Sarmur 46

Yakub ma Kina Vyesya sfaryan ve Mesir

1Yakub imbran ve Mesir kuker nana vebor vyenakam. Ryaro Bersyeba ido, ikun farsarser faro Allah kmar Isak isyom anya. 2Fafisu rovya, Allah ikofen faro i ro mamam radine, “Yakub, Yakub!”

Yakub kyarem, “Ayaisine, Manseren.”

3Allah ikofen, “Ayaine Allah, Allah kmam isyom ani. Wamkak awer fa rwa ve Mesir. Nari Yavuk fa kpu besya sve er veba ro diwa. 4Nari Yambran so au ve Mesir, ma kako nari Yun kaver kpu besya fa skaver ve sup ine. Yusuf nari isya ro ris bedi fafisu marmar bedi ryama.”

5Posa Yakub ibur Bersyeba. Romawa vyansya sikanow Yakub i kuker vin svuk sya ma romawa sesyakam ro kereta wairek Mesir fyarem anna. 6Skun kako rofanfan ma nana vebor skosmai kwar ro Kanaan, ramnai skora ve Mesir. Yakub dun kpu vyesya kame, sisosine1 7kpu vyesyakam snon ma vin.

8Yakub romawa vyesi veso ve Mesir sisosine: 9Ruben, romawa rakya; romawa vyesya: Henokh, Palu, Hesron ma Karmi. 10Simeon; romawa vyesya: Yemuel, Yamin, Ohad, Yakhin, Sohar ma Saul. (Saul inido Simeon swa vye vin Kanaanya romawa vyedirya.) 11Lewi; romawa vyesya: Gerson, Kehat ma Merari. 12Yehuda; romawa vyesya: Syela, Peres ma Serah, Yehuda romawa min vyesya, sisoine Er ma Onan sumar ro Kanaan. Peres romawa vyesya: Hesron ma Hamul. 13Isakhar; romawa vyesya: Tola, Pua, Ayub ma Simron. 14Sebulon; romawa vyesya: Sered, Elon, ma Yahleel. 15Sine kame romawa snon Lea ikapar ve Yakub i ro Padan-Aram, ma ikapar kako inai vin oser venirve Dina. Rarirya kpu Yakub vyesya ro Lea i barborya samfur di kyor seser di kyor.

16Gad; romawa vyesya: Sifyon, Hagi, Syuni, Esbon, Eri, Arodi ma Areli. 17Asyer; romawa vyesya: Yimna, Yiswa, Yiswi ma Beria kuker srar skovedi Serah. Beria romawa vyesuya susoine Heber ma Malkiel. 18Kpu samfur seser di wonem ansine Yakub ismai ro Silpa, isoine vinfamyan Laban vyuk faro inai vye Lea i.

19Rahel nya romawa ri suru ve Yakub i, suiso Yusuf ma Benyamin. 20Ro Mesir Yusuf nya romawa ri suru, suiso Manasye ma Efraim sna suvedi Asnat, isoine Potifera eve imam ro Heliopolis inai vyedi.2 21Benyamin; romawa vyesya: Bela, Bekher, Asybel, Gera, Naaman, Ehi, Ros, Mupim, Hupim ma Ared. 22Snonkaku samfur seser di fyak ansya sirya Yakub romawa ma kpu vyesi ro swa vyedi Rahel i.

23Raimnaido Dan; romawa vyeja Husim. 24Naftali; romawa vyesya: Yahseel, Guni, Yeser ma Syilem. 25Snonkaku ri fik anskoine romawa ma kpu Yakub ismai ro Bilha, vinfamyan Laban vyuk faro inai vye Rahel i.

26Yakub kpu vyesya vera ve Mesir barborya samfur di wonem seser di wonem, imbikin vyesya saksun ba. 27Yusuf nya romawa ri suru ro Mesir, rarirya Yakub kina vyesi vero ro sup Mesir barborya samfur di fik.3

Yakub ma kina Vyesi ro Mesir

28Yakub iwan Yehuda i fa imbran vepon fa dor Yusuf i insa isrow kuker kmari ro Gosyen. Fafisu skosuver ro Gosyen, 29Yusuf dek kereta vyeja ma isrow kuker kmari ro diya. Fafis susrow su nanya, Yusuf dawer epen kmar sasuri ma kyanes kawan kaku. 30Yakub ikofen faro Yusuf i, “Kur ine yafasos fa yamar, snar yasrow au ma yamam au kwar ma yafawi ausya wakenem kaker.”

31Posa Yusuf danun faro naek vyesya ma naek min evesesya, “Yara fasaw kaku fa yakofen vadir ve Firaun i insa ifawi naek ayesya ma kamam kina vyesyakam vekain ro sup Kanaan srama kwar. 32Nari yakofen vadir kako mko nido manfarandous domba ma sapi, ma mkun kako rofanfan ma roivebor mkovena kam kwar. 33Rofyor Firaun dor mko fa ifuken fararur mkovena ido, 34mkokofen badir ve i, mkonido manfarandous vemamwarek rofanfan fyor mkobavaya isof kir ine, imnis kpu mkovesi. Rarirya nari iwan mko fa mkokain ro sup Gosyen.” Yusuf ikofen radirya snar manfarandous kambing ma domba irya roi vefrur ayin kaku faro kawasa Mesir sya.