মার্ক 12

আংগুর বাগাননি দৃষ্টান্তনি খৗথা

(মথি 21:33–46; লূক 20:9–19)

1যীশুআ অব্লা বিছৗরখৌ দৃষ্টান্তজৗং বুংনৗ হমবায়, 1 “সাছে মানসিয়া মৗনছে আংগুর বাগান খৗলামনানৈ সৗরগিদিং বারি দুমনানৈ আংগুর বিথাই ফেরেথনৗ মৗনছে হাখোর জাওবায় আরৗ গংছে গৗজৗও নেগ্রা টং লুবায়। বিনি উনাও আবাদ মাওগ্রাফৗরনৗ বিয়ৗ আদি হৗনানৈ গাও গুবুন হাদৎনাও থাংবায়। 2জেব্লা বিথাই বুথুমনায় বৗথৗরা ছফৈয়ৗ, অব্লা বিয়ৗ গাওনি মৗননাংগৌ বাহাগৗখৌ আদিয়ারিনিফ্রায় লায়নৗ সাছে দাসখৌ বারিয়াও থৗনহৎবায়। 3নাথায় বিছৗরৗ বি দাসখৌ হমনানৈ বুদৗং আরৗ বুনানৈ আখাইগৗজা থৗনহৎফিনবায়। 4বিনি উনাও বৈগৗমায়া গুবুন সাছে দাসখৌ বিছৗরনিয়াও থৗনহৎবাওবায়; নাথায় বিখৌবৗ বিছৗরৗ খরঃবুদ্লাবনানৈ লাজিহৗবায়। 5বৈগৗমায়া আরবাও গুবুন সাছে দাসখৌ থৗনহৎবাওবায়, নাথায় বিখৌ বিছৗরৗ সিথাৎবায়; বেবাদিনৗ বিয়ৗ গৗবাংথারখৌনৗ থৗনহৎবায়, নাথায় খাইছেখৌ বুবায়, আরৗ গুবুন খাইছেখৌ সিথাৎবায়। 6বিনেও থৗনহৎনৗ থাখৈ গাওনি বিসাজ্লা সাছে বানছৈমৗন জাইখৌ বিয়ৗ অন্নৗ মৗন বিখৌ নাগারনানৈ গুবুন রাওবৗ গৈলেমৗন। বিনিখাইনৗ জৗবনায়াও বৈগৗমায়া বিখৌনৗ থৗনহৎবায়, সান্নানৈ, ‘আংনি বিসাজ্লাখৌ বিছৗরৗ মানহৗনায়।’ 7নাথায় আদিয়ারিফ্রা গাওজৗং গাও বেবাদি হৗনজ্লাইবায়, ‘বৈগৗমানি ওয়ারিশা বিনৗ, দে জৗং বিখৌ সিথাৎদৗনি, অব্লা বিনি সম্পত্তিনি মালিকআ জৗংনৗ জানায়।’ 8বিনিখাইনৗ বিছৗরৗ বিখৌ লাংনানৈ সিথাৎনাছৈ আরৗ আংগুর বাগাননি বাইরায়াও গারহৗৎনাছৈ।”

9যীশুআ বিছৗরখৌ সৗংবায়, “খৗথাছায়, অব্লা বে আংগুর বাগাননি বৈগৗমায়া মা খৗলামনায়? বিয়ৗ ফৈনানৈ বে আদিয়ারিফৗরখৌ সিথাৎনায়, আরৗ আংগুর বাগানখৌ গুবুনফৗরনৗ হৗস্লাইনায়। 10মা নৗংছৗরৗ গৗথার শাস্ত্রয়াও লিৎনায় বে খৗথাখৌ ফরাইয়াখৈ!2

‘ন্ব' লুগ্রা রাজমিস্ত্রিফৗরজৗং গারজানায় অন্ঠাইয়া

বিনৗ বৈনিখুরৈ নাংথারগৌ গাইজেন্নায় খণানি গাহায় অন্ঠাই জাবায়।

11বেখৌ ফৗরবুআনৗ মাওবায়;

আরৗ জৗংনি নুনাইয়াও বে, বেছেগ্রাব সৗমৗ গৗনাং।’”

12যীশুনি বুংনায় বে দৃষ্টান্তয়া বিছৗরনি বিরুদ্ধনাওছৗ, সান্নানৈ দৈদেনগ্রাফ্রা যীশুখৌ হমনৗ হাস্থাইদৗংমৗন। নাথায় বিছৗরৗ হান্জাখৌ গিনানৈ যীশুখৌ নাগারনানৈ থাংবায়।

খাজনানি খৗথা

(মথি 22:15–22; লূক 20:20–26)

13উনাও যিহূদীয়ারি দৈদেনগ্রাফ্রা খৗথাজৗং যীশুখৌ ফান্দাইনৗ, ফরীশীফৗরনি আরৗ হেরোদনি দলনি খাইছে মানসিফৗরখৌ বিনিয়াও থৗনহৎবায়। 14আরৗ বিছৗরৗ হৗনবায়, “ও ফৗরৗংগুরু, জৗঙৗ মিথিগৌ, নৗঙৗ সাছে সৈথৗ মানসি গুবুনফৗরনি বুংনায়খৌ জেবৗ সান্নাজাছে নৗঙৗ নৗংথারগৌখৌ রাইঠিয়ৗ। নৗং গেদেৎ উন্দৈ মৗখাং নায়াজাছে ঈশ্বৗরনি নৗংগৌখৌ ফৗরৗঙৗ। জৗংনৗ খৗথাছায়, র'মারিনি গেদেৎ রাজা কৈসরনৗ খাজনা হৗনায়া আইন বাদি হামগৌ না হামা? 15জৗং হৗনাগৌ না হৗনাঙা?” যীশুআ বিছৗরনি ফান্দাইনৗ হাস্থাইনায়খৌ মিথিনানৈ হৗনবায়, “নৗংছৗর মানৗ আংখৌ খৗথাজৗং ফান্দাইনৗ হাস্থাইদৗং? রুপানি থাইছে দিনারী লাবৗনানৈ আংনৗ দিন্ঠিছায়,” 16থৗনজানায় বাদি বিছৗরৗ থাইছে রুপানি টাকা লাবৗনানৈ হৗফৈবায়, আরৗ বিয়ৗ সৗংবায়, “বে ছৗরনি মহর জাখৗ?”

বিছৗরৗ বুংফিনবায়, “কৈসরনি।”

17অব্লা যীশুআ বিছৗরখৌ হৗনবায়, “দে, কৈসরনিখৌ কৈসরনৗ আরৗ ঈশ্বৗরনিখৌ ঈশ্বৗরনৗ হৗ।”

যীশুনি বে বুংনায়খৌ খৗনানানৈ বিছৗরৗ সৗমৗ নাংবায়।

থৈনায়নিফ্রায় ঠাংখাংফিন্নায়নি খৗথা

(মথি 22:23–33; লূক 20:27–40)

18থৈনায়নিফ্রায় ঠাংখাংফিন্নায় গৈয়া হৗনগ্রা সদ্দূকীফ্রাবৗ যীশুনিয়াও থাংনানৈ সৗংবায়, 19“ও ফৗরৗংগুরু, জৗংনি থাখৈ মোশিয়া বে আইনখৌ লিৎনানৈ গালাংদৗং, ‘ছৗরবায়া হিন্জাও হাবা খৗলামনানৈ বিসা মৗনালাবা থৈব্লা, বিনি থালাংনায় হিন্জাওখৌ বে থৈনায় মানসিনি ফংবাইয়া হাবা খৗলামনানৈ গাওনি বিদানি জৗলৈ লাখিনৗ নাংগৌ।’ 20হমনানৈ লা, মৗনছে জাইগায়াও সাত জন বিদাফংবায়ফৗর দংমৗন; গিবিয়া হাবা খৗলামনানৈ বিসা মৗনালাবমানৗ থৈদৗং। 21অব্লা বিনি আন্জাইয়া বিদানি থালাংনায় রান্ডি হিন্জাওখৌ হাবা খৗলামনানৈ লাদৗং, বিবৗ বিসা মৗনালাবমানৗ থৈদৗং, আরৗ বিনি আন্জাইনেবৗ বেবাদিনৗ জায়াছৈ। 22বেবাদিনৗ সাতজনবৗ বে সাছে হিন্জাওখৌনৗ সাছেনি উনাও সাছে হাবা খৗলামনানৈ লাদৗং, আরৗ সাফ্রৗমবৗ বিসা মৗনালাবমানৗ থৈদৗং। জৗবনাইয়াও হিন্জাওআবৗ থৈদৗং। 23অব্লা ঠাংখাংফিন্নায় সমাও বে হিন্জাওআ ছৗরনি জানায়? মানৗনা বি হিন্জাওআ সাত জন বিদা ফংবায়ফ্রা বি হিন্জাওখৌনৗ হাবা খৗলামদৗং মৗন।”

24যীশুআ বিছৗরখৌ বুংফিনদৗং, “নৗংছৗরৗ ভুললাও দং মানৗনা নৗংছৗর শাস্ত্রখৌবৗ আরৗ ঈশ্বৗরনি বৗলৗখৌবৗ মিথিয়া। 25জেব্লা গৗথৈফ্রা ঠাংখাংফিনায়, অব্লা বিছৗরৗ হাবা খৗলামনায় অৗঙা আরৗ হাবাবৗ হৗজানায় অৗঙা, বি সমাও বিছৗরৗ স্বৗর্গৗনি আরফ'ফৗর বাদি জানায়। 26থৈনায়নিফ্রায় ঠাংখাংফিন্নায়নি খৗথা: নৗংছৗরৗ মোশিনি বিজাবমাও লিৎনায় বিংফাং গাইজ্রাব-য়াও অৎ জৗংনায়নি খৗথা ফরাইফেৎনাখৈ নামা? বেয়াও ঈশ্বৗরা মোশিখৌ বেবাদি হৗন্দৗং, ‘আঙৗ অব্রাহামনি ঈশ্বৗর, ইসাহাকনি ঈশ্বৗর, আরৗ যাকোবনি ঈশ্বৗর।’ 27বিয়ৗ গৗঠাংফৗরনি ঈশ্বৗর, গৗথৈফৗরনি ঈশ্বৗর অৗঙা। নৗংছৗরৗ বিরাঠ ভুলমাওবায়।”

দেৎসিন আদেশ

(মথি 22:34–40; লূক 10:25–28)

28বে সমাও, বি জায়গাও আইন গুরুফৗরনি গেজেরাও সাছে ফৈদৗং আরৗ বিয়ৗ বিছৗরনি রাইজ্লাইনায়খৌ খৗনাদৗং, আরৗ সদ্দূকীফৗরনি জেরৈ বুংফিনাংগৌ, বেবাদি যীশুনি মৗজাংয়ৈ বুংফিন্নায়খৌ নজৗরহৗনান বিয়ৗ যীশুনেও ফৈনানৈ সৗংদৗং, “আদেশফৗরনি গেজেরাও ববে আদেশা দেৎসিন।” 29যীশুআ বুংফিনবায়, “দেৎসিন আদেশা বেনৗ, ‘ও ইস্রায়েলআরি, খৗনাছং! জৗংনি ফৗরবু ঈশ্বৗর বান ফৗরবু। 30আরৗ নৗঙৗ গাওনি ফৗরবু ঈশ্বৗরখৌ নৗংনি গাছেন গৗর্বৗ, গাছেন জিউ, গাছেন গৗসৗ আরৗ গাছেন বৗলৗজৗং অন।’3 31গুবুন মৗনছে গৗনাংসিন আদেশা বেনৗ, ‘নৗঙৗ গাওনি পাড়াফুরসিখৌ গাওখৌ বাদি অন।’ বে মৗন্নৈ আদেশনিখুরৈ গুবুন গৗনাংসিন আদেশ গৈলে।”

32আইন গুরুআ যীশুখৌ হৗনবায়, “ও, নৗংগৌ, ফৗরৗংগুরু! নৗঙৗ নৗংগৌখৌনৗ হৗনবায়, বে ফৗরবুআ বান ঈশ্বৗর, বিখৌ নাগারনানৈ গুবুন ঈশ্বৗর গৈলে। 33বে ঈশ্বৗরখৌ গাছেন গৗর্বৗজৗং গাছেন মিথিনায়জৗং আরৗ গাছেন বৗলৗজৗং অন; আরৗ গাওখৌ জৗরৈ অন্নৗ, বেবাদিনৗ গাওনি পাড়াফুরুসিখৌবৗ অন। ঈশ্বৗরনৗ বলি বাওনায় আরৗ সাওফুংনায় মানিনায়নিখুরৈ বে মৗন্নৈ আদেশা গৗনাংসিন।” 34আইনগুরুনি গিয়ানজৗং বুংনায়খৌ খৗনানানৈ যীশুআ বিখৌ হৗনবায়, “নৗঙৗ ঈশ্বৗরনি রাইজৗনিফ্রায় গৗজান অৗঙা।”

আরৗ যীশুনেও সৗংবাওনৗ রাওবৗ গৗহৗ জায়াখৗছৈ।

মসিহ'নি খৗথা

(মথি 22:41–46; লূক 20:41–44)

35যীশুআ মন্দিরাও ফৗরৗংনায়াও বেবাদি হৗনবায়, “আইন গুরুফ্রা মাব্রৈ বুংনৗ হাগৌ, মসিহয়া4 দায়ুদনি জৗলৈ হৗন্নানৈ? 36গৗথার জিউনি দৈদেন্নায়াও দায়ুদআ গাওনৗ হৗন্দৗং,

‘বি ফৗরবু ঈশ্বৗরা আংনি ফৗরবুখৌ হৗনবায়,

“নৗংনি বিসারুফৗরখৌ আঙৗ নৗংনি আঠেং সিঙাও দৗনজৗবমাগৌমানি

নৗঙৗ আংনি আগ্ডাজৗং জিরাইবায় থাদৗ।”’5

37দায়ুদআ গাওনৗ বিখৌ ‘ফৗরবু’ মুংখদৗং; অব্লা ঈশ্বৗরজৗং সাইখোজানায় বাছাইগিরি রাজাআ মাব্রৈ দায়ুদনি জৗলৈ জাখৗ?” গেদেৎ হান্জায়া যীশুনি বুংনায়খৌ রংজা বাজা খৗনাছংবায়।

আইন গুরুফৗরখৌ সাবধান খৗলামনায়

(মথি 23:1–36; লূক 20:45–47)

38যীশুআ গাওনি ফৗরৗংনায়াও হৗনবায়, “নৗংছৗর আইন গুরুফৗরনিফ্রায় সাবধান জাদৗ, বিছৗরৗ গৗলাও গৗলাও খসাবফৗর গান্নানৈ থাবায়বাইনৗ হামজায়ৗ, আরৗ হাঠায়সালিফৗরাও গৗজৗন্নায় লাজানৗ মৗজাংমৗনৗ; 39সিবিগ্রা ন্ব'ফৗরাও মৗজাংসিন আসন, আরৗ ভোজফৗরাও, মান গৗনাং জায়গাফৗরখৌ সাইখয়ৗ; 40বিছৗরৗ রান্ডিফৗরনি ন্ব'বাংফৗরখৌ সেজৗবমৗ আরৗ দিন্ঠিফ্লানৗ থাখৈ গৗলাও গৗলাও প্রার্থনা খৗলামৗ, বিছৗরৗ গৗব্রাবসিনথার শাস্তি হৗজানায়!”

রান্ডিনি দান

(লূক 21:1–4)

41যীশুনি মন্দিরাও দান নাজাওগ্রা বাক্স জিংয়াও জিরাইনানৈ দান হৗলাংনায়ফৗরখৌ নাইবায় থাদৗংমৗন। বিয়ৗ গৗবাং ধৗনিফৗরখৌ গৗবাং গৗবাং টাকা হৗলাংনায় নুবায়; 42নাথায় উনাও সাছে হাওরিয়া রান্ডিআ ফৈনানৈ গৎনৈ পয়সা হৗফৈনায়খৌ বিয়ৗ নুদৗং, যাইনি দামমা সিকিছে বান। 43অব্লা যীশুআ গাওনি ছেলাফৗরখৌ লিংহৎনানৈ হৗন্দৗং, “নংথারগৌয়ৈ আঙৗ নৗংছৗরখৌ বুঙৗ, দান হৗনায়ফৗরনি গেজেরাও বে হাওরিয়া-আ বাংসিন হৗবায়। 44মানৗনা গুবুনফ্রা বয়বৗ গাওছৗরনি আগ্লাইনায়নিফ্রাইছৗ হৗফৈদৗং, নাথায় বে হাওরিয়া রান্ডিয়া গাওহা ঠাংনানৈ থানৗ দংনায়মানিখৌ হৗফৈজৗববায়।”