মথি 6

দান হৗনায়নি বিষয়

1“সাবধান জা মানসিফৗরনৗ দিন্ঠিনৗ থাখৈ বান নৗংছৗরৗ ধৗরৗমনি খামানিফৗরখৌ মাওনৗ নাঙা, নৗং মাওব্লা নৗংছৗরনি স্বৗর্গৗয়াও থানায় বিফানিফ্রায় নৗং মৗনবৗ পুরস্কার মৗননায় অৗঙা।

2বিনিখাইনৗ নৗংছৗরৗ জেব্লা হাওরিয়াফৗরনৗ দান হৗয়ৗ, দিন্ঠিফ্লাগ্রাফ্রা জেরৈ সিবিগ্রা ন্ব'য়াও আরৗ লামাফৗরাও বয়নৗবৗ দিন্ঠিনানৈ বাখ্নাইজানৗ থাখৈ দান হৗয়ৗ, বেবাদি নৗংছৗরৗ দাহৗ। নংথারগৌয়ৈ আঙৗ নৗংছৗরখৌ বুঙৗ, বিছৗরৗ গাও গাওনি পুরস্কারখৌ ঠৗজাছে মৗনখাবায়। 3নাথায় জেব্লা নৗংছৗরৗ হাওরিয়াফৗরনৗ দান হৗয়ৗ, অব্লা নৗংছৗরনি আগ্ডা আখাইয়া মা মাওদৗং বিখৌ নৗংছৗরনি আখছি আখাইখৌ দামিথিহৗ। 4নৗংনি দান হৗনাইয়া জাহাথে গোপন থায়ৗ। অব্লা নৗংনি বিফায়া, জাইয়া নৗংনি মাওনায়খৌ গোপননৈ নুয়ৗ, আরৗ বিয়ৗ নৗংনৗ পুরস্কার হৗনায়।

প্রার্থনা আরৗ উপবাসনি ফৗরৗংনায়

(লূক 11:2–4)

5“নৗংছৗরৗ প্রার্থনা খৗলামৗব্লা, দিন্ঠিফ্লাগ্রাফৗর বাদি প্রার্থনা দাখৗলাম। মানৗনা বিছৗরৗ বয়বৗ নুনায় বাদি সিবিগ্রা ন্ব'ফৗরাও আরৗ লামানি খনাফৗরাও গছংনানৈ প্রার্থনা খৗলামনৗ মৗজাংমৗনৗ। নংথারগৌয়ৈ আঙৗ নৗংছৗরখৌ বুঙৗ, বিছৗরৗ গাও গাওনি মৗননাংগৌ পুরস্কারখৌ ঠৗজাছে মৗনখাবায়। 6নাথায় জেব্লা নৗং প্রার্থনা খৗলামৗ, অব্লা নৗংনি খঠ্রা সিঙাও হাব, দুয়ার ফাংথেনানৈ নৗঙৗ বিফানিয়াও প্রার্থনা খৗলাম, জাইয়াখৌ নুয়া, জাইয়া নৗংনি মাওনায়খৌ গোপননৈ নুয়ৗ আরৗ বিয়ৗ নৗংনৗ পুরস্কার হৗনায়।

7জেব্লা নৗংছৗরৗ প্রার্থনা খৗলামৗ, অব্লা গুবুন ধৗরৗমমিয়াফৗর বাদি নংবাং জাবাং খৗথাফৗরজৗং বিখৗন বিখৗন প্রার্থনা খৗলামনৗ নাঙা। মানৗনা গলে গলে প্রার্থনা খৗলামনাইয়াও ঈশ্বৗরা বিছৗরনি প্রার্থনাফৗরখৌ খৗনাছংজানায় হৗন্নানৈ সান্নৗ। 8বিছৗরবাদি নৗংছৗরৗ দাজা, নৗংছৗরনৗ মা নাংগৌ, বেখৌ নৗংছৗরনি বিফায়া নৗংছৗর বিয়া সায়াওনৗ মিথিখাগৌ। 9নৗংছৗরৗ বেবাদিনৗ প্রার্থনা খৗলামনৗ নাংগৌ:

জৗংনি স্বৗর্গৗয়াও থানায় আফা

নৗংনি মুঙা গৗথার জাথৗং,

10নৗংনি রাইজৗয়া ফৈথৗং,

নৗংনি গৗসৗয়া জেরৈ স্বৗর্গৗয়াও

বেবাদিনৗ বুহুম ছায়াওবৗ জাথৗংহৗনা

11জৗংনি সানফ্রৗমবৗনি জানৗ দিনৈনি নাংগৌখৌ জৗংনৗ হৗ।

12আরৗ জৗংনি গাছেন দায়ফৗরখৌ ক্ষমা হৗ

জেরৈ জৗংবৗ গুবুনফৗরনি ছায়াও দায় মাওনায়ফৗরখৌ ক্ষমা হৗয়ৗ।

13আরৗ জৗংখৌ আনজাৎনাও দাখৗখ্লায় নাথায় গাজ্রিনিফ্রায় জৗংখৌ বাছায়।

14নৗংছৗরনি বিরুদ্ধনাও গুবুনফৗর দায় মাওনায়খৌ নৗংছৗর ক্ষমা হৗব্লা, স্বৗর্গৗনি বিফায়াবৗ নৗংছৗরনি দায় মাওনায়খৌ নিমাহা হৗনায়। 15নাথায় নৗংছৗরনি বিরুদ্ধ গুবুনফৗর দায় মাওনায়খৌ নৗংছৗরৗ ক্ষমা হৗয়াব্লা নৗংছৗরনি বিফায়াবৗ নৗংছৗরনি দায়খৌ ক্ষমা হৗনায় অৗঙা।

উপবাসনি খৗথা

16“জেব্লা নৗংছৗরৗ উপবাস থায়ৗ, অব্লা দিন্ঠিফ্লাগ্রাফৗর বাদি মৗখাং ছৗম দিন্ঠিনৗ নাঙা। উপবাস থাদৗং হৗন্নানৈ গুবুনফৗরনৗ দিন্ঠিনৗ বিছৗরৗ গাওছৗরনি মৗখাংফৗরখৌ মৈলা দৗন্নৗ। নংথারগৌয়ৈ আঙৗ নৗংছৗরখৌ বুঙৗ, বিছৗরৗ গাও গাওনি মৗননাংগৌ পুরস্কারখৌ ঠৗজাছে মৗনখাবায়। 17নাথায় জেব্লা নৗংছৗরৗ উপবাস থায়ৗ, অব্লা খর'য়াও থাও ফুন আরৗ নৗংছৗরৗ গাও গাওনি মৗখাংখৌ চু, 18অব্লানৗ রাওবৗ নৗংছৗরখৌ উপবাস থাদৗং হৗন্নানৈ মিথিনায় অৗঙা, নাথায় নৗংছৗরনি বিফা বান, জাইয়া নুজায়া; আরৗ নৗংছৗরনি বিফা, জাইয়া গোপনাও মা মাওদৗং বিখৌ নুয়ৗ, আরৗ বিনৗ নৗংছৗরনৗ পুরস্কার হৗনায়।

স্বৗর্গৗনি ধৗন

(লূক 12:33–34)

19“গাও গাওনি থাখৈ বে বুহুমাও ধৗনখৌ দাফুথুম বেয়াও গুন অৎনৗ, মারাম জায়ৗ, আরৗ সিখাওফ্রাবৗ খাওয়ৗ। 20নাথায় গাও গাওনি থাখৈ স্বৗর্গৗনি ধৗনখৌ বুথুম, জেরেও এমফৌবৗ আরৗ মামৗর খানাইয়াবৗ আদ্রিখৗলামা, আরৗ সিখাওফ্রাবৗ ইনজুর হানান খাওনৗ হায়া। 21মানৗনা নৗংছৗরনি ধৗন সম্পত্তিয়া জেরও থায়ৗ, বিহানৗ নৗংছৗরনি গৗসৗয়াবৗ থায়ৗ।

22মগননা মৗদৗমনি বাতি। নৗংনি মগননা মৗজাংব্লা, নৗংনি গাছেন মৗদৗমমানৗ স্রাং জাজৗবনায়। 23নাথায় নৗংনি মগননা গাজ্রিব্লা নৗংনি গাছেন মৗদৗমমানৗ বেছে খৗমসি জানায়! বেনিখাইনৗ নৗংনিয়াও থানায় স্রাংয়া, খৗমসি জাব্লা, বি খৗমসি বেছেগ্রাব গেদেৎ!

সানৈ বৈগৗমানি দাস

(লূক 16:13; 12:22–31)

24“রাওবৗ সানৈ বৈগৗমাখৌ সেবা খৗলামনৗ হায়া মানৗনা বিয়ৗ সাছেখৌ মুগৈনায় আরৗ গুবুন সাছেখৌ অন্নায়, এবা বিয়ৗ সাছেজৗং নাংঠাবনায় আরৗ গুবুন সাছেনিফ্রায় গৗজান জানায়। নৗংছৗরৗ ঈশ্বৗর আরৗ টাকা পায়সা, বে মৗন্নৈখৌ লৗগৗছে সেবা খৗলামনৗ হায়া।

চিন্তা দাখৗলাম

25“বেনিখাইনৗ আঙৗ নৗংছৗরখৌ হৗন্নৗ, জিউনি থাখৈ, মা জানায় আরৗ মা লৗংনায়, আরৗ মৗদৗমনি থাখৈ নৗংছৗরৗ মা গান্নায় আরৗ জুমনায়, নৗংছৗরৗ জেবৗ চিন্তা দাখৗলাম। মা কি জিউয়া জানায় লৗংনায় এবা মৗদৗমনি গান্নায় জুমনায়নিফ্রায়, গৗনাংসিন বিষয় অৗঙা না? 26নাইদৗ নখ্রাংনি দাওছেনফৗরখৌ; বিছৗরৗ বিগৎবৗ ফৗয়া এবা হায়া, আবাদবৗ বাখ্রিয়াও বুথুমা, অব্লাবৗ নৗংছৗরনি স্বৗর্গৗনি বিফাআ বিছৗরখৌ জাহৗগাছৈনৗ দং। মা কি নৗংছৗরৗ দাওছেনফৗরনি খুরৈ দাম গৗছাসিন অৗঙা না? 27আরৗ বেফৗরনি থাখৈ সানহাবনানৈ ছৗরবায়া গাওনি আয়ুখৌ ঘন্টা মৗনছে ফৗলাওদেৎনৗ হানায় খৗমা?

28আরৗ মানৗ নৗংছৗরৗ গাননায় জৗমনায়নি থাখৈ জিংগা সিয়ৗ? সাননানৈ নায়, হুয়াওনি লিলি বিবারফ্রা মাব্রৈ দেৎনৗ। বেফৗরৗ খামানিফৗরবৗ মাওয়া, এবা সি'ফৗরবৗ দায়া, 29অব্লাবৗ আঙৗ নৗংছৗরখৌ বুঙৗ, যে শলোমন রাজায়া এছেবাং জৗংব্লাও মাব্লাও সাজাইনানৈ থানায়াওবৗ বে বারছে বিবার বাদিবৗ গাওখৌ সমায়হৗনৗ হায়াখৈছৈ। 30ফৗথারাও রজনায় গাংসৗয়া দিনৈ দং, নাথায় গাবৗননৗ অয়াৎনাও গারসৗন্নান সাওজানায়, অব্লাবৗনৗ ঈশ্বৗরা বেফৗরখৌনৗ এছেবাং সাজাইয়ৗব্লা, ও ইছে ফৗথায়নাইফৗর, মা কি বিয়ৗ নৗংছৗরখৌ বাংসিন সাজাইসিননায় অৗঙা?

31বিনিখাইনৗ বেবাদি বুংনানৈ চিন্তা দাখৗলাম, জৗঙৗ মা জানায়? এবা জৗঙৗ মা লৗংনায়? এবা জৗঙৗ মা গাননায় হৗন্নানৈ। 32মানৗনা গুবুনহারিফ্রা বেফৗরনি উনাও খাৎনৗ, বেফৗর গাছেনখৌবৗ নৗংছৗরনৗ নাংগৌ হৗন্নানৈ নৗংছৗরনি স্বৗর্গৗনি বিফায়া মিথিখাগৌ। 33নাথায় সিগাংয়াও ঈশ্বৗরনি রাইজৗখৌ আরৗ বিনি ধৗরৗমসুলাখৌ নাগিৎ, অব্লানৗ বিয়ৗ বেফৗর গাছেনখৌবৗ নৗংছৗরনৗ হৗয়া জানায়। 34বেনিখাইনৗ নৗংছৗরৗ গাবৗননি থাখৈ জিংগাসিনৗ নাঙা, মানৗনা গাবৗনা গাওনি থাখৈ গাওনৗ জিংগাসিনায়। দিনৈনি থাখৈ দিনৈনৗ সৈনাইয়ানৗ ঠৗয়ৗ।”