Sarmur 47

Yakub rya isrow kuker Firaun i

1-2Posa ido, Yusuf dun ro naek vyesya min di rim fa sra sisrow kuker Firaun i. Ikofen vadir radine, “Kamami ma naek ayesi sraker Kanaan kuker rofanfan kambing, domba, sapi, ma nana vebor sena kam, fafis ine sisya ro sup Gosyen.” Ramnai vye vadir naek vyansi faro Firaun i. 3Firaun ifuken faro si, “Fararur risai mkokin kaku i?”

Skarem be i, “Inkoine manfarandous rofanfan imnis raris up inkovesi. 4Nkorama nkokain ro sup ine ve mandaman snar basbiserya iba kaku ro sup Kanaan, vefnai fa avrisno fa rofanfan kambing, domba, inkovesine sanva. Wamarisen ido buk fa nkokain ro sup Gosyen.” 5Mura Firaun ikofen faro Yusup i, “Kur ine kmami ma naek bansya sisya ro dine kwar. 6Sup Mesir ine sup mankun mkovedi rya kako. Mkokain kwar ro sup mnuk Gosyen, saprop mnuk vepyum kaku ro sup Mesir ine. Wawan kako fa snonkaku vemyaren vefararursya sfaduru rofanfan ayesi.”

7Yusuf vye vadir kmari faro Firaun i. Mura Yakub vye vok Firaun i. 8Ma Firaun ifuken faro i, “Kamam, ras kenem Kamam bedi vye fis?”

9Yakub kyarem, “Women ayaine yakenem pasivarek usin oser samfur ri kyor kwar ma yakenem ve snonkaku vedawai. Kenem ayedine ifo kuker awau ananjar ma ikwan imnis kuker ras kenem up ayesyava fafisu svedawai ro sup ine bori.” 10Insape Yakub vye vok Firaun i wer posa isasyar bur aidoran wairek vyanya. 11Yusuf kyur fasna faro kmari ma naek vyansi mov nari skain ro ma nari sna ve sup mankun isoine saprop mnuk vepyum kaku ro sup Mesir, fanam kota Rameses,1 raris anun ro Firaun i. 12Ma Yusuf fyaduru kmari, naek vyesi ma romawa inai sesya kuker rovean, raris barbor sedi, veba isof kasun.

Fafisu Basbiserya

13Basbiser anya iba fafayava, evedar ro mov nakam rovean no werva. Kawasa Mesir ma kawasa Kanaan sipikva ma sismai sambravo va snar sibiser. 14Fafisu skoves pokem, Yusuf fyanjur kumpan vevak pokem ansi, ma ikramsi ro aidoran Firaun vyani. 15Fafisu kumpan vero Mesir ma Kanaan sya sivro, kawasa Mesir ansya sra yov Yusuf i ma sikofen, “Buk ve inko nanan! Mam monda inko vo nkomar awer. Kumpan inkovesya sivrokwar.”

16Yusuf kyarem be si, “Kumpan mkovesya sivro ido, mko vuk rofanfan no; nari yavuk roveyan no ve mko.” 17Mura svuk rofanfan sesya faro Yusuf i ma ikako vyuk nanan farosi, fa fyarwe kuda, domba, kambing, sapi ma keledai sesya. Ro pasi varek anya Yusuf vyuk rovean na farosi ma svuk rofanfan sesya ve vavyak faro Yusuf i.

18Pasivarek anya isyonde ido, kawasa ansya srama wer ma sikofen faro Yusuf i, “Nkokofen isnai faro amber au snar kumpan inkovesya sivrokwar, ma kako rofanfan inkovesya amber nwa si kwar. Nkosmai roinowerva fa nari nkovuk faro amber au, iyer monda mankun inko ma saprop inkovena. 19Mam monda inko vo nkomar awer! Mam monda awer saprop inkovena fa nmasmusem. Kwoves inko ma saprop inkovena, vavyakya isoine pokemsya. Mankun inko ma saprop inkovena nari Firaun nyana. Imboi buk ve inko pokem infa nkovuki kenem ma kako rokaker mor fa nkovuver ro yaf inkovena!”

20Mura Yusuf kyoves saprop vebor vero sup Mesir annakam ve Firaun i. Kawasa Mesir ansya oser-oser vyov saprop vyena, snar basbiser anya iba kaku; inja saprop vebor ro sup Mesir anna Firaun nya nakam. 21Kawasa Mesir sya kasiper, Yusuf nya si ve manfamyan. 22Saprop mnuk kyovesva na isoine saprop mnuk imamsya sena. Saprop sena svov na va snar sismai rarwas ro Firaun i faro fandun kenem sena ro rasras. 23Yusuf ikofen faro kawasa Mesir ansi, “Mkomame, mko kuker saprop mkovena yakoves na kwar ve Firaun i. Ine irya rokaker mor nari mkovuver ro yaf mkovena. 24Fafisu aninek, mkovuk rarwas var eve rim ro yaf anna faro Firaun i. Vesyadi sya insape mkona si ve rokaker mor nari mkovuver ma anan faro mko ma kina mkovesi,”

25Mura skarem be i, “Amber faspar inko kwar inja nkokofen kasumasa. Rarirya nkomarisen fa nkove manfyan be Firaun i.” 26Posa Yusuf ifrur sasoser faro kawasa ro sup Mesir. Sasoser ani isoine, fafisu snonkaku sya sinek yaf sena, ivye sirwas si var rarwas ri rim, rarwas anna var oser faro Firaun i. Isof ro kur ine sasoser anya isya kaker. Imboi saprop imam sya sena naiso Firaun kyoves va na.

Fararyor papupes ro Yakub i

27Rarirya kawasa Israel ansi skain ro Mesir, ro sup Gosyen. Sismai nana nabor kaku ma sikapar ra siryewen. 28Yakub ikenem kaker pasivarek samfur eser seser di fik ro Mesir isof ras kenem vyena ne pasivarek usin oser samfur di fyak seser ri fik. 29Fafisya fyanam fa imar, mura dor romawa vye Yusuf i, insape ikofen, “Rwir vramin besuya ro weswaf ayedine ma fores ve aya, nari wakrir aya ro Mesirva.2 30Yor fa mkokrir aya ro up ayesya mov sikrir si roya; mkun baken ayeja ro dine mura mkorir i ro rus skovedi.”

Mura Yusuf kyarem, “Nari yafrur rosai kamam wakofen kwar nane.”3

31Yakub ikofen wer, “Fores ve aya nari wafrur na radirya.” Mura Yusuf fyores, inja Yakub ikofen kasumasa ro kamboi anenef vyedi.