Mech
লূক 2
যীশু সারিজানায়
(মথি 1:1–25)
বি সমাও মহারাজা আগাস্তা খৈসরআ রোম রাইজৗনি গাছেন মানসিফৗরনি নামফৗরখৌ মানসি সানগ্রা লেখাফৗরাও লিৎনৗ হুখুম হৗদৗং। সিরিয়ানি শাসনগিরি কুরিনিয়াসনি সমাও বে মানসি গননা লাজেন্নায়া জাজেনদৗংমৗন। আরৗ বয়বৗ নাম লিৎহৗজানৗ থাখৈ গাও গাওনি নৗগৗরাও থাংদৗংমৗন।
যোষেফমাবৗ গালীলনি নাসরৎ নৗগৗরনি ফ্রায় দায়ূদ রাজা সারিজানায় জায়গা যিহূদিয়ানি বৈৎলেহেম নৗগৗরাও থাংদৗং, মানৗনা যোষেফআ দায়ূদনি বংশনি মানসি মৗন। যোষেফমা হাবা খৗলামনৗ গাওজৗং আর্শীবাদ জাখানাই মরিয়মখৌ লৗগৗয়াও লানানৈ মুং লিৎজাহৗনৗ থাংদৗংমৗন। বি সমাও মরিয়মা মৗদৗমাও দংখাছৈমৗন। আরৗ বিছৗর বৈৎলেহেমাও থানায় সমাও, মরিয়মনে গথ' সারিহৗনাইনি সময়া ছৗফৈবাইমৗন। আরৗ বিয়ৗ গাওনি গিবি বিসা হৌয়াখৌ সারিবায়; আরৗ গথ'খৌ ছিস্রি সি'জৗং ফামফফনানৈ গংছে গন্দ্রাইয়াও ফুঠুবায়, মানৗনা আলাসিফৗর থাগ্রা ন্ব'য়াও বিছৗরনি থাখৈ জায়গা গৈয়ামৗন।
আরফ আরৗ মেন্ডা লাওখারফৗর
আরৗ বৈৎলেহেম সাখাঠিয়াও, মেন্ডা লাওখারফ্রা হরাও গাওছৗরনি মেন্ডাফৗরখৌ নেবায় থাদৗংমৗন। বি সমাওনৗ সাছে ফৗরবুনি আরফ'য়া বিছৗরজৗং ঠাবনৗ নুজাফৈদৗং, আরৗ ফৗরবুনি মহিমায়া বিছৗরনি ছারিগিদিং জৗংফবদৗং, আরৗ বিখৌ নুনানৈ বিছৗরৗ গিখ্রৗংদৗং। নাথায় আরফ'আ বিছৗরখৌ হৗনবায়, “দাগি, আঙৗ নৗংছৗরনৗ গেদেৎ রংজানায়নি মৗজাং খবর লাবৗদৗং, বে রংজানায়া গাছেন মানসিফৗরনি থাখৈ জানায়। মানৗনা দিনৈ, দায়ূদনি নৗগৗরাও নৗংছৗরনি থাখৈ বাছাইগিরিয়া সারিজাবায়; বিয়ৗ মসিহ ফৗরবুআনৗ1। আরৗ নৗংছৗরনি জুনৈ চিহ্নয়া বেনৗ, নৗংছৗরৗ সাছে গৗলৈ গথ'খৌ ছিস্রিজৗং ফামফবজানায় গংছে নাওদ্রায়াও2 ফুঠুনায় মৗনহৈনায়।”
আরৗ নুয়া নুসুল্মা স্বৗর্গৗনি দাওহা নাংগ্রাফৗরনি হান্জায়া বি আরফ'ফৗরজৗং লৗগৗলাফৈনানৈ ঈশ্বৗরখৌ বাখ্নাইদৗং আরৗ বুংদৗং:
“স্বৗর্গৗয়াও ঈশ্বৗরা মহিমা গৗনাং জাথৗং,
আরৗ বুহুমাওবৗ জাইফৗরনেও বিয়ৗ সন্তুষ্ট বিছৗরনেও শান্তি জাথৗং।”
জেব্লা আরফ'ফ্রা বিছৗরখৌ নাগারনান স্বৗর্গৗয়াও থাংফিনৗ, অব্লা লাওখারফ্রা গাওজৗং গাও হৗনজ্লাইদৗং, “থু, জৗঙৗ বৈৎলেহেমাও থাংনি, আরৗ ফৗরবুআ জৗংনৗ জেখৌ রাইঠিবায়, বেখৌ জৗঙৗ নাইহৈনি!” বিছৗরৗ হাখু দাখু থাংনানৈ আরৗ নাগিৎনানৈ মরিয়ম, যোষেফ আরৗ নাওদ্রায়াও ফুঠুনান দৗন্নায় গথ'খৌ মৗনহৈবায়। জেব্লা লাওখারফ্রা গথ'খৌ নুহৈয়ৗ, অব্লা গথ'নি খৗথা আরফ'নি খৗথানায় মানিখৌ বয়নৗবৗ খৗথাবায়। আরৗ জাইফ্রা লাওখারফৌরনি খৗথানায় খৗথাখৌ খৗনাবায় বিছৗরৗ সাফ্রৗমবৗ সৗমৗ নাংবায়। নাথায় মরিয়মা বে গাছেন খৗথাখৌ গাওনি গৗসৗয়াও লাবায়, আরৗ গৗথৌয়ৈ বেফৗরখৌ সানবায় থাবায়। লাওখারফ্রা আরফ'নি রাইঠিনাইবাদি গাছেনখৌবৗ নুনৗ আরৗ খৗনানৗ মৗন্নায়খায় ঈশ্বৗরখৌ বাখ্নায়ৈ বাখ্নায়ৈ আরৗ মহিমা হৗয়ৈ হৗয়ৈ থাংফিনদৗং।
যীশুখৌ নাম দৗন্নায়
সারিজানায়নি আট দিন উনাও ঠিক সমাও জেব্লা বিয়ৗ ত্বকছেদ খৗলামজাদৗং, অব্লা বিনি নামখৌ যীশু দৗননায়জাদৗং,3 মানৗনা বিয়ৗ বিমানি র্গৗবৗয়াও উজিনাইনি সিগাংনৗ আরফ'আ বে নামখৌ দৗনখাদৗংমৗন।
মন্দিরাও যীশুখৌ লাংনায়
আরৗ মোশিনি আইন বাদি জেব্লা বিছৗরনি গৗথার জানাংগৌনি সমা জায়ৗ, অব্লা যোষেফ আরৗ মরিয়মা যীশু গথ'খৌ ফৗরবুনৗ গথাইনৗ যিরূশালেমাও লাঙাছৈ। (জেরৈ বাদি ফৗরবুনি আইনাও লিৎনায় দং; “ছৗরবা হিন্জাওনি গিবি বিসায়া হৌয়াসা জাব্লা, বিয়ৗ ফৗরবুনি থাখৈ গৗথারৈ গৗথাইনাংনায়”)4। আরৗ জেরেই ফৗরবুনি আইনাও লিৎনায় দং, বিবাদিনৗ বিছৗরৗ জোড়াছে দাওঠু এবা মানৈ ফারৌও বিসা ফৗরবুনৗ বলি বাওনৗ লাংদৗং5।
বি সমাও শিমিয়োন নামনি যিরূশালেমাও সাছে মানসি দংমৗন, বিয়ৗ সাছে ধার্মিক আরৗ ঈশ্বৗর ভক্ত মানসি মৗন, বিয়ৗ মসিহনি6 থাখৈ লামানায়নানৈ দংমৗন জাইয়া ইস্রায়েলীফৗরখৌ বাছাইনৗ ফৈনায়, আরৗ গৗথার জিউয়া বিনি ছায়াও দংমৗন। গৗথার জিউয়া বিনৗ বেখৌনৗ মিথিহৗদৗং যে বিয়ৗ ফৗরবুনি মসিহখৌ, 7 নুনৗ মৗনাগৌমানি বিয়ৗ থৈথারনায় অৗঙা। বি দিননাও গৗথার জিউয়া শিমিয়োনখৌ মন্দিরাও দৈদেনলাংবায়, আরৗ মোশিনি আইন বাদি জেখৌ খৗলামনাংগৌ দংমৗন বিফৗরখৌ খৗলামনৗ থাখৈ যোষেফ আরৗ মরিয়মআ জেব্লা যীশু গথ'খৌ মন্দিরাও লাবৗদৗং, অব্লা শিমিয়োনআ গথ'খৌ বামনানৈ ঈশ্বৗরখৌ বাখ্নাইদৗং আরৗ হৗনদৗং:
“ও বয়নিফ্রায়বৗলৗগ্রাসিন ফৗরবু, নৗঙৗ জেরেই জবান লাদৗংমৗন,
বিবাদিনৗ নৗংনি বে দাসখৌ
দানে শান্তিয়ৈ থৈনৗ হৗদৗ,
মানৗনা আঙৗ গাওনি
মগনজৗং নৗংনি উদ্ধারখৌ নুনৗ মৗনবায়,
জেখৌ নৗঙৗ গাছেন মানসিফৗরনি সিগাঙাও
ঠাম ঠিম খৗলামবায়।
বেনৗ জাবায় গুবুনহারিফৗরনি থাখৈ
নৗংনি লামা দিন্ঠিগ্রা স্রাং
আরৗ বিনৗ জাবায় নৗংনি ইস্রায়েলনি মানসিফৗরনি লাগৈ মহিমা গৗনাং।”
যীশুনি বিমা বিফায়া শিমিয়োননি বুংনাইয়াও সৗমৗ নাংদৗং। আরৗ শিমিয়োনআ বিছৗরখৌ বৗর হৗবায় আরৗ গথ'নি বিমা মরিয়মখৌ হৗনবায়, “বে গথ'আ ঈশ্বৗরজৗং সাইখজাবায়, বিনি জুনৈনৗ ইস্রায়েলফৗরনি গৗবাঙানৗ গৗগ্লায়নায় আরৗ বিজৗংনৗ গৗবাং ইস্রায়েলফ্রা বাছাইজানায়। ঈশ্বৗরা বে গথ'খৌ মৗনছে চিহ্ননি থাখৈ থৗনহৎদৗং জাইনি বিরুদ্ধনাও গৗবাঙানৗ বুংনায়। আরৗ বিনিখাইনৗ গৗবাং মানসিফৗরনি গৗসৗনি সানখৗমানাইফ্রা নুজানায়, আরৗ থুংগ্রীজৗং বিখায়াও সুনায় বাদি নৗংহাবৗ দুঃখ দাহাজৗং সৈনাংনায়।”
বি মন্দিরাও হান্না নামনি সাছে হিন্জাওসা নবি দংমৗন, বিয়ৗ আশের বংশনি পানুয়েলনি বিসাজৗমৗন, আরৗ বিয়ৗ বুরৈথারবাইমৗন, হাবানি উনাও বিয়ৗ সাত বৗছৗর বান হৌয়াজৗং থাদৗংমৗন। আরৗ চুরাশী বৗছৗর বয়সসিম বিয়ৗ রান্ডি জানানৈ থাদৗং। বিয়ৗ মন্দিরখৌ মাব্লাবাবৗ নাগারামৗন নাথায় উপবাস আরৗ প্রার্থনাজৗং লৗগৗছে হর সান ঈশ্বৗরখৌ সিবিয়ৗমৗন। ঠিক বি সময়াওনৗ হান্নায়া বিছৗরনি খাঠিয়াও থাংনানৈ গথ'নি থাখৈ ঈশ্বৗরখৌ ধন্যবাদ হৗদৗং, আরৗ ঈশ্বৗরা যিরূশালেমখৌ বাইখনায় হৗন্নানৈ জাইফ্রা লামা নাইনানৈ দংমৗন, বিছৗরনৗ, বিয়ৗ বে গথ'নি খৗথা বুংদৗং।
নাসরৎনাও থাংফিনায়
ফৗরবুনি আইন বাদি গাছেনখৌবৗ মাওজৗবনানৈ যোষেফ আরৗ মরিয়মা গালীলয়াও, গাওছৗরনি নৗগৗর নাসরৎনাও থাংফিনাছৈ। আরৗ যীশু গথ'আ দেৎনাইজৗং লৗগৗছে বৗলৗগ্রা জানৗ হৗমাছৈ। বিয়ৗ জ্ঞানাও পূর্ণ জায়াছৈ আরৗ বিনি ছায়াও ঈশ্বৗরনি অনুগ্রহয়া দংমৗন।
মন্দিরাও যীশু গথ'
যীশুনি বিমা বিফায়া বৗছৗরফ্রৗমবৗ যিরূশালেমাও ফাসকা ফরবমাও থাঙৗমৗন। জেব্লা যীশুনি বয়সা বারো বৗছৗর জায়ৗ, অব্লা বিছৗরৗ গাওছৗরনি হুদা বাদি ফরবমাও থাংদৗং। ফরব জৗবনাইনি উনাও জেব্লা বিছৗরৗ ন্ব'য়াও ফৈফিনদৗংছৈমৗন অব্লা যীশু গথ'আ যিরূশালেময়াওনৗ থালাংদৗং। নাথায় বিমা বিফাআ যীশুনি থালাংনাইখৌ মিথিয়াখৈমৗন। বিছৗরৗ যীশু গথ'খৌ গুবুন লামা থাবায়গ্রাফৗরজৗং থাংফাবায় সান্নানৈ সানছেনি লামা থাংফিনদৗং। বিনি উনাও বিছৗরনি গুষ্ঠি আরৗ লৗগৗফৗরনি গেজেরাও নাইগিৎদৗং। জেব্লা বিছৗরৗ বিখৌ মৗনাখৗছৈ, অব্লা বিছৗরৗ যীশুখৌ নাগিৎনৗ যিরূশালেমাও থাংফিনদৗং। সানথামনি উনাও বিছৗরৗ মন্দিরাও যীশুখৌ ধর্ম গুরুফৗরনি গেজেরাও জিরাইনান থানানৈ, বিছৗরনি ফৗরৗংনাইখৌ খৗনাছংনায় আরৗ বিছৗরখৌ প্রশ্নফৗর সৗংনায় মৗনহৈদৗং। আরৗ জাইফ্রা বিনি খৗথাফৗরখৌ খৗনাছংদৗলাদৗংমৗন বিছৗরৗ সাফ্রৗমবৗ বিনি বুজিনায়নি বুদ্ধি আরৗ বিনি উওরফৗরাও বৗথিয়া নাংদৗং মৗন। জেব্লা বিনি বিমা বিফায়া বিখৌ নুদৗং অব্লা বিছৗরৗ বৗথিয়া নাংদৗং, আরৗ বিনি বিমায়া বিখৌ বুংদৗং, “ও বিসাহৌয়া, নৗঙৗ মানৗ জৗংজৗং বেবাদি খৗলামখৗ? নৗংনি নৗম্ফাজৗং আরৗ আংজৗং চিন্তাজানানৈ নৗংখৌ নাগিৎবাইয়িনদংমৗন।”
বিয়ৗ বিমা বিফাখৌ সৗংবায়, “নৗংছৗরৗ মানৗ আংখৌ নাগিৎবাইদৗংমৗন? নৗংছৗরৗ মিথিয়ামৗন নামা আঙৗ আংনি আফানি ন্ব'য়াও থানৗ নাংগৌ?” নাথায় যীশু বুংনায় খৗথাখৌ বিছৗরৗ বুজিনৗ হায়াখৗছৈ।
অব্লা যীশুআ বিনি বিমা বিফাজৗং লৗগৗছে নাসরৎনাও থাংফাবায় আরৗ বিয়ৗ বিছৗরনি আজ্ঞাকারি জানানৈ থাহৈবায়। নাথায় বিনি বিমাআ বে গাছেন বাথ্রাফৗরখৌ গাওনি গৗসৗয়াও দৗনবায়। আরৗ যীশুআ জ্ঞাননাও, ঈশ্বৗরনি আরৗ মানসিনি অনুগ্রহজৗং লৗগৗছে মৗদৗমাও দেৎনাছৈ।
Source notes (7)
- Footnote মসিহয়া জাবায়, গ্রীক সৗদৗব “খ্রীষ্টনি” থাখৈ অনুবাদ জানায় মৗনছে ইব্রীয় সৗদৗব। গ্রীক সৗদৗব “খ্রীষ্টয়া” বেহা মৗনছে উপাদি, বেয়ৗ যীশুনি নামনি জেবৗ অংশ অৗঙা আরৗ বেনি অৗংথিয়া জাবায় বাছাইগিরি, জাইয়া রাজা জানৗ থাখৈ ঈশ্বৗরজৗং সাইখজাবায়।
- Footnote গৌয়ালি সিঙাও থানায় জিবজুনারফৗরখৌ জাহৗগ্রা জায়গা
- Cross-reference লেবীয় বিজাব 12:3; অৗংখাৎলাংনায় 17:9–14; লূক 1:31; মথি 1:18–21
- Cross-reference অৗংখাৎলাংনায় 13:2,12
- Cross-reference লেবীয় বিজাব 12:8
- Footnote গৗবাং বৎসরনি সিগাঙাও ঈশ্বৗরনি নবিফ্রা লিৎদৗংমৗন যে বিয়ৗ সাছে বাছাইগিরি রাজাখৌ থৗনহৎনায় আরৗ বি রাজায়ানৗ জানায় ঈশ্বৗরজৗং সাইখজানায় বাছাইগিরি রাজা আরৗ বি রাজানি গেজেরজৗং স্বৗগৗনি শাসন ব্যাবস্থায়া বে সংসারাও ফৈনায়। বিনি থাখৈনৗ ইস্রায়েলিফ্রা গৗবাং দিননিফ্রায় সাছে রাজানি থাখৈ নেনানৈ ফৈদৗংমৗন। বিনৗ জাবায় মসিহ এবা খ্রীষ্ট। ( লেবীয় বিজাব 12:3; জাগাইজেন্নায় 17:9–14; মথি 1:18–21)
- Footnote ফৗরবুজৗং অভিষেক খৗলামজানায় খ্রীষ্ট
Mech. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.