Ananun 22

1Snonsnon vepyum vye maeja syadi ro arasai vebor;

snonkaku se syowi au ipyum syadi ro svuk brawen ma sarak.

2Snonkaku venana ma vesavarar sikam simniskam:

Manseren Allah vraur vye siryakam.

3Snonkaku swaruser veswar nanem nari ikanden fafisu myam roi vevyeva nari venyanemi na;

snonkaku vefawi karyonba nari imbran pdef rao ismai marindi.

4Snonkaku veyararyof faro Manseren Allah ma verun mankundi,

nari ismai kenem vepyum, inanjarva, ma ismai syowi.

5Barwei ma denem naisya ro nyan snonkaku kenem bekarfiva;

wove insama wavyeido vinkwanbur na.

6Romawaya farkori kuker rari kenem vepyum,

rarirya isof vye mansaro nari ikenem pdef ra dirya.

7Snonkaku vesavarar sve women faro snonkaku benanasya;

snonkaku vena nyaki sve women faro snonkaku vevuk nyaki.

8Snonkaku vevuver varvorido nari dinek bon marindi;

ro papupesya papoik vyuk ifrur famfnom nakam nari namyomen.

9Snonkaku vefrurpyum sya Manseren Allah vye vok si,

snar sirarwas anan sena faro snonkaku veyananjarsya.

10Snonkaku veyawos ker wos anonefsya wayau si ra sibur,

insamaido famfavri, mbrov ma wos anonef nari naisya werva.

11Snonkaku sne venapes ma veyawos pyum

nari vye manivov wairek i.

12Manseren Allah fyaduru snonkaku vena fawawi vekaku,

mboi syampurnak aw snonkaku veyankarkar sena.

13Snonkaku vemananonya iryav monda vyarek ro rum;

inja ikofen, “Singaya isriwa, nari myun aya ro nyandifadu.”

14Wos embakvuk vin vevov vinkunya imnis raris denem;

snonkaku Manseren Allah imsor sya nari sisapi ro dori.

15Romawa babosya sifawi nanemba,

imbape aprer-farkarkorya iso nari vefarwe rari kenem sena.

16Mundiri eve sewar fa venana ma ifrirepen snonkaku vesavarar,

orovaido vevuk faferes faro snonkaku venana varpurya nari syavarar.

Wos ananun samfur di kior ro snon vefirnanem

17Wamnaf navye wos farkakor snonkaku vefirnanem.

Mamepen pyum kaku farkarkor ayena.

18Raryav isya ro au fafis wakram pyum farkarkor ayena ro snembri do.

Rarirya fasos kwar fa buki nakenem.

19Yafarkorna ve au ro fafis ine

Insa rwir kakyar bena faro Manseren Allah I.

20Wos farkarkor samfur di kyor yafasna ve au kwar

wos farkarkor anna nadaw fawawi ma ananun vepyum,

21ma nfarkor au rosai bepyum ma vekaku

insa buk kankarem vekaku faro snonkaku vewan au fa farkorya.

--1--

22Fasrisen awer snonkaku vesavararya, snar iryarva;

ma wafrirepen awer snonkaku veyawauya vena snonkakuyova fa vye sano warek i.

23Snar, Manseren Allah nari Ivriwarek i

ma pyosuk kenem snonkaku vefrir epen ani.

--2--

24Be manivov awer kuker snonkaku vemasasor,

ma rik vesam,

25insa wamnis awer i

wafrur ra dirya ido, imnisra wafrur denem fa isin au.

--3--

26Wafrur awer ap fa

bak pyan nyaki snonkaku vese sena.

27Nari bak napoknava ido,

kamboi anenef beja kako vye vefasyar.

--4--

28Wamiser awer yawek vekwar ro saprop

up siwara srir kwar.

--5--

29Mam snonkaku vra vesanyanemya fararur vyenakwar?

Snonkaku evesya anya nari duf farmyan snonkaku famfnom sya rum senava, mboi ro aidoran waireksya.