Ananun 20

1War anggursya sifnai fa snonkakusya sifrur mbris.

Fawi nanembaya isya ro snonkaku veyinem ra vemsersi.

2Masasor wairekya imnis singa vesnirem;

snonkaku vefrurfa imsorya, irya vye ninyan mankundi.

3Snonkaku vefawi nanembasya siso vemarisen vefanfavri;

rari vesmai ararer isoine kovinkwan bur fanfavriya.

4Manamom vemananon kyer yaf vyenava ro fafisu skakerya;

inja fafisu aninekya yaf vyan na nbuk royo ve iva.

5Sane snonkaku imnis raris war veyer veramen;

imboi snonkaku veswarnanemya iso nari vefawi mnis kakara snonkaku anya vyena.

6Snonkaku sibor skarem mankunsi ve manivov,

imboi eve syowi ma vesmai kayaryar, syamswen kaku fa kosrowsi.

7Romawa inai sismai aski rofyor sna sinan kma

kenem vepyum ma venapesya.

8Rofyor wairekya kyain ro karapesa vave mankakaraya

roi vevyevana myam ma ifawi pres na.

9Snonkakuyo isyafa nari ikofen,

“Yafrur sren snerikwar, yave mkei bur sasarnakwar?”

10Wankyara ma kanau vekakuva

Manseren Allah imarisen nava.

11Ro romawasya sifrur na nfasnai vadir

rariso kenem sena napyum nanapes ke rova.

12Kneramsya insa kovuki ryower ma mkamorsya infa kovuki myame,

sukame Manseren Allah I vefrur sunya.

13Snonkaku vemarisen veyenef vesyakwar nari isapi ro savarar

snonkaku vemyaren vefararur ismai nanan nabor kaku.

14Manfarvyan vekoves ikofenker, ipyumba, dek mankenem.

Imbape fafisu ismai roi vyefandun anya kwar, dararer mankundi snar dek mankenemba.

15Wawos veveknam ro fawawiya,

Ne maeja syadi ro brawen ma kerui vesnaper.

16Mundiri veyap fa vevak pyan nyaki snonkaku vese,

ivye nana vyena ne veyun fa ne vekram isof vye user ap vyedi.

17Arasai kosmai kuker ankarkar randakya nanbye kaku,

imbape favye muma ido kan na namnis raris keru morem.

18Aw wafrurna nari namawes fafisu snonkaku vese svuk swaruser;

rarirya rwa mamun awer fyor aw bena namnis vaim.

19Snonkaku vemarisen vefawar min vyesi, sikram wos kankunesva;

mkokenem so awer snonkaku veyawos naborsya.

20Mundiri vefras sinan vyesi, kenem vyedi nari vye fromo

imnis padamara vembrer ro rov fafis remaryai.

21Arasai var rarwas wasmai fasaw ro randakya kuker nyan vepyan,

favye muma vok naisyava.

22Mkomunsu awer vavyevaya kuker vavyeva;

mkokyar monda faro Manseren Allah, iso nari vesaramper au.

23Wankyara ma kanau vekakuva

Manseren Allah imarisen nava.

24Manseren Allah vye asas kwar nyan kankenem snokaku ro supswan ine;

evewari snonkakusya sifawi mnis nyan kenem mankunsi senava.

25Kwara vepon resari rofyor wafrur ap fa buk farsarser faro Manseren Allah I.

Mbaido nari fafko ro varpurya.

26Wairek vena firnanemya ifawi snonkaku mundiri rari vevyevasya;

nari fyakman siva mboi vye ninyansi.

27Rur snonkaku irya sananai ro Manseren Allah

vesnaiser snewarya kasiper.

28Rofyor wairek vye parensa kuker vave syowi, vave asuser ma kakaku ido,

irya nari ikif pdef vavesasoserya.

29Romawa baboya smander i snar samamvrav vyena,

ma sinan eve mansarkwarya ismai syowi snar pik vepyoper vyena.

30Aprer vemarvak fyor no ido ipyos roi vevyevana

ma parader vera diryanya vyan sren snewar snonkaku.