Sarmur 45

Yusuf vye vadir mankundi faro naek vyesi

1Fafisu anya Yusuf sneri idworem ba kwar ro varpon faker vyansi. Inja iwan si fa sisasyar bur sim anya insa ikofen vadir ve naek vyansya, inido manseirya kaku.1 2Faker vyansya sisasyar bur sim anya posa ido Yusuf kyanes naba kaku, isof snonkaku Mesir vero simya vandirisya srower, ma roi evesya anya vye abar kako ra ro Firaun Aidoran vyani. 3Yusuf ikofen faro naek vyansi, “Ayaine Yusuf! Kamam ikenem kaker?” Naek vyansya sikandor ma simkak namsinba inja skarem faro iva. 4Mura Yusuf ikofen be si; “Mkorama mkosnefer ve aya.” Inja simbran fa sfanam i, ma ikofen wer, “Aya Yusuf, mkovov kwar ve Mesir ani.” 5Mkomkak awer ma mkofafko awer mankun mko snar mkovov aya kwar. Snar Allah mankundi iso veyun aya ma ro dine fa yapon mko insa kawasa sibor sismai fadaduru. 6Kur ine insape pasivarek eve suru ro basbiser veba ine, ma nari pasivarek ri rim wer snonkaku sya som sker ma sink va. 7“Allah dun aya kwar fa yapon mko insama mkosmai faspar kuker nyan vefrur kanandor ine, ma insama mkosmai faduru ro kenem mkovena, mko ma kpu mkovesyakam. 8Inja, mko vefnaifa yarama ro dinenyava, imboi Allah mankundi. I vevuk fa yasmai nasan vekaki ro wairek Mesir. Yasmai kayaryar fa yakif vave sasoser ro rum rido vyeja kasiper ma ro sup Mesir kasiper.

9Inja mkosamberen, mkokaver faro kamami ma mkokofen yov i, Yusuf, romawa bani, ikofen radine, ‘Allah vyuk fa yave snopor ro sup Mesir kasiper; Mkorama fasaw kaku.2 10Kamam nari kwain ro sup Gosyen, fanam aya -- kamam au, kuker romawa kpu, domba, kambing, sapi, ma roi vebor kamam nwana. 11Kamam kwain ro sup Gosyen ido, nari yafaduru au. Snar basbiserya isyeser vaim, myun pasi varek ri rim kaker inja nari yafaduru kamam au ma kina vebor ma rofanfan ansine insa mkananjar awer.’ ”3

12Yusuf ikofen wer, “Kur ine mkomam karyer, naba syadi Benyamin au, kaku ayairi Yusuf i. 13Mkokofen faro kma kovani, aya vekif nasan ma vesmai papoik veba kaku ro dine, ro Mesir, ma mkofawar rosai mkomam kwar nane faro i. Insape mkun fasau i muma.”

14Raposa ido Yusuf ma Benyamin sufor yaye su vo sukanes. 15Ramnai, fafisu kyanes kaker, Yusuf fyor naek veba vyansyakam ma isyumsi. Posaido insape naek vyansya skain sfawar kayam kuker i.

16Rofyor Firaun ma kawasa vero aidoran vyedi simnaf abar vekur Yusuf naek vyansi srama, inja Firaun i ma faker vyansya sakmarisen kako. 17Mura Firaun ikofen faro Yusuf i, “Wawan fa naek bansya sivyawen gandum no ro keledai sesya ma sibur kaver ve Kanaan. 18Insamaido sun kmami ma kina vyesyakam fa sibur muma, nari yavuk vesi saprop vepyum kaku ro sup Mesir, ma nari sismai nana ma anvepokem ro saprop vemafen ani. 19Wawan fa sun mura kako kereta faro vin svuksya ma romawa kasunsya, ma svuki dun kako kma skovani. 20Siswaruser awer roi vebor siburna, snar roi vebor vepyum kaku ro sup Mesir kasiper nari sna na.”

21Romawa Yakub vyansi sifrur raris mov Firaun dawos raya. Yusuf vyuk vesi kereta ri veso, raris Firaun mov ikofen raya, ma vyaryamsi kuker rovean ro marandan sedi. 22Vyuk vesi kako sansun vebabona oser-oser, vape faro Benyamin i vyuk ve i kumpan sarak usin di kyor ma sansun vebabona min di rim. 23Fyarem kako keledai snomansya samfur ve kmari veyun roi vebor vepyum kaku ro sup Mesir, ma keledai vinsya samfur wer fa sun pokem, mamami ma rovean evesena fa san ro marandan sedi ve sup Mesir. 24Posa Yusuf ryir naek vyansya fa sibur kaver, ma danun faro si, “Mkomsor yaye awer mko ro marandan.”

25Inja sisasyar bur Mesir ma skaver ve sup Kanaan faro Yakub, kma skovani. 26Skokofen faro kma skovani, “Yusuf ikenem kaker! Iso eve snopor ro sup Mesir kasiper.” Yakub ryower abar anna imboi sneri iprim monda, snar ikyar ro sikofen nava.

27Vape fafisu skofawar rosai Yusuf ikofen ve sko anna, ma fafisu myam kereta Yusuf fyarem fa veyuni ve Mesir, insape sneri kpis ma ikyare. 28Ikofen, “Aroro Yusuf romawa ayani ikenem kaker! Irya monda yawasen ro sanerido! Yasawon kaku insa yara fasaw veri fa yasrow kuker i fyor yamar vaim.”