa yu digela tawɩ Ɩsʋɔ wɩɛ ganaŋkʋ bʋrʋkʋma gaa maa yɩɛ nkpa naŋ yaa sɩŋ naŋ na kpiniŋ, ŋii mʋ jilima fa Kirisito. 21Maŋ bɩrɛ, ma chaɩ nkpa naŋ na, ma chaɩ fa Kirisito, sɛ ma sɩŋ dʋɔ na, ŋɩ yɩɛ tɔnʋɔ bɛ fa maŋ. 22Sɛ ma ju dʋɔ ma chaɩ nkpa naŋ wʋsɛ naŋ na, maa dɩlɛ yɩɛ dɩtʋm bam fa Kirisito. Ama ma ba jiŋ gaa maŋ n lɩsɛ ɛ. 23Ma sɩmɩɛɩ wɩɛ bʋla tɩtɩba, ma jawʋ n nyina sɛ ma n lɩɩ dulunya naŋ, na maa ju ga cha Kirisito jaŋ, ŋii n wɩɛna dieli. 24Ama amɩɛ dʋɔ, ŋɩ wɩɛ dieli takɩɛ ma n ju dʋɔ cha nkpa naŋ. 25Gʋ ma lɩɛ ŋina di na dʋɔ, ma jiŋ gʋ maa cha nkpa naŋ na maa ju dʋɔ cha amɩɛ kpiniŋ jaŋ, ganaŋkʋ maa chɔna amɩɛ na ɩɩ bɩɩ amɩɛ lɩɛdi naŋ, na ɩ yu asadi amɩɛ lɩɛdi naŋ. 26Sɛ ma bɔrɛ kɔŋ amɩɛ jaŋ na, ma dʋɔ ɩ yu asadi fɔɩ Kirisito Yesu naŋ.

27Bʋrʋkʋma gaa ga tibi na, n yela na amɩɛ ayɩɛsa a daga Kirisito wɩɛ abama ŋii. Ma kɔŋ gaa na amɩɛ o yaa ma taŋ amɩɛ jaŋ o na maa nyii amɩɛ dʋɔ sɛ ɩ sɩmɩɛɩ na doŋ yela ɩ yɩɛ bʋdʋŋdʋlʋŋ feliŋ naŋ ɩ chamɩna nʋɔ garɛ ɩ gara lɩɛdi gaa ga yɩɛ wɩɛ abama ŋii. 28N baa se baa ba kʋlʋ sɩŋ amɩɛ dʋɔ bʋrʋkʋma naŋ. Ŋina aaŋ kalaa sɛ Ɩsʋɔ aja warɩɛ ba. Ama amɩɛ bɩrɛ, Ɩsʋɔ aaŋ ja mɔlɔgɩ amɩɛ. 29Akala takɩɛ naa gʋ Ɩsʋɔ fa amɩɛ gbɩɛ sɛ n gaa lɩɛ Kirisito di na nyiŋeŋ dʋɔ ɔ, ama ɩ na awʋrʋfʋɔ fa ɩ. 30Ɩ na awʋrʋfʋɔ gadʋŋdʋlʋŋ gaa ma cha na na, sɛ dɩtɩɛna gba ɩ nyii gʋ ma saŋ maa na awʋrʋfʋɔ.