Ananun 21

1Manseren Allah fyarkin wairekya swaruser vyena

imnis fyaraser warya fa idaf raris marisen vyedi.

2Frur snonkakusya sena soverada napyum raris mamam sena,

mbape Manseren Allah I monda vekara user rosai siwasen ro sisnesna.

3Manseren Allah imarisen kaku faro rari venapes ma veyavyover

isyadiro aiwan farsarserna.

4Maka veyawow ma sane vemarares,

eve padamara faro snonkaku evarvorsya, irya sasar nairi.

5Aw snonkaku vemyaren vefararur idaw kamayai;

fararur sawsawya idaw ananjar.

6Nana wasmai kuker ramar veyankarkar

nari ne fromo fasaw ma nun snonkaku ve marmar.

7Snonkaku evarvor simewer siso sasoseryandi;

frur vevyeva sena neninyan mankunsi.

8Snonkaku vevarvorya, nyan kankenem vyedi ifo yuvyav;

snonkaku vepyumya ikenem kuker napnapes.

9Barek vardi ro mankundau ro aren

ipyum syadiro barek us vin buk, vekain rakrok vesyakwar.

10Snonkaku evarvor imarisen kaku ifrur nyan varvor;

faro manseiryawer vye syowi siva.

11Snonkaku vemararesya siprer inido insape snonkaku vefawi karyonbaya ismai farkarkor.

Snonkaku veswar nanemya sisonek inido, nari fyirnanem syadi wer.

12Allah Ima Inapes, Ifawi rosai vero rumrido snonkaku vevarvorsya.

Nari Vye ninyan si fa sismai marindi.

13Mansei vemewer vemnaf vavesoso snonkaku veyananjar

nari ikako vye vemam farander ro fafis dor famfnovek.

14Faferes fasasisna nafrur fa msorna nambrusen,

ma faferes fasasisna npandun dormomenna.

15Napnapesya simbran inido,

snonkaku vepyumsya simarisen,

mbape snonkaku vevarvorsya simkake.

16Snonkaku vevoyarbur nyan kenem venapesya,

nari ifyafer ro mun aivuiya.

17Snonkaku vesewar monda anfnak marisen nari isapi ro ananjar;

snonkaku vemarisen monda an ma aninem vemafen nari syavarar.

18Snonkaku vevarvor nari ismai marindi ro roi iwasen fa ifrur yov snonkaku venapesya,

ma snonkaku vevarvor ismai ninyan fadwer snonkaku venapesya.

19Wakenem ro mankundau ro maper veve ursva,

ipyum syadi ro wakenem so vinbuk svadon eve prepre ma vekain rakrok.

20Snonkaku befirnanem ikenem pyum kuker kamayai ma nana vyena;

snonkaku venawnower arasai vyena navro fasau bur i.

21Mundiri veyom kakakuya ma saswarya,

nari ikenem pyum, ismai som ma kenem vyedi ikwane.

22Snon mambri veswar nanemya ismai papoik fa fyasyar kota snon mamun vesambrav sya siwaren warekya;

ma imer karvaken ayar mamun sikyarna.

23Insa wande bur kenem vesamswenya,

ivyekada swasor au ro wawos bena.

24Snonkaku vemarares ma veyow mankunsya

simarisen sawos yaye ma sikenem karfiva.

25Snonkaku vemananon; myun mankundi kuker marasrisen vyena.

snar imyaren ifararurva.

26Ras mankwanya kyain kyara monda rosai vye fandun na.

Imboi, snonkaku rari vepyum vyuk ra nabor nasararir faro snonkaku vese.

27Aiwan farsarser snonkaku rari vevyevasya sena Manseren Allah imarisen nava,

isyadadi sfarser na kuker sne venapesva.

28Snonkaku veyawos kakuva ro varpon mankakara wawos vyena nari sikyarnava;

imbape snonkaku veyawos kakaku ro varpon mankakara, rosai ikofenna snonkakusya sikyarna.

29Snonkaku vevarvor ifawi imaiva;

snonkaku venapes fyaraser mankundi.

30Fawinanem, swarnanem ma firnanem snonkaku

osovaveri fa dores nako ro varpon Manseren Allah I.

31Farmamunya sraki kuker romamun ma kuda vesambrav kaku,

imbape Manseren Allah iso nari vemerkar mbrov syani.