মথি 5

হাজৗ ছায়াও ফৗরৗংনায়

1সানছেখালি মানসিনি হান্জাখৌ নুনানৈ যীশুআ হাজৗয়াও গাখৗলাংনান জিরাইহৈদৗং আরৗ বিনি ছেলাফ্রা বিনিয়াও ফৈদৗং। 2অব্লা যীশুআ বিছৗরখৌ বেবাদি ফৗরৗংনৗ হমদৗং।

স্বৗর্গৗনি সুখ

(লূক 6:20–23)

3ধন্য জাইফ্রা জিউয়াও হাওরিয়া,

মানৗনা স্বৗর্গৗ রাইজৗয়া বিছৗরনিনৗ।

4ধন্য বিছৗরৗ জাইফ্রা দুঃখ খৗলামৗ,

মানৗনা বিছৗরৗ গৗজৗননায় মৗন্নায়।

5ধন্য জাইফ্রা গুরৈ জায়ৗ,

মানৗনা বিছৗরৗ বুহুমনি অধিকারী জানায়।

6ধন্য জাইফ্রা ধার্ম্মিকতানি থাখৈ উখৈদৗং, আরৗ গাংদৗং,

ঈশ্বৗরা বিছৗরখৌ গৗজৗননায় হৗনায়।

7ধন্য জাইফ্রা অনগ্রা,

মানৗনা বিছৗরৗ অনখাংজানায়।

8ধন্য জাইফৗরনি গৗসৗয়া গৗথার,

বিছৗরৗ ঈশ্বৗরখৌ নুনৗ মৗননায়।

9ধন্য জাইফ্রা গৗরৗবজ্লাইহৗয়ৗ,

মানৗনা বিছৗরৗ ঈশ্বৗরনি বিসাজ্লা হৗন্নানৈ মুংখজানায়!

10ধন্য জাইফ্রা ধৗরৗমনি থাখৈ নাছয়জাদৗং,1

মানৗনা স্বৗর্গৗ রাইজৗয়া বিছৗরনিনৗ।

11“ধন্য নৗংছৗরৗ, জেব্লা আংনি থাখৈ নিন্দিজায়ৗ, নাছয়জায়ৗ আরৗ নৗংছৗরৗ উঙি খৗথাফৗরখৌ বুংজায়ৗ। 12নৗংছৗরৗ রংজা আরৗ খুশি জা, মানৗনা নৗংছৗরনি থাখৈ স্বৗর্গৗয়াও গেদেৎ বানথা দং, বেবাদিনৗ নৗংছৗরনি সিগাং ফৈনায় নবিফ্রাবৗ নাছয়জাদৗংমৗন।”

সৗংখ্রৈ আরৗ স্রাং

(মার্ক 9:50; লূক 14:34–35)

13নৗংছৗরৗ সংসারনি সৗংখ্রৈ, নাথায় সৗংখ্রৈনি গৗবাবমা জৗবমৗব্লা, বিখৌ নৗংছৗরৗ মাব্রৈ গৗবাব খৗলামফিনৗ? বিয়ৗ মৗঙা মৗনছেনিবৗ খামানিয়াও নাঙা। অনগায়ৈ বিখৌ বাইরায়াও গারহৎনায় জায়ৗ আরৗ মানসিফৗরনি আঠেংফৗরজৗং গাফ্লেজায়ৗ।

14“নৗংছৗরৗ সংসারনি স্রাং, জেরৈ হাজৗ ছায়াও লুজানায় নৗগৗরা থাখমানৗ হায়া। 15আরৗ রাওবৗ মানসিয়া বাতিখৌ সাওনানৈ খাদা সিঙাও দৗন্না। নাথায় বাতি দৗনগ্রা ছায়াওছৗ দৗন্নৗ জাহাথে ন্ব'সিঙাও থানায় সাফ্রৗমনৗবৗ স্রাং হৗয়ৗ। 16বিবাদিনৗ নৗংছৗরনি বাতিয়া মানসিফৗরনি সিগাঙাও স্রাং জাথৗং, জাহাথে মানসিফ্রা নৗংছৗরনি মৗজাং মাওনায়ফৗরখৌ নুনানৈ স্বৗর্গৗনি বিফাখৌ বাখ্নাইনায়।

আইননি ফৗরৗংনায়

17“দাসান যে, আঙৗ আইন আরৗ নবিফৗরখৌ সংহার খৗলামনৗ ফৈদৗং হৗন্নানৈ। আঙৗ বিছৗরখৌ সংহার খৗলামনৗ ফৈয়াখৈ, নাথায় বেফৗরখৌ জাফুংহৗনৗছৗ ফৈদৗং। 18নংথারগৌয়ৈ আঙৗ নৗংছৗরখৌ বুঙৗ, জেব্লাসিম নখ্রাং আরৗ বুহুমমা গৗমানায় অৗঙা, অব্লাসিম আইননি গাছেনবৗ জাফুংজৗবমাগৌমানি বিনি বিন্দু মৗনছে এবা বিনি দুইসিন মৗনছে চিহ্নয়াবৗ গৗমৗৎনায় অৗঙা। 19বিনিখাইনৗ ছৗরবায়া বে আদেশফৗরনি ববেবা মৗনছে দুইসিন আদেশখৌ ছিফায়ৗ আরৗ গুবুনফৗরখৌবৗ বিরুদ্ধ মাওনৗ ফৗরৗংঙৗ অব্লা বিয়ৗ স্বৗর্গৗ রাইজৗয়াও বয়নিখুরৈ দুইসিন জানায়। আরৗ ছৗরবায়া বে আদেশখৌ মানিয়ৗব্লা আরৗ গুবুনফৗরখৌবৗ মানিনৗ ফৗরৗংঙৗ অব্লা স্বৗর্গৗ রাইজৗয়াও বিয়ৗ গেদেৎ জানায়। 20মানৗনা আং নৗংছৗরখৌ হৗন্নৗ, আইন গুরু আরৗ ফরীশীফৗরনি ফ্রায় নৗংছৗরৗ রাসিন ধার্মিক জায়াব্লা স্বৗর্গৗ রাইজৗয়াও হাবনৗ মৗনথারনায় অৗঙা।

মানসি সিথাৎনায় খৗথা

21“নৗংছৗরৗ খৗনাখাবায় যে বেখৌ গৗডৗনিফ্রায়নৗ মানসিফৗরখৌ বুংখাদৗংমৗন, ‘নৗংছৗরৗ মানসি দাসিথাৎ আরৗ জাইয়া মানসি সিথাৎনায়, বিয়ৗ বিচারাও দায় গৗনাং জানায়।’ 22নাথায় আং নৗংছৗরখৌ হৗন্নৗ, জাইয়া ফংবায় এবা বিনানাওনি ছায়াও রাগ জায়ৗব্লা, বিয়ৗ বিচারাও দায় গৗনাং জানায়। আরবাও, জাইয়া ‘নৗংখৌ জাম্বা হৗন্নৗব্লা, বিয়ৗ সানসুমৈ গিরিফৗরনিয়াও লাবৗনানৈ বিচার খৗলামজানায়!’ আরৗ জাইয়া ছৗরখৌবা জ্ঞান গৈয়ি হৗন্নানৈ বুঙৗব্লা, বিয়ৗ অয়াৎজৗংব্লাওনায় নরকয়াও গারসনজানায়নি গিনাংগৌয়াও থানায়।

23বিনিখাইনৗ নৗঙৗ জেব্লা বিন্দৗয়াও গাওনি দানখৌ গথাইনায়, বি সমাও বিহানৗ নৗংনি বিরুদ্ধনাও ফংবায় এবা বিনানাওনি মাবা খৗথা দং হৗন্নানৈ নৗঙৗ গৗসৗখাংব্লা, 24নৗংনি দানখৌ বিন্দৗনি মৗখাংয়াও দৗন্থনানৈ, থাং আরৗ গিবিয়াও গাওনি ফংবায়ফৗরজৗং মিলাইজ্লায়গ্রৗদৗ, আরৗ বিনি উনাও ফৈনানৈ নৗংনি দানখৌ বিন্দৗয়াও গথায়দৗ।

25নৗংনি বিরুদ্ধনাও ছৗরবায়া বিচারসালিয়াও এৎদেৎনানৈ হৈব্লা নৗঙৗ বিচারসালিয়াও নুজাহৈনায়নি সিগাংনৗ বিজৗং মিলাইজ্লায়গ্রৗ। অৗঙাব্লা নৗঙৗ এৎদেৎনানৈ হৗগ্রাজৗং বিচার খৗলামগ্রানি সিগাঙাও ফছংহৈজানায়, আরৗ বিচারগিরিয়া নৗংখৌ জৗবথেসালিনি গিরিনৗ গথায়নায়, আরৗ নৗঙৗ জৗবথেসালিয়াও জৗবহৈজানায়। 26নংথারগৌয়ৈ আঙৗ নৗংছৗরখৌ বুঙৗ, নৗং হৗনাংগৌনি গৎছে পায়সাখৌবৗ হৗজৗবমাগৌমানি নৗঙৗ জৗবথেসালিনিফ্রায় গথারনায় অৗঙা।

জিনাহারিনি বিষয়

27“নৗংছৗরৗ খৗনাখাবায়, বে বুংখানায় খৗথাখৌ, ‘নৗংছৗরৗ জিনাহারি দাখৗলাম।’ 28নাথায় আং নৗংছৗরখৌ হৗন্নৗ ছৗরবায়া সাছে হিন্জাওখৌ লুবৈনানৈ নাইহৎনৗব্লা, বিয়ৗ বি সমাওনৗ বিজৗং গৗসৗয়াও জিনাহারি খৗলামবায়। 29বিনিখাইনৗ নৗংনি আগ্ডা মগননা নৗংখৌ পাপমাও খৗখ্লৈব্লা বেখৌ নৗঙৗ এখ্লনানৈ গাহৎ। মানৗনা নৗংনি গাছেন দেহায়া নরকয়াও গারসনজানায়নিখুরৈ থাইছে মগন গৗয়িয়া নৗংনি থাখৈ মৗজাংসিন। 30আরৗ নৗংনি আগ্ডা আখাইয়া নৗংখৌ পাপমাও খৗখ্লৈব্লা, বেখৌ নৗঙৗ দানছনানৈ গারহৎ। নৗংনি গাছেন দেহায়া নরকয়াও গারসনজানায়নিখুরৈ ফাৎছে আখাই গৗয়িয়া নৗংনি থাখৈ মৗজাংসিন।

হিন্জাও নাগারনায়নি বিষয়

(মথি 19:9; মার্ক 10:11–12; লূক 16:18)

31“বে আইনাও দং, ‘ছৗরবায়া গাওনি হিন্জাওখৌ নাগারব্লা বিয়ৗ নাগারনায়নি প্রমাণ বিলাই লিৎনানৈ হৗথৗং।’ 2 32নাথায় আঙৗ নৗংছৗরখৌ হৗন্নৗ, ছৗরবায়া গাওনি হিন্জাওখৌ জিনাহারি ছাড়া গুবুন কারননৈ নাগারৗ, অব্লা বি হিন্জাওখৌ জিনাহারিনি লামাও লাংনায় জায়ৗ, আরৗ জাইয়া বি নাগারজানায় হিনজাওখৌ হাবা খৗলামৗ বিবৗ জিনাহারি খৗলামৗ।

সমায় লানায়নি বিষয়

33“নৗংছৗরৗ খৗনাবায়, গৗডৗনি মানসিফৗরনৗ বুংখানায়দংমৗন, ‘গাওনি সমায় লানায়খৌ দাছিফায়, নাথায় ফৗরবুনি থাখৈ জেখৌ সমায় লাবায় বেখৌ জাফুংহৗদৗ।’ 34নাথায় আং দা নৗংছৗরখৌ হৗন্নৗ, নৗংছৗরৗ জেবৗ সমায় দালা, স্বৗর্গৗনিবৗ সমায় লানৗ নাঙা, মানৗনা বিয়ৗ ঈশ্বৗরনি সিংহাসন; 35এবা বুহুমনিবৗ সমায় লানৗ নাঙা, মানৗনা বুহুমমা ঈশ্বৗরনি আঠেংদৗনগ্রা, যিরূশালেমনিবৗ সমায় লানৗ নাঙা, মানৗনা বিয়ৗ গেদেৎ রাজানিছৗ নৗগৗর। 36নৗঙৗ গাওনি খর'নি মুঙৈবৗ সমায় লানৗ নাঙা মানৗনা নৗঙৗ গাওনি খর'নি খানায় ডৗংছেখৌবৗ গুফুৎ এবা গৗছৗমবৗ খৗলামনৗ হায়া। 37নৗংছৗরনি বুংনাইয়া অৗংগৌলা অৗংগৌ অৗঙালা অৗঙা, বেনৗ জাথৗং, বেনি বাংসিননা গাজ্রিনিফ্রায় ফৈয়ৗ।

ফালঠা লানানইনি খৗথা

(লূক 6:29–30)

38“নৗংছৗরৗ বে খৗথাখৌ খৗনাবায়, ‘মগননি বদল মগন, আরৗ3হাথাইনি বদল হাথাই।’ 39নাথায় আং নৗংছৗরখৌ হৗন্নৗ, গাজ্রি মানসিখৌ বাধা দাহৗ। ছৗরবায়া নৗংছৗরখৌ আগ্ডা খাওলায়াও সোবাব্লা, বিছৗরনৗ গুবুন ফাৎছে খাওলায়খৌবৗ গথায়নানৈ হৗ। 40ছৗরবায়া বিচারসালিয়াও বিচার খৗলাম হৗনানৈ নৗংনি গুছ্লাখৌ মৗননৗ লুবৈয়ৗব্লা, বিনৗ নৗংনি জুমগ্রা সি'খৌবৗ হৗ। 41আরৗ ছৗরবায়া নৗংখৌ এক মাইল বিবান বানলাংহৗব্লা, বিছৗরজৗং নৗঙৗ দুই মাইল বান্নানৈ হৈ। 42ছৗরবায়া নৗংনিয়াও মাবা মুঙাফৗর বিদৗংব্লা, বিনৗ হৗ আরৗ ছৗরবায়া নৗংনিফ্রায় ছৗলাও বিব্লা, বিখৌ নৗঙৗ আখাইগৗজা দাহগারহৎ।

বিসারুফৗরখৌ অন্নায়নি বিষয়

(লূক 6:27–28,32–36)

43“নৗংছৗরৗ বে খৗথাখৌ খৗনাবায়, গাওনি উছুংছেনি পাড়াপুরুশিফৗরখৌ অন, আরৗ বিসারুফৗরখৌ মুগৈ। 44নাথায় আঙৗ নৗংছৗরখৌ হৗন্নৗ, নৗংছৗরৗ গাওনি বিসারুফৗরখৌ অন, আরৗ জাইফ্রা নৗংছৗরখৌ নাছয়ৗ বিছৗরনি থাখৈ প্রার্থনা খৗলাম, 45জাহাথে নৗংছৗরৗ স্বৗর্গৗয়াও থানায় নৗংছৗরনি বিফানি বিসাফৗর জানৗ হায়ৗ। মানৗনা বিয়ৗ মৗজাং গাজ্রি বয়নিবৗ ছায়াও গাওনি সানখৌ স্রাং হৗয়ৗ, আরৗ ধার্মিকফৗরনি ছায়াও জেরৈ, বেবাদিনৗ অধার্মিকফৗরনি ছায়াওবৗ নখা হাহৗয়ৗ, 46আরৗ নৗংছৗরখৌ জাইফ্রা অন্নৗ, বিছৗরখৌ বান নৗংছৗরৗ অনফিননৗব্লা, ঈশ্বৗরনিফ্রায় নৗংছৗরৗ মা পুরস্কার মৗনৗ হাগৌ? মা কি খাজনা খাংগ্রাফ্রাবৗ বেখৌনৗ খৗলামা? 47আরৗ নৗংছৗরৗ গাও গাওনি মানসিফৗরখৌ বান অনব্লা, গুবুনফৗরনিখুরৈ নৗংছৗরৗ মা বাংসিন মাওখৗ? বেবাদিখৌ সংসারিফ্রাবৗ বেখৌনৗ খৗলামৗ? 48নৗংছৗরনি স্বৗর্গৗনি বিফাআ জেরৈ খাঁটি, বেবাদিনৗ নৗংছৗরবৗ খাঁটি জা।”